Il Model Friûl al à la sô fonde suntune impostazion
legjislative e un complès di normis che a àn permetût di meti in vore un dai
percors di riprese e di ricostruzion post taramot plui eficaçs inte storie dal
nestri Paîs.
In principi, cemût che al è stât za spiegât, il
Stât al assegnà ae Regjon, e la Regjon e fasè compagn cui Comuns, la facoltât
di esercitâ in maniere autonome une serie di competencis specifichis, aspiet
che al slizerì une vore la cjadene decisionâl. Proponude dal president dal
consei, Aldo Moro, al president dal Friûl-Vignesie Julie, Antonio Comelli, la
deleghe e fo formalizade cul decret leç n. 227 dai 13 di Mai dal 1976,
dopo convertît inte leç n. 336 dai 29 di Mai dal 1976. La Regjon e cjapà
sù la sfide e, stant che e podeve contâ su flus adeguâts e costants di
finanziaments statâi, e puartà insom une imprese cence precedents e cun pôcs
câs simii vignûts dopo, rivant a gjestî il 72% dai cantîrs, li che dome il 28%
al restà tes mans dal Stât.
La autonomie conferide ae Regjon e fo confermade de leçn. 546 dai 8 di Avost dal 1977, Ricostruzion
des zonis de regjon Friûl-Vignesie Julie e de regjon Venit colpidis dal taramot
tal 1976, ricuardade tant che la prime leç di ricostruzion, che e fissave
lis diretivis principâls e i criteris che la Regjon e varès vût di rispietâ par
meti in vore i intervents tai setôrs des ativitâts produtivis, de edilizie
abitative e des oparis publichis. Tal articul 1 si specificave che i fonts
assegnâts si varès vût di doprâju «pal disvilup economic sociâl e pal asset
gnûf dal teritori, par sburtâ la produzion industriâl e agricule, par potenziâ
i servizis, incressi la ocupazion, inte tutele dal patrimoni etnic e culturâl
des popolazions, intune suaze di sigurece idrogjeologjiche». La intenzion di
fonde, in fin dai fats, e jere previdente: trasformâ la opare di ricostruzion
intun motôr di cressite par une regjon margjinâl rispiet aes grandis diretivis
dal disvilup economic european.
Ae Regjon i jere stade garantide «in armonie cu lis
necessitâts pandudis dai comuns interessâts», une grande libertât tal legjiferâ
su lis modalitâts, lis proceduris e lis diretivis par intervignî, tal definî i
plans di svilup, stabilî la entitât dai contribûts pes singulis unitâts
imobiliârs di abitazion, lis liniis di supuart a pro de industrie, dal cumierç,
artesanâts, turisim, de agriculture e edilizie. Par chest fin e podè zovâsi dai
contribûts tecnics e sientifics dai uficis de aministrazion statâl, ancje parcè
che a jerin stâts planificâts intervents significatîfs in setôrs di competence
statâl: in materie di viabilitât, la sistemazion de strade statâl SS 13
'Pontebane' te trate Pontêbe-Malborghet, de trate Ponte del Giulio-Barcis de
strade statâl SS 251 'de Val di Zoldo e dal Cjanâl de Ciline', la continuazion
dai lavôrs de autostrade A23 Udin-Cjargne-Tarvis, il dopleament de ferade
Udin-Tarvis. Dopo, soredut la istituzion de Universitât statâl dai studis di Udin, tacant cul an academic 1977-1978, cu la ativazion dai cors pal an
academic seguitîf, e sierà in cheste maniere la lungje bataie che il Comitât pe
istituzion de universitât furlane al veve scomençade tal 1972.
Par permeti ae deleghe di vê eficace, la Regjon e fo
autorizade a determinâ «lis modalitâts dai intervents e des iniziativis, e in
plui lis proceduris relativis», ancje in deroghe aes normis in vore, cjapadis
dentri chês su la contabilitât gjenerâl dal Stât, cence prejudizi «pal rispiet
dai principis gjenerâi dal ordenament juridic». In struc, si tratave di un
spazi di autonomie che al lave di là di chel za permetût tal statût speciâl che
la Costituzion dal 1947 e veve previodût pal Friûl-Vignesie Julie.
