Planificazion teritoriâl e urbane

Cuant che si fevele dal sucès de ricostruzion dal dopo taramot in Friûl, tancj osservadôrs e in pratiche ducj i protagoniscj a concuardin sul fat che la urbanistiche, intindude tant che vision slargjade dal teritori e no confinade ae dimension de citât, e ve un rûl fondamentâl: «Il model Friûl al è soredut un model urbanistic, e al postule la conferme e la metude in sigurece dal implant urban za esistent e no il so abandon (D. Carpenedo)».

La Provincie di Udin, prin de scosse dal Mai dal 1976, e presentave su chest cont cualchi aspiet particolâr. Prin di dut, si à di ricuardâ il precedent, là che a vevin coventât, dai Plans detaiâts di ricostruzion dopo de Seconde vuere mondiâl, dulà che si veve za discutût de alternative tra vecjo e gnûf. Rispiet a altris regjons, si à di tignî cont dal fat che, in gracie de leç regjonâl di pueste che e previodeve il so finanziament (leç regjonâl n. 12 dai 14 di Jugn dal 1967), cuasi ducj i Comuns che a saressin stâts tocjâts dal event a vevin un strument urbanistic comunâl aprovât, o almancul adotât. Si tratave pal plui dome di Programs di fabricazion, che però a vevin dentri cualchi orientament gjenerâl di organizazion dal teritori comunâl.

La metât dai agns Sessante e fo il moment storic cu lis discussions plui vivarosis su la necessitât di une planificazion teritoriâl intune Italie in fuarte trasformazion economiche e demografiche. A chei stes agns, e rimonte ancje la decision de gnove Regjon a statût speciâl di indotâsi di un Plan urbanistic regjonâl (Leç regjonâl n. 17 dai 27 di Avost dal 1965): si fevelà a lunc su cemût che si varès vût di componi e formâ lis normis, tant che pôc prin dal taramot, tal Avrîl dal 1976, il Plan Urbanistic Regjonâl Gjenerâl (PURG) nol jere stât ancjemò fat bon. Dut câs, il progjet, fondât suntune grande cuantitât di indagjins cognossitivis, al cjapave dentri une serie di informazions su servizis e distribuzion dai centris urbans tal teritori che a tornaran utilis par inzornâ i struments urbanistics locâi.

Un pas fondamentâl pal procès di struturazion urbanistiche dal teritori si lu fasè subit dopo de prime scosse, cu la leç regjonâl n. 33dai 21 di Lui dal 1976 che, cul disponi il reperiment des areis par intervents urgjents, e fissà l'orientament gjenerâl de ricostruzion dai centris storics disdrumâts. Prin di dut (articul 2) e disponeve di adotâ la «perimetrazion – cu la preparazion simultanie des normis ediliziis transitoriis – dai nuclis urbans disdrumâts dulà che si calcole che al coventi meti in vore la ricostruzion midiant di Plans detaiâts fats di pueste». Al è stât significatîf, al à notât l’architet Giorgio Dri, che, intant che tes tendopolis si sintive par ogni cjanton il sproc 'des tendis aes cjasis', pôc plui di doi mês dopo dal taramot, invezit, «il legjislatôr regjonâl al vedi vût la luciditât di capî che al coventave pensâ a gnûfs insediaments abitatîfs par dâ acet aes personis restadis cence cjase [...] e di introdusi l'ûs de planificazion atuative par dâ ordin e logjiche insediative ae ricostruzion fisiche dai edificis disdrumâts o butâts jù par efiet dal sisme».

Duncje, cemût che al è stât za evidenziât, e fo la leç regjonâl n. 63 dai 23 di Dicembar dal 1977, a dâ lis normis plui specifichis di nature urbanistiche. I siei contignûts a jerin svariâts: in pôcs e curts articui a jerin tratâts argoments tant che i Plans comprensoriâi di ricostruzion, lis proceduris di revision dai struments urbanistics in vore, i Plans detaiâts dai aglomerâts urbans distruts o che a vevin patît dams e cemût che si varès vût di metiju in vore. In plui, si semplificarin lis proceduris par aprovâ chei plans che a jerin calcolâts proviodiments improrogabii e urgjents.

Di fat, cence un dissen teritoriâl complessîf, o ben un orientament strategjic gjenerâl, a vevin vie libare, pai centris edificâts distruts, i Plans detaiâts elaborâts dai Comuns che, fin di subit, a doprarin come filosofie gjenerâl chê dal sproc 'cemût che al jere, li che al jere'. Scrit cul supuart di professioniscj, il gnûf dissen locâl dal asset urbanistic si fasè cun mecanisims origjinâi di partecipazion ‘dal bas’: «il Consei Comunâl», al ricuardà dopo Giovanni Pietro Nimis, l’architet responsabil de ricostruzion dal centri storic di Glemone, «nol deliberave prime che lis assembleis dai citadins no vessin dât un consens avonde larc». Dut câs, si falarès tal calcolâ i Plans detaiâts tant che une sorte di conzelament antistoric di une situazion arcaiche: te dialetiche de distribuzion dai spazis, dulà che al coventave conciliâ lis necessitâts coletivis (viabilitât, servizis publics) e lis dibisugnis