Il sisme
al à cjapât une aree di cirche 5.500 chilometris cuadrâts de medie val dal
Tiliment e al à distrut 137 comuns, massime des provinciis di Udin e Pordenon, tocjant
in dut une popolazion di plui o mancul 500 mil abitants.
La gnot
dai 6 di Mai i socoridôrs si cjatarin denant di un paisaç disastrât, fat di
cjasis sdrumadis, muarts e ferîts. Lis primis colonis di socors a partirin
subit: dôs oris dopo de scosse i militârs a jerin za rivâts in diviersis
localitâts. Centenârs di zovins di dute la regjon a rivarin di corse e cun ogni
mieç tai lûcs colpîts, ancje a pît se lis stradis a jerin interotis. Sul puest
si meterin adun scuadris coordenadis dai sindics, fatis di vigjii dal fûc, dal
esercit, dai alpins. Prin di dut si veve di individuâ e assisti i ferîts, po
dopo di meti in sigurece lis cjasis e netâ lis stradis. I prins socors a forin
svelts, ma, come che al jere inevitabil, pôc organizâts, ancje parcè che dutis
lis liniis eletrichis e telefonichis a jerins vuastis. Dome vie pe gnot,
graciis ai radioamadôrs, si rivà a capî la dimension dal dam e il nivel di
distruzion provocât dal sisme.
Ai 7 di
Mai al rivà a Udin Giuseppe Zamberletti, nomenât Comissari straordenari dal
president dal Consei di in chê volte, Aldo Moro, daûr di ce che e previodeve la
leç 996/1970. Il guvier regjonâl e i sindics dai comuns tocjâts dal taramot a
lavorarin in sinergjie cul Comissari: il prin coordenament dai socors lu
assegnarin ai vigjii dal fûc, che a vevin za colaborât tal 1970 par programâ i
socors e la assistence aes popolazions vitimis di calamitâts. A spartirin lis
diferentis scuadris, a tacarin a dâ fûr mangjative, struments di cure, bens di
confuart, daûr des tabelis e des mapis picjadis te prefeture di Udin, li che a
jerin segnâts i comuns danezâts e trops miedis, ambulancis, medisinis, tendis,
aliments e vistîts che a coventavin. Fin dal prin moment, si vevin di garantî
passe 70 mil pascj par dì.
Ancje la
Crôs rosse taliane (Cri) e la Crôs verde di Turin si meterin in vore subit. Za
te gnot tra i 6 e i 7 di Mai il diretôr gjenerâl de Cri al rivà a Udin, ativant
daurman i comitâts e i sotcomitâts de associazion, inviant une racuelte di
fonts e alertant i Centris di mobilitazion dai Cuarps militârs e des
infermieris volontariis. Di Milan, Vignesie, Bergamo e Turin a partirin
ambulancis, camions frigorifar e altris plens di tendis, cuviertis e jetuts di
cjamp. A partirin ancje 30 roulottes grandis, di chês che a podevin traspuartâ
plasme e medisinis, soredut insuline, sîrs e vacinis. Intai trê dîs dopo dal
taramot i sanitaris de Cri a vacinarin cuasi 90 mil personis e, midiant di une
convenzion firmade cu la Regjon, a organizarin la distribuzion e la consegne
dai materiâi di prime necessitât intai comuns plui colpîts. In dute Italie la
Cri e metè sù dipuesits di aliments a lungje conservazion, pronts di dâ fûr, A
soterarin i muarts par che no si spandessin epidemiis e il personâl de Crôs
rosse, in colaborazion cul ministeri dal Interni, al schedà i muarts, i
dispierdûts e i ferîts.
Intai
dîs dopo dal taramot a rivarin miedis e personâl specializât ancje di chês
altris regjons: la comunitât e ve garantide daurman une prime assistence
sanitarie. Cuasi mil vigjii dal fûc si derin la volte tal teritori, e cun lôr
miârs di zovins volontaris: di chescj, 7000 a jerin scouts. I uficiâi dal Cuarp
nazionâl dai vigjii dal fûc a controlarin cun centenârs di mieçs la tignude e
la pussibilitât di meti in sigurece lis struturis che a vevin patît dams par
vie des scossis. Cundut che si saveve che la regjon e veve un nivel di
sismicitât alt, tancj dai comuns tocjâts, e tra chei Buie, Glemone e Osôf, no
jerin mai stâts classificâts come sismics. Al fo clâr subit che di là dai dams
al patrimoni edilizi abitatîf, chei al tiessût industriâl a riscjavin di butâ
in crisi fonde il teritori: plui di 15 mil lavoradôrs a varessin pierdût il lôr
puest in fabriche.