Dopo de leç regjonâl n. 17 dai 7 di Jugn dal 1976,
che e veve furnît lis primis rispuestis pe riparazion des cjasis cun dams o
sdrumadis, la leç n. 546 dai 8 di Avost dal 1977 e segnà pardabon la
svolte pal Friûl: dopo di vê garantît ae popolazion la pussibilitât di restâ
sul puest, ancje se in insediaments provisoris, la Regjon e veve in man i
imprescj par scomençâ la ricostruzion, su la fonde dal principi condividût a
larc che il Friûl al veve di tornâ a nassi 'dulà che al jere e cemût che al
jere'.
Intant la aministrazion regjonâl, cuntune norme di pueste,
la leç regjonâl n. 53 dai 6 di Setembar dal 1976, si jere indotade di un
organisim tecnic aministratîf che, cemût che si viodarà, al sarès stât
cruciâl pe gjestion dal dopo taramot: la Segretarie Gjenerâl Straordenarie, che
di fat e veve cjapât sù la funzion che la Presidence de Regjon e veve vût pe
riprese de vite economiche e sociâl dal teritori.
Infin, tal Istât dal 1977, la Regjon e integrà la leç n.
17 dal 1976 e e definì ad implen il cuadri normatîf tecnic cu la leç regjonâl n. 30 dai 20 di Jugn dal 1977, Gnovis
proceduris pal recupar static e funzionâl dai edificis colpîts dai events
telurics. La norme e fo une vore impuartante no dome pal impegn finanziari
che e compuartave, ma parcè che e meteve in vore une serie di sieltis
politichis fondamentâls: la indicazion di favorî plui che si podeve, cuant che
al jere pussibil a nivel tecnic e economic, lis riparazions su lis
ricostruzions, la aplicazion di listis dai presits e la definizion di
parametris di convenience tecniche economiche tal progjetâ lis oparis, la
nature solidaristiche e no di risarciment dal contribût assegnât ai privâts, ai
ents publics e altri ancjemò.
La leç, une vore complesse e compagnade di imprescj
tecnics impuartants, e specificave i mecanisims operatîfs e lis proceduris
e e stabilive pal citadin la facoltât di sielzi tra l'intervent privât e chel
public (delegât).
Une des novitâts puartadis de leç, tal articul 8, e jere
la atenzion tal conservâ il patrimoni edilizi presint tai piçui borcs rurâi che
a vevin patît dams, par tutelâ il paisaç storic dal Friûl. Chest articul al
previodeve di schedâ e catalogâ i edificis che no jerin vincolâts des Bielis
arts, ma che a svantavin carateristichis architetonichis particolârs e
destinazions di ûs che a justificavin la lôr conservazion, «Par recuperâ e
valorizâ, cuntune esecuzion corete des voris di riparazion e restaur, i principâi
valôrs ambientâi, storics, culturâi e etnics peâts cu la architeture spontanie
locâl». Ae fin, i intervents di cheste categorie, i 'articui 8', a saressin
stâts passe 1.500: la plui part di lôr cumò ju àn dâts dongje tal progjet di digjitalizazion dal archivi de Segretarie Gjenerâl Straordenarie puartât
indevant de Direzion centrâl des infrastruturis e dal teritori de Regjon.
Cualchi mês dopo la leç regjonâl n. 63 dai 23 di Dicembar dal 1977, Normis procedurâls
e prins intervents par inviâ la opare di risanament e di ricostruzion des zonis
colpidis dal sisme, tai ambits de urbanistiche, de edilizie e des oparis
publichis e segnà di fat l'inviâsi concret de ricostruzion edilizie e de
ricostituzion dal tiessût urbanistic. Il diretôr regjonâl de Planificazion
teritoriâl di in chê volte, l’architet Enzo Spagna, al à rilevât che cheste
norme, in particolâr par ce che al inten la urbanistiche, la edilizie e i
lavôrs publics, e definive, «in presince di une largje deleghe aministrative ai
ents locâi, il cuadri organizatîf dai nivei di guvier, e ancje dai imprescj
tecnics operatîfs e finanziaris destinâts a proviodi par plui di un deceni ae
ativitât di ricostruzion fisiche dal teritori e dai insediaments sdrumâts dal
taramot dal 1976».
