Butâ jù e tignî cont

Al cricâ dì dai 7 di Mai, devant dai vôi dai Furlans si presentave une visuâl catastrofiche, sparniçade di edificis malsigûrs, di cjasis sdrumadis e di stradis plenis di rudinaçs. Lis zonis li che al jere pericul di cediments a vignirin isoladis. Si picjarin cartei che no lassavin nissun dubi: «Al è improibît lâ dongje o jentrâ par cualsisei reson. Cui che si svicine o che al jentre lu fâs cun so pericul e sot de sô responsabilitât personâl».

In chest clime, i tecnics dai comuns a derin disposizions par butâ jù ce che al rapresentave un probleme di sigurece e al someave che no si podès plui recuperâ. A Dartigne, tal indoman dal taramot, il personâl dal Gjeni civîl al scomençà a segnâ cuntune letare "D" i edificis di butâ jù: des 971 cjasis regjistradis prin dal taramot, 462 a forin sdrumadis dal dut, ancje se i proprietaris a jerin contraris. Cualchidun di lôr al scrivè sui mûrs di chês cjasis «no ancjemò», o al cirî di scancelâ la letare che e decretave la distruzion, ma dut dibant; altris fameis invezit a lassarin dome un cartel cul recapit di li che si jerin trasferidis e a implorarin i operaris di visâlis prin che a tacassin a demolî. Si metè in vore la stesse modalitât operative in cuasi dutis lis localitâts sdrumadis: a Cjavàs si butarin jù 244 fabricâts parcè che a jerin segnâts des creturis e a vevin lis struturis ruvinadis in mût ireparabil, intant che a Cjavaç il sindic al firmà 110 ordenancis di demolizion. E je indicative la situazion tragjiche di Gnive, une frazion di Resie, dulà che dome 6 des 75 cjasis esistentis a forin sparagnadis e ancje la glesie dal Sietcent si ve di butâle jù dal dut.

Il Friûl tra la presse di tornâ a fâ sù e il scugnî eliminâ ce che al è malsigûr. Magari cussì no, si à di demolî plui dal taramot, cussì al jere intitulât l'articul che al vierzeve il "Messaggero Veneto" dai 3 di Jugn dal 1976, cuntune secuence di cuatri fotografiis che a mostravin la fin de ale Nord dal gnûf ospedâl di Glemone, butade jù dai artificîrs dal Reziment gjeni vuastadôrs, cun 78 chilos di tritôl, 6 agns dopo che e jere state metude la prime piere. Il stes gjornâl, ai 15 di Jugn, al veve un articul intitulât Si finìs la demolizion prin di pensâ aes cjasis, li che al contave ce che al sucedeve a Trasaghis, dulà che schiriis di operaris cui caschets e lis mascaris antipolvar a impedivin di jentrâ a ducj chei che a volevin recuperâ ce che al jere restât des lôr cjasis malsiguris. Si demolive par evitâ gnûfs cediments e par garantî spazis urbans sigûrs pai vîfs, une sielte peade al fat che, dal pont di viste tecnic, in chei agns no si pensave che si varès rivât adore di sistemâ struturis murariis une vore ruvinadis.

I lavôrs di demolizion a cjaparin di sorprese ancje i Furlans che a jerin emigrâts tal forest, e a deciderin di tornâ in regjon. Un articul dal "Messaggero Veneto" dai 17 di Jugn cul titul «Sbrendui di cjasis e tantis memoriis» al ricuardave la esperience di Davide Stefanutti che, tornât a Tarnep dopo 42 agns di emigrazion, al veve ricevût l’ordin di demolizion, e devant di chel al veve vût dome la fuarce di dî: «Une cusinute e dôs stanziis, magari une sole, mi bastaressin».

Une setemane dopo dal taramot, l'assessôr regjonâl pai Lavôrs publics Ermanno Rigutto, tal fâ un prin belanç di cheste fase di gjestion de emergjence, al descriveve la assistence che i funzionaris regjonâi a podevin dâ ai comuns pes demolizions. Dopo di vê ricuardât che a jerin za stâts fats plui di 300 intervents tra demolizions, sopontaments e risistemazion de viabilitât, al declarà che la Regjon e voleve dâ la plui grande libertât ae opare di ricostruzion di assegnâ ai comuns, fasint bogns, in vie definitive, i plans detaiâts di lotizazion. Daspò al riferì che un grup di studi al jere za daûr a lavorâ par planificâ la ricostruzion e al anunzià la preparazion di un dissen di leç specific pe restaurazion dai centris storics e pai lavôrs di ricostruzion.