Zamberletti
al varès ricuardât cun chestis peraulis lis dificoltâts dal prin moment: «Ancje
se lis Prefeturis, e in particolâr chê di Udin, a jerin un pont di riferiment
naturâl, la mancjance o la imprecision des informazions su la reâl dimension
dal event e la sô estension teritoriâl a forin ae fonde des dificoltâts e de
confusion de prime ore. In graciis de presince te zone (par motîfs dal dut
diferents) di numerôs contingjents des Fuarcis Armadis, il probleme nol fo tant
chel di fâ rivâ di corse lis struturis operativis, ma di no savê ben tal
principi dulà mandâ lis colonis di socors che a rivavin e ce criteris doprâ pe
lôr distribuzion. […] Dal moment che mi soi insediât te Prefeture di Udin, o ai
scugnût duncje imagjinâ cun grande rapiditât il senari operatîf che al
coventave sedi par riorganizâ il caos iniziâl […]».
In
mancul di un mês a forin tiradis sù 252 tendopolis, po ridusudis a 184, par un
totâl di 17 mil tendis cui relatîfs servizis igjienics, corint eletriche e
furniment idric. A chestis si zontarin un miâr di ponts plui piçui sparniçâts
tal teritori: in dut a forin creâts passe 116 mil puescj jet. Te prime fase si
sielzè di prontâ tendopolis invezit che mandâ vie la int di corse, e no dome pe
volontât popolâr di restâ in zone e fâ in mût che i paîs no si disvuedassin, ma
ancje parcè che in chel moment no si vevin dâts sui nivei di ricetivitât des
zonis de cueste. Cul passâ dai dîs e cu lis scossis di assestament che a levin
indenant, si cjapà cussience dal fat che la soluzion miôr e sarès stade chê di
tirâ sù lis tendopolis in areis siguris, lontan di struturis ediliziis che a
vevin patît dams. Si butarin jù plui di 2 mil edificis malsigûrs, cjapât dentri
ancje cualchi grant manufat, sdrumât cui esplosîfs; si puartà vie ce che al
restave des cjasis distrutis, dai toblâts, des stalis, si netarin lis maseriis
che a jemplavin lis viis e i centris storics, si comedarin la rêt eletriche,
chê idriche e lis fognaduris.
I numars
di cheste prime fase di intervent a son emblematics: si tornà a meti in sest
314 km di viabilitât, a costruî 8 puints, si tirà vie plui di 1 milion 800 mil
metris cubis di maseriis e 540 di slacs. A forin impleâts passe 14 mil soldâts
e dadis fûr 64 toneladis di medisinis, si doprarin 2.600 machinis, almancul 216
cusinis di cjamp, 60 cistiernis di aghe e un numar compagn di ambulancis, 430
autocistiernis, desenis di bagns complets di cjamp; si doprarin ancje 64
elicotars, par garantî che paîs intîrs no restassin isolâts, massime te alte
Cjargne.
Il
contribût e il supuart des fuarcis armadis forestis a forin determinants:
svuizars, todescs, austriacs, francês, americans e canadês: di chescj ultins o
ricuardìn il cjapitani pilote Ronald Mc Bride, colât jù cul elicotar te val dal
Leâl, tal comun di Trasaghis, intant di une operazion di socors. La
Aeronautiche militâr e sigurà un puint di avions, la Marine militâr invezit e
mandà uns elicotars di La Spezie e di Ancone; di Taranto e rivà la nâf Grado,
direte a Triest. Za te gnot dai 6 di Mai, la Marine e veve mobilitât la colone
mobile dal Grup operatîf incursôrs di COMSUBIN e l’ospedâl militâr maritim di
La Spezie Bruno Falcomatà cul so ospedâl di cjamp, che a montarin a Buie e che
al fo indispensabil par podê assisti i ferîts. Ancje lis cusinis mobilis dal
Grup operatîf incursôrs a furnirin un servizi essenziâl: i cogos a preparavin
1200 pascj ogni dì pai ricoverâts e par ducj chei che no jerin in stât di
proviodi par se e pes lôr fameis.
Tor la
fin dal mês di Jugn sedi la ativitât economiche che chê industriâl a tacarin a
ripiâsi, massime in gracie dai finanziaments regjonâi: tancj stabiliments a
tornarin a inviâ la lôr ativitât, judâts dal fat che la Regjon e jere
intervignude tai setôrs de riprese economiche e produtive, te edilizie publiche
e scolastiche, te promozion dal setôr agricul e zootecnic, fintremai te
valorizazion turistiche dal Friûl. Lis criticitâts sanitariis aromai a jerin
sot control, i servizis, la viabilitât stradâl, lis comunicazions telefonichis,
telegrafichis e postâls a jerin stadis ripristinadis, compagn che la
distribuzion de aghe potabile e de energjie eletriche.
Vie pal
Istât, duncje, al pareve che la situazion si fos stabilizade: la machine dal
socors e de assistence e jere colaudade, colegade ai Cos e ai centris operatîfs
des diviersis fuarcis. La prime fase dal impat cul sisme e cui siei efiets su
la popolazion e sul teritori e finì ai 25 di Lui, cuant che il Comissari
straordenari al lassà il Friûl; il sfuarç al jere stât impressionant, ancje in
tiermins di vitis umanis tra i socoridôrs civîi e militârs e i lavoradôrs che a
vevin operât intal moment critic. Te seconde fase, invezit, si viodè di chei
restâts cence cjase, ospitâts tes tendis e tes roulottes, e si tacà a riparâ i
edificis.