«Il Friûl
al ringracie e nol dismentie». Cualchidun lu à scrit sui mûrs tai dîs plui
dramatics, sigûr che chel ringraciament al sarès restât par simpri. E cussì al
è stât, parcè che «la grande presince di volontaris rivâts di corse di altris
regjons e fo cence dubi un dai aspiets plui gnûfs e interessants dal dopo
taramot in Friûl», come che al à scrit Robi Ronza te sô publicazion Friuli
dalle tende al deserto?
Alc dal
gjenar si lu veve viodût dome cui agnui dal pantan rivâts a Florence pe montane
dal 1966, ma intune scjale ben diferente. Nol jere sucedût, par esempli, dopo
dal taramot dal Belice dal 1968. Un rûl strategjic te gjestion dai socors de
prime ore lu àn vût i radioamadôrs, che a àn supuartât la struture comissariâl
e lavorât in sinergjie cun jê. In mancjance di comunicazions telefonichis, cun
dutis lis liniis fûr di servizi e chês militârs in grande dificoltât, il jutori
dai radioamadôrs e dai CB (citizens’ band), i famôs barachins, al deventà
fondamentâl. A son stâts lôr a mandâ fûr l’alarme, a metisi in vore e a
garantî, tes zonis plui colpidis, lis comunicazions tra i sindics, la prefeture
e i socors. Za pocjis oris dopo dal sisme a rivarin in miârs di lôr, de Italie
e dal forest, par judâ cuntun puint mobil puartât de Emilie Romagne e supuartâ
l’unic ripetidôr disponibil sul Mataiûr.
Ancje il
contribût des “radios libaris”, lis gnovis emitentis radiofonichis
indipendentis nassudis in chei mês, al fo preziôs. Lis primis, tant che Radio
Sound Trieste o Radio Friuli, a sigurarin la comunicazion tal principi de
emergjence, altris si zontarin tai mês dopo, e a forin impuartantis pe vite
intes tendopolis e intai insediaments provisoris.
In
gjenerâl la mobilitazion dai volontaris e fo straordenarie. Tacant dai
emigrants e dai lôr dissendents, tignûts dongje in dut il mont de rêt dai
Fogolârs furlans. Personis leadis al Friûl par resons diferentis a partirin in
chê gnot stesse, di ogni bande, par vignî a socori amîs, parincj, o dome chei
che a vevin pierdût dut. Une prime colone e partì di Milan: uns vincj mieçs di
variis associazions di assistence lombardis, e tra chês la Crôs rose celeste,
la Crôs blancje, la Crôs di aur, la Crôs verde e i donadôrs di sanc de Avis. A
rivarin tes zonis taramotadis cun autoambulancis e furgons plens di gjenars di
prin socors, cuviertis, provisions e cul centri mobil di rianimazion dal
autodrom di Monze. Un dai volontaris, Roberto Ghisi, che in chê volte al jere
student di Medisine, al contà di jessi rivât cu la autocolone, tal dopomisdì
dai 7 di Mai, li de prefeture a Udin. Lis dôs autoambulancis de Crôs rose
celeste li che al operave a jerin assegnadis a Glemone, dulà che la dì dopo a
‘nt sarès rivade ancje une tierce. A pene rivâts, te gnot tra i 7 e i 8 di Mai,
a lerin a socori personis tes cjasis Fanfani, a tirarin fûr des maseriis une
femine feride che e strenzeve inmò il fi muart e le puartarin tal ospedâl di
Udin. Le salvarin. Intai cuatri dîs dopo che a restarin in Friûl, Ghisi e i
siei coleghis, a Glemone e intai paîs dongje, a recuperarin une trentine di
vitimis. Cheste e je dome la ativitât di un dai tancj grups che, partint ogni
setemane di Milan, si davin la volte cun mieçs cjamâts di tendis e cusinis di
cjamp.
Ancje la
Crôs verde di Turin e metè a disposizion une autoambulance in plui che furgons
cun tendis e gjenars alimentârs. Di Varese a rivarin machinis par movimentâ la
tiere, di Lastra, in provincie di Florence, a rivarin une autoambulance e siet
mieçs, tra camions e furgons cjamâts di aiûts.
Mieç
secul dopo, al è impussibil citâ ducj i esemplis di solidarietât vûts in Friûl.