E rivà po la leç regjonâl n. 35 dai 4 di Lui dal 1979
par «dâ une soluzion pronte e definitive aes esigjencis abitativis di chei che
a jerin stâts sistemâts in prefabricâts provisoris»: cheste e autorizà il
superament dal limit di spese, ma dome par «resons tecnichis comprovadis», e e
delegà ae Segretarie Gjenerâl Straordenarie la pussibilitât di realizâ in mût
diret lis riparazions di imobii privâts e la progjetazion, riparazion o
ricostruzion di edificis publics, in vie sostitutive e su domande dai Comuns.
Cheste novitât e vierzè la strade ae unificazion dai cantîrs ancje in comuns
diviers: cun cheste formule si podevin apaltâ intervents impegnatîfs dal pont
di viste economic, fermâ l’aument cence control dai presits e frontâ la
mancjance di impresis e di lavoradôrs. La Segretarie Gjenerâl Straordenarie e
puartà insom 18 unificazions in plui o mancul sessante comuns par un totâl di
4.500 cantîrs. La stesse norme e obleave i proprietaris dai edificis
ristruturâts o ricostruîts a tornâ lis abitazions prefabricadis al Comun, dopo
di vêlis disvuedadis dal dut.
Simpri pensant ae ricostruzion tant che sinonim di
rinassite, tal 1982 il Stât al mandà fûr la seconde leç di ricostruzion, la n. 828 dai 11 di Novembar dal 1982, no dome par tornâ a finanziâ ce che e
previodeve za la leç n. 546 dal 1977, ma par programâ in particolâr gnûfs
intervents struturâi come la realizazion dal bacin di Ravedis, il dopleament
dal puint dal Tiliment a Cjasarse, la stazion di cjame di Çarvignan,
rinfuarçant la azion di svilup di dut il teritori regjonâl, za supuartât cul
stanziament di fonts regjonâi. In plui al assegnà altris contribûts pal
disvilup produtîf e de ocupazion aes comunitâts di mont e culinârs tocjadis dal
taramot, aes provinciis di Gurize e di Triest e pes zonis no taramotadis des
provinciis di Udin e Pordenon.
Cu la stesse previdence la Regjon, il prin di Dicembar dal
1986, e fasè buine la tierce leç di ricostruzion, la n. 879 dal 1 di Dicembar dal 1986 par integrâ lis normis za aprovadis e zontâ erogazions
par puartâ insom la ricostruzion, finanziant il Centri di riferiment oncologjic
di Davian, il complès dai edificis di vie Bini a Glemone e il cjistiel di
Colorêt di Montalban: chest ca al è stât un intervent une vore complès, rivât cumò
ae fase finâl. La stesse leç e meteve in vore agjevolazions par
intervents di adeguament antisismic tai imobii che no vevin patît dams e che a
jerin logâts tes zonis disdrumadis. Lis Disposizions
pal completament de ricostruzion des zonis dal Friûl-Vignesie Julie colpidis dal taramot dal 1976, che a son dentri te leç n. 879, dîs agns
dopo dal taramot, a judarin a insuazâ la fase de ricostruzion intun cuadri
normatîf dulà che, dal 1976 al 2000, a jentrarin adiriture 76 proviodiments.
Tal complès la opare di ricostruzion e à domandât un
invistiment che tes primis fasis al è stât calcolât in plui di 5 mil miliarts
di liris di chê volte, ma che tignint cont dai finanziaments dâts fûr ae Regjon
e ai orghins statâi competents, al è rivât a une cifre une vore plui
impuartante, che si pues valutâ sui 20 miliarts di euros di vuê (culì
lis curvis di spese des diviersis vôs de ricostruzion).