Ancje in gracie de grande presince des scuadris dai vigjii dal fûc tai paîs, in diviers comuns e scomençà a vignî fûr la tindince a favorî i sdrumaments e lis demolizions, par eliminâ ad in plen lis struturis ediliziis ruvinadis e malsiguris, cussì che almancul une part de popolazion e podès tornâ tes cjasis. Tancj a jerin convints che la demolizion e fos une cundizion essenziâl par scomençâ la ricostruzion plui di corse, une sperance che la scosse dai 15 di Setembar e varès ruvinât in curt.

Ma par une sistemazion, ancje temporanie, al coventave timp. Osôf, dodis dîs dopo dal taramot, al jere plen di rudinaçs e, cemût che al scriveve Mario Passi su "L'Unità," tai barcons dal plan tiere a jerin stâts picjâts i sfueis dai verbâi di valutazion de agjibilitât, fats pes cjasis di dut il comun: «Strade par strade, numar di cjase par numar di cjase, la peraule "inabitabile" scrite a machine, e jere ripetude par desenis di voltis sui sfueis di vie Rivoli, e di vie Pescjere, "abitabile", invezit al jere in prevalence in vie Matteotti e in vie Buie. Ta chês altris viis a son cuasi a pâr». Il stes gjornalist al veve scrit, cualchi dì prime, che tai borcs antîcs, tes citadutis plenis di memoriis e di testemoneancis artistichis, tant che Glemone, Tarcint, Colorêt, Vençon, Dartigne, San Denêl, e intes zonis rurâls, la esigjence di fâ ae svelte si zontave a chê di salvâ il plui pussibil l’aspiet urban e il patrimoni edilizi storic: «par restaurâ la imagjin di un Friûl che nissun al varès volût pierdi par simpri.»

Ai 3 di Jugn dal 1976, al gjornalist dal «Messaggero Veneto» Ciro Migliore, il sindic di Tarcint Enzo Maria Gioffrè al riferive che, di une prime stime, cirche il 70 par cent dai edificis al jere di butâ jù: mancul di un mês dopo dal taramot al veve za firmât 350 ordenancis di demolizion. «O vin il dovê», al spiegave, «di butâ jù i edificis malsigûrs che a dan su lis stradis publichis e che a rapresentin un pericul pai citadins». Il plan des demolizions al sarà completât tal 1978 dal so sucessôr, Giancarlo Cruder, che al firmarà altris 800 ordenancis.

Un pôc a la volte, però, e scomençà a slargjâsi une cussience diferente: dut ce che si podeve tornâ a meti in vore e recuperâ cence bisugne di butâ jù e di tornâ a fâ sù di gnûf al vignive preservât, parcè che al permeteve di pensâ a fâ tornâ tes cjasis almancul une part de popolazion. A Glemone, la sorintendence e obleà a sierâ il centri storic e e improibì cualsisei demolizion, ancje cu la poie de vigjilance armade. Ai 16 di Mai, un dipartiment todesc di militârs dal Gjeni specializât in demolizions al jentrà in azion, al jere in stât di operâ tal centri storic adun cui Vigjii dal fûc, par liberâ lis stradis e sapontâ i edificis fasint demolizions smiradis dome pai elements pardabon malsigûrs.

Devant dal slargjâsi di azions che a metevin in pericul ancje il patrimoni artistic, ai 3 di Jugn i sindics, i plevans e i operadôrs culturâi di Vençon, Glemone, Dartigne, Montenârs, Magnan a mandarin un apel dolorât al ministri dai Bens culturâi Mario Pedini. A contestavin l'operât dal "Ufici Speciâl" di coordenament istituît dal Ministeri che, par mancjance di personâl sul puest, nol veve podût evitâ demolizions "une vore pesantis" che a varessin obleât a recuperâ rescj preziôs tes discjariis. Tra i firmataris al jere il sindic stes di Vençon, chel che tai agns dopo al varès contribuît ae ricostruzion filologjiche dal borc storic cul so domo dal Tresinte e il so cjampanili, za declarât monument nazionâl tal 1965. Glemone e Vençon, citadutis storichis che a son stadis sdrumadis cuasi dal dut jenfri il mês di Mai e di Setembar dal 1976, a son doi câs particolârs che a meretin grande atenzion.