A Udin i volontaris si presentavin tal ufici di coordenament metût sù li de
Prefeture par jessi assegnâts tai lûcs de catastrofe. Tra lis associazions plui
struturadis, che a furnirin un contribût straordenari tai socors, o ricuardìn
la Associazion nazionâl dai alpins (Ana) e i Scouts. Za te gnot dai 6 di Mai,
la Ana e vierzè la sede di Udin par coordenâ lis operazions di socors dai siei
iscrits. Il president nazionâl Franco Bertagnolli al rivà subit tes zonis
tocjadis dal sisme e, capide la gravitât de situazion, al domandà al consei
diretîf di istituî undis cantîrs di lavôr autonoms e autosuficients gjestîts de
Associazion. Ae fin di Mai si costituirin i grups di intervent metint adun lis
sezions nazionâls de Ana. De metât dal mês di Jugn ae metât di chel di
Setembar, plui di 15 mil alpins in congjêt a lavorarin intai cantîrs,
distribuîts tra Magnan, Buie, Glemone, Vile di Cjargne, Maian, Mueç, Osôf,
Cjavaç, Pinçan e Vedronze. A ripristinarin 76 edificis publics, a ripararin
passe 3 mil cjasis e 63 mil metris cuadrâts di cuvierts, a faserin voris di recupar
ambientâl e sistemazions idraulichis. In chel Istât la Ana e organizà la
campagne “Quest’anno le ferie degli Alpini in Friuli” e a rispuinderin pardabon
in tancj. La ativitât dai alpins e fo tant sensazionâl che il Congrès dai Stâts
Unîts i de ae Ana il compit di programâ i jutoris de Agency of International
Development (AID) par fâ sù scuelis e centris pai anzians.
Tai lûcs
dal disastri a rivarin ancje miârs di boy scouts che a fasevin part des dôs
associazions plui grandis, la AGESCI, catoliche, e la CNGEI, laiche. A rivarin
di dute Italie e de Europe, massime de Austrie, de Svuizare e dal Lussemburc. A
meterin in pîts i lôr centris di coordenament e a meterin a disposizion la lôr
esperience tal tirâ sù e gjestî lis tendopolis, furnidis di cusinis di cjamp e
di bagns mobii.
I scouts
de AGESCI a forin in dut 7.146, dividûts in doi moments diferents. Te prime
fase, dai 7 di Mai ai 30 di Jugn, dedicade pal plui ai socors, a rivarin tes
areis colpidis passe 3 mil zovins di 16 regjons. Te seconde, che e le indenant
fin ai 3 di Otubar, altris 4 mil. A garantirin in dut cuasi 40 mil zornadis di
lavôr. I intervents ju coordenavin sedi la centrâl operative, che e veve la
sede te parochie dal Cjarmin a Udin, in vie Aquilee, li che lis scuadris de
AGESCI a rivavin e si davin la volte, sedi i sîs cjamps base tal teritori, di
dulà che a partivin i volontaris par lâ tes localitâts taramotadis. Passade la
emergjence, la funzion dai scouts AGESCI e fo preziose ancje par tornâ a
stabilî il circuit sociâl, midiant di ativitâts di animazion che a vevin tant
che protagoniscj i fruts ospitâts intes tendopolis e intai insediaments
temporanis: tal Istât dal 1976 a vierzerin 24 centris estîfs par dâ acet ai
piçui e slontanâju di une realtât fate di maseriis e dolôr.
Ancje i
volontaris dal CNGEI a rivarin a miârs e a lavorarin de buinore dai 7 di Mai ai
30 di Avost, vuidâts dal centri di coordenament che al jere tes scuelis
elementârs di vie Caccia a Udin. Al cjamp principâl clamât “Campo Mandi” di
Scluse, si zontarin chei di Nimis, Maian, Faedis e Vasinis. Tal “Campo Mandi” a
rivarin ancje operaris de Lombardie, che a judarin a gjestî lis infrastruturis
a Scluse e tal Cjanâl di Racolane. La sezion taliane de FSE, la Federazion
scout di Europe, a pene nassude, si impegnà par fâ rivâ tes vals dal Nadison i
aiûts racuelts dal Comun di Rome.
