La
popolazion e acetà cun dissipline e cun sens dal dovê l'esodi dal Setembar dal
1976 tes localitâts turistichis, e lis cundizions di vite griviis tai abitâts
temporanis: lis reazions di proteste a forin pocjis e limitadis a situazions di
dificoltât specifichis. La diaspore che si temeve tant no si inverà; dome une
piçule percentuâl e partì bande i lûcs tradizionâi de emigrazion e ducj, o
cuasi ducj, a saressin tornâts tai lôr paîs di divignince, ancje se dome par
ocupâ i prefabricâts discomuts. L'“esili” al veve durât uns sîs mês.
Te
Vierte dal 1977 a jerin in costruzion, e une part a jerin za finîts, uns 400 borcs
cun 25 mil abitazions prefabricadis di cirche 35 metris cuadris, che ognidune e
podeve dâur acet a trê o cuatri personis.
De Jugoslavie a rivarin in plui paîs, par esempli a Dogne, lis cjasutis
prefabricadis de dite Krivaja, in dôs tipologjiis di 36 e 53 m2, che
a vignirin montadis dai operaris de dite e che a saran une vore preseadis. Ae
fin de ricostruzion un pôcs di borcs prefabricâts no saran disfats ma ben
destinât ai turiscj o doprâts tant che abitazions.
Lis
roulottes che a vevin coventât te prime emergjence a forin riconsegnadis ai
proprietaris, cuasi simpri in cundizions plui che buinis, dispès cuntun
ringraciament special de bande des personis che lis vevin dopradis par un an
cirche: un macet di rosis frescjis. Dîs agns dopo, finide la ricostruzion,
ancje i insediaments provisoris a saressin stâts dismantelâts de Regjon, che e disbratà
e bonificà lis areis ocupadis e e paià une indenizazion ai proprietaris dai
terens.
Tai 60
“Centris des comunitâts” logâts in dutis lis localitâts principâls colpidis a
forin metûts prefabricâts cuntune sale, dôs stanziis e un magazen. A jerin
struturis polivalentis dulà che i fruts a podevin cjatâsi par studiâ e i adults
vê assistence, discuti, partecipâ a events coletîfs o dome stâ in compagnie. Ancje
ai uficis comunâi ur fo dade une sede provisorie e, dulà che a mancjavin, si
furnirin aulis pe ativitât scolastiche.
Tai prins
insediaments provisoris, bielzà tai prins dîs dal Mai dal ‘76, a jerin nassûts
i Comitâts des tendopolis che a cjatarin formis di colegament cu la solidarietât
dal volontariât, des donazions privadis, dai socors istituzionâi. Il Centri
operatîf di Maian – che par Zamberletti al varès fat di model par organizâ la
Protezion civîl taliane fondade tal principi dai agns Otante – al fo gjestît di
volontaris che a davin fûr a dute la popolazion taramotade i bens di prime
necessitât, rivâts in pôcs dîs tai magazens dal Comun.
La solidarietât pandude vie
pal Istât e pe Sierade dal 1976 e tal Invier dopo (tal timp de emergjence e dal
esodi) tes tendopolis ocupadis dai taramotâts, e fo il fatôr di agregazion che
al fasè nassi un “moviment di base”: al cjapà forme un vêr laboratori sociâl
che al anticipà modei di partecipazion popolâr che si saressin realizadis tant
timp dopo. A nasserin i Comitâts spontanis des tendopolis, il Comitât di
coordenament des tendopolis (che a operavin ancje tes localitâts dal esodi), e
il Comitât di coordenament dai paîs taramotâts, organisims che a cjatarin vôs eespression tal «Boletin des tendopolis» e tal «Boletin dal Comitât di
coordenament», dâts fûr ogni dì tai paîs, tra i taramotâts, che si zontarin ai
boletins des parochiis.
Manifescj, ciclostilâts,
volantins, verbâi des riunions, dute la produzion di chei mês ingredeâts le
metè adun un ferovîr, Francesco Gubiani, e vuê e je conservade te Biblioteche Civiche “Don Valentino Baldissera” di Glemone. Invezit, tantis testemoneancis
orâls e scritis a son stadis cjapadis sù e publicadis dal fotograf Igor Londero.
