La espression 'Model Friûl' e à tacât a cjapâ
pît cuant che, nancje cuindis agns dopo dal sisme, al jere aromai clâr a ducj che
la ricostruzion dal Friûl taramotât e jere rivade cuasi insom. La peraule
'model' e varès di riferîsi a une esperience di podê ripeti, ma plui al passe
il timp, plui il Model Friûl, par chel che al inten il frontâ une emergjence e
une rinassite dopo dal taramot, al pâr impussibil di ripeti, leât a cundizions
che no si puedin riprodusi, e che in ogni câs no si son viodudis tai taramots
de Irpinie (1980) e di L'Aquila (2009), i unics che par entitât e dams si
puedin comparâ cun chel dal Friûl dal 1976.
Fra lis diviersis componentis dal Model Friûl, l’element
che dopo cincuante agns al colpìs di plui al è il decentrament che, a diviers
nivei, al à permetût di metilu in vore. Dal pont di viste legjislatîf e
aministratîf, il Stât i de ae gnove Regjon une autonomie plene e reâl; l'ent
regjonâl, po, al assegnà ai Comuns une serie di responsabilitâts e funzions
cussì grandis e numerosis che vuê a saressin impensabilis, de preparazion dai
Plans urbanistics detaiâts ae gjestion dai sussidis pe edilizie privade. E je
stade duncje une ricostruzion pardabon 'dal bas' che, inte storie di un Stât
centralist par struture e tradizion, e à rapresentât un esempli cuasi unic e di
sucès tal cjamp de sussidiarietât regjonâl.
Se si lu intint intun sens plui slargjât, che al fâs capî
miôr ce che al è sucedût, il Model Friûl al jere dut câs animât di une
straordenarie unitât di fins, sburtade di un sens fuart di apartignince ae
proprie tiere, li che plui parts de societât furlane a àn contribuît: la
Glesie, sedi cu lis jerarchiis, sedi cui predis des parochiis, i inteletuâi, i
moviments e i partîts politics, i sindicâts, e dongje di lôr lis classis
dirigjentis aministrativis, economichis e politichis.
No pardut, e no in ducj i ambits, il Model Friûl al à
funzionât o al à vût i miôr risultâts. Sot l’aspiet urbanistic, la sielte di
ricostruî 'cemût che al jere, dulà che al jere' e à vût risultâts discompagns,
plui preseabii tai piçui borcs storics e mancul tes zonis di fûr di chei. Cun
di plui, no si rivà a coordenâ ben la progjetualitât dal dopo taramot cul Plan
urbanistic regjonâl gjenerâl che si jere daûr a fâ bon propit intai mês dal
sisme. Par ultin, al è just domandâsi se la esperience straordenarie dal dopo
1976 e sedi stade valorizade come che si dêf inte vite aministrative de Regjon
e dai comuns.