Ancje la
Caritas si mobilità di corse. Lis glesiis locâls di dut il mont, coordenadis de
Caritas internazionâl, si derin di fâ par judâ lis popolazions tocjadis dal
sisme. Za ai 8 di Mai, la Caritas taliane e metè a disposizion dai taramotâts
furlans une grues contribût economic; la Caritas diocesane di Gjenue e mandà 30
tendons. Te prime domenie dopo de tragjedie, la Conference episcopâl taliane
(Cei) e invià une racuelte di fonts par finanziâ i prins intervents; cun di
plui, e ufrì la disponibilitât di tantis fameis prontis a dâur acet a di chei
che a jerin restâts cence cjase. Par che i aiûts a rivassin in maniere
costante, la Caritas e favorì il zimulâsi di diocesis talianis cun parochiis
cjapadis dal taramot. Si crearin ancje cjamps di lavôr par fâ rivâ volontaris
specializâts te edilizie, pronts a tornâ ai furlans un mês di lavôr.
Tal stes
timp, a Udin l’arcivescul Alfredo Battisti (viôt culì une interviste inedite) al istituive doi centris di
coordenament pai socors: un tal Arcivescovât, chel altri te Opare diocesane di
assistence (ODA) in vie Aquilee, e al sburtave i plevans «a meti a disposizion
i bêçs de vendite dai dons votîfs, no sometûts ae tutele de Sorintendence».
Bonsignôr Battisti ur domandà di persone a ducj i vescui dal Triveneto di mandâ
in Friûl tendis avonde grandis par podê ospitâ chês fameis restadis cence
cjase. Compagn a faserin a Triest, dulà che i sorestants de Federazion
universitarie catoliche taliane (Fuci) a derin dongje materiâi e adesions par
puartâ aiûts a Torlan, Cjalminis, Ramandul, Vilegnove, Montmaiôr, Platiscjis,
Debelis, Dartigne, Surnins, a Montenârs, te frazion di Sante Marie Madalene e a
Stele (Tarcint). Cun lôr al colaborà il moviment di zovins de Union dai
Istrians, un altri grup che al partecipà ae iniziative.
Ancje i
ambients catolics lombarts, massime il moviment Comunion e liberazion di pre
Luigi Giussani, a derin il lôr contribût. Su invît dal vescul Battisti, i
volontaris di Comunione e Liberazione, atîfs te ODA di Udin, a meterin in pîts
cjamps di socors e lavôr in nûf comuns disastrâts: Glemone, Tarcint, Buie,
Magnan, Mueç, Nimis, Resie, Taipane e Vençon. Dopo des scossis di Setembar a
vierzerin un centri di assistence a Lignan pai sfolâts. In chel moment i
volontaris di Comunione e Liberazione in Friûl a jerin cirche 2 mil: par numar,
a jerin il tierç grup plui grant daûr dai alpins de ANA e dai Scouts. Dopo dai
socors, a rivarin subit la fase de ricostruzion, in particolâr cu lis
cooperativis dal consorzi CoRAF, e de organizazion di iniziativis par dâ ai
zovins un segnâl di sperance. Ai 18 di Mai Antonio Villa, amì di pre Giussani e
canonic de glesie milanese di San Babile, al rivà a Tarcint par stâ cui
volontaris e organizâ la ativitât ricreative cu la realizazion di un istitût
scolastic. Don Villa, di in chê volte, nol le plui vie di Tarcint e dal Friûl.
La
mobilitazion dai volontaris e passà ancje lis barieris politichis. Il cuotidian
L’Unità, te edizion dai 8 di Mai, al contà cun cetante passion che «tancj
zovins de FGCI» a levin in Friûl adun cuntune colone di jutoris organizade de
Federazion turinese dal PCI che e jere partide di Settimo Torinese. Paolo
Guzzanti, invezit, tes pagjinis da «La Repubblica» dai 9 di Mai, al scrivè che
«i zovins cul façolet ros ator dal cuel» cun svangjis e sacs di durmî, che a
aderivin al Centri democratic di coordenament pal socors volontari, a forin
mandâts vie dal Friûl par vie che no ju volevin. «O vin cirût di jemplâ lis
mancjancis e lis lentecis dai aiûts uficiâi» al sclarì Toni Capuozzo, innomenât
gjornalist furlan che in chê volte al jere un esponent di Lotta continua. A
rivavin cussì tancj volontaris, massime tal câs di grups no organizâts, che i
sindics a scugnirin imponi regulis di gjestion. Il volontarisim al pues deventâ
un probleme,. «si à di meti un fren al rivâ caotic di personâl no cualificât»
al marcà Zamberletti.