La int in chei mês e deventà
pardabon protagoniste e, tal impegn cuotidian, lis comunitâts tai insediaments
provisoris a rivarin a tornâ a insaldâsi. Cheste esperience impuartante di
agregazion sociâl e fo sigûr favoride de sielte di fâ sù lis tendopolis intes
zonis dongje des cjasis e dai paîs sdrumâts, garantint cussì la continuitât cun
chel leam fisic, visîf, percetîf e sociâl che lis personis sorevivudis a
volevin mantignî cui ambients de lôr vite, cul borc e cul paisut, tornant cussì
a elaborâ la fuarce e la cualitât dai "microcosmis antîcs" che a son
in chescj teritoris: la int e superà la esperience dramatiche dal taramot cul
creâ alc che in chel Istât al varès fat nassi une piçule ma significative
stagjon di democrazie partecipative.
Te vite des comunitâts e
veve une part centrâl la Glesie furlane, vuidade dal vescul Alfredo Battisti: i
predis furlans des glesiis e des parochiis si confermarin lis colonis de vite
de comunitât e a vevin il lôr orghin di coordenament tal gjornâl de diocesi, «La
Vita Cattolica», diret di pre Duili Corgnali. Tal mieç des dificoltâts, dopo
dal corot pes tantis vitimis, a tornavin a tacâ lis ativitâts des parochiis, i
plevans si dividevin fra chei che a jerin restâts sul puest e chei che a vevin
scugnût partî, la vite pastorâl e lave indevant a segnâ, daûr de tradizion, il
ritmi de vite tai paîs. Lis tantis muiniis, tes tendopolis o tes localitâts
dulà che i taramotâts a passavin l'Invier, a fasevin un lavôr inestimabil. A
nassevin grups di volontaris par supuartâ i Comitâts comunâi pe assistence e la
ricostruzion.
E
jere une Glesie in grant mudament, chê furlane, che e rivendicave in ogni
ocasion il so leam strent cu la tiere e cu la int, par esempli cul domandâ di
podê celebrâ la messe in lenghe furlane. Cualchi an prime, tal 1968, la Mozion
dai 529 plevans e veve denunziât, cuntun document che al veve causât une vore
di discussions, la plaie ancjemò vive de emigrazion e il dam che lis servitûts
militârs i vevin fat al teritori. E fo la Glesie furlane, ven a stâi il
clericât plui dongje de int, a dâ fûr il sproc che al varès segnât la strade de
ricostruzion: "prime lis cjasis e po lis glesiis".
La
vision di un Friûl imobil, di une societât blocade te tradizion e te
conservazion, duncje, e je la plui lontane de realtât che si pues imagjinâ.
Come tal rest de Italie, ancje la societât furlane e jere daûr a sperimentâ, za
prin dal Mai dal 1976, lis tensions di une modernizazion che, ancje se cun
cualchi an di ritart a pet di altris zonis dal Paîs, a metât dai agns Setante e
lave aromai indevant svelte. Fra i elements za in moviment a jerin un gnûf rûl
pes feminis intal mont dal lavôr, la disintegrazion dal model di relazions de
vecje famee contadine, la cressite de istruzion tes gjenerazions plui zovinis.
Intes comunitâts dai "insediaments provisoris", te reazion de Regjon
ae tragjedie, tes trasformazions che si profilavin cu la ricostruzion, vieri e
gnûf si misturavin, come tal rest de Italie.
Un
altri element che al animà la vite des comunitâts al fo il grup sociâl di
zovins furlans impegnâts tai studis universitaris a Triest, Padue, Vignesie,
Bologne, Florence, Milan. E jere la prime gjenerazion rivade ae universitât di
masse, che e veve vivût lis manifestazions, lis grandis protestis dal mont
universitari talian daspò dal '68 e dal '69. Il lôr impegn si zontave a chel
dai volontaris di Comunione e Liberazione, di Lotta Continua o di Democrazia
Proletaria, dai scout, dai ‘fûr di trop’ o dai alpins in congjêt za ricuardâts:
dutis chestis animis diferentis si saldarin intune cui dibatits e lis
discussions, lis predicjis in glesie, i sfueis ciclostilâts, i moments di
agregazion sociâl dai doposcuele, des ostariis che a tornavin a vivi tes tendis
e tes barachis, des ocasions di cjatâsi tai gnûfs puescj de vite in comun: il
lavadôr, la fontane, la mense, il dormitori, il centri sociâl, la buteghe, il
viaç in coriere par lâ ogni dì a lavorâ.
Chescj zovins a puartavin tes tendopolis stimui gnûfs, une
vision vierte de Italie, dispès ancje une critiche fuarte inviers de politiche
"alte," chê dai partîts e di Rome. Adun cui students simpri plui
numerôs des scuelis superiôrs de provincie, chescj fîs dal baby boom a
judarin cun fuarce a trasformâ la vite des tendopolis intune esperience di
comunitât che e varès segnât la memorie individuâl e coletive dal taramot.
La stesse volontât popolâr di fâ nassi une Universitât publiche cun sede in Friûl e fo la espression direte di chel impegn e des
tantis firmis cjapadis sù tes tendis dai taramotâts. No cate i corots, lis
cundizions dificilis e l'esodi, la domande di tornâ a promovi il sfuarç par
creâ la Universitât, tacât un pâr di agns prime, e vignive dai stes taramotâts.
Ai 10 di Lui, ancje tra lis tendopolis si cjaparin sù in dut 125 mil firmis, e
cussì, ai 11 di Avost dal 1976, e fo presentade ae Cjamare dai deputâts la
propueste di leç di iniziative popolâr par istituî la Universitât statâl dal
Friûl. Dut câs, al fo dome cu la leç su la “Ricostruzion” che la Universitât
statâl di Udin e fo istituide, scomençant cul an academic 1977-1978. Il gnûf
ateneu al contribuì al progrès civîl, sociâl e ae rinassite economiche dal
Friûl, deventant un strument organic di svilup e di rinovament di filons
origjinâi de culture, de lenghe, des tradizions e de storie dal Friûl.
Ai 30 di Avrîl dal 1977 si declarà sierade la emergjence, ma
al coventave dâur ai furlans une abitazion, ancje se no corispuindeve inmò a chê
de lôr cjase ricostruide: il tiessût insediatîf al contave uns vincj modei
diferents di prefabricâts, metûts sù dongje dai vagons feroviaris, dai box di
lamiere, des roulottes o des barachis fatis sù di bessôi.
Intant che si jere ancjemò daûr a prontâ i
prefabricâts, la Regjon autonome Friûl-Vignesie Julie e mandà fûr la leç 30 dai 20 di Jugn dal 1977, fate buine dal Parlament (leç 546 dai 8 di Avost dal 1977),
che e introduseve gnovis proceduris pal recupar static e funzionâl dai edificis
colpîts dai events telurics; plui indevant, cu la L.R. 63 (fate buine ai 23 di
Dicembar dal 1977), la Regjon e fissà lis liniis gjenerâls de gnove fase dal
dopo taramot, inviant i intervents. Al jere aromai clâr par ducj che la
ricostruzion no si podeve ni si veve di improvisâ.
G. Vergani, I
terremotati in esilio al mare, in «Corriere d’informazione»,
14 settembre 1976; M. Durand, La popolazione abbandona il Friuli squassato
da ripetute catastrofiche scosse di terremoto: La popolazione del Friuli fugge
verso il mare, in «Corriere della Sera», 16 settembre 1976; G. Verbi, Ordine di requisire le case per accogliere i
terremotati, in «Il Piccolo», 25 settembre 1976; F. Severo Severi, Il
richiamo del Commissario straordinario nel Friuli terremotato, in «Le
Regioni»,1/2 (1977), pp. 44-73; D. Corgnali, L’ultimo
Friuli. Dieci anni di storia friulana,
Udine, La nuova base 1988; L. Di Sopra, Il
modello Friuli gestione dell'emergenza e ricostruzione del Friuli dopo il sisma
del 1976, Udine, Amministrazione provinciale
1998; V. Meloni, La prima
e le altre scosse, Udine, Società Veneta Editrice 1989; V. Meloni,
L’ultima
scossa. Esodo e ritorno, Udine, Società Veneta Editrice 1989; P. Gava, Friuli, quando l’Italia si scoprì capace d’aiuto,
«Italia Caritas», 4, maggio 2006, pp. 17-21; A. Battisti, Le confessioni di un vescovo, Pasian di
Prato, Lithostampa 2012; G. Baiutti - F. Dominici (a cura
di), Atti e
documenti sulla ricostruzione delle zone terremotate del Friuli,
Trieste, Consiglio regionale del Friuli Venezia Giulia 2016; C.
Brusini, Terremoto Friuli 1976, quelle case
espropriate per ricostruire tutto com’era e dov’era prima. E evitare le new
town, in «Il Fatto quotidiano», 5 maggio
2016; G. Ellero, Il Friuli Modello
1976-2016, Pasian di Prato (UD), Lithostampa 2016; G. Zamberletti, Friuli 1976: la gestione dell’emergenza tra i
terremoti di maggio e di settembre, in «Bollettino di Geofisica Teorica ed
Applicata», vol. 60, suppl. 1 (2019), pp. s9-s16; G.
Pellizzari, Il terremoto in Friuli. Il risveglio dell’Orcolat, Udine,
Gaspari 2021; T. Petracco, La lotta per l’’università friulana, Udine,
Forum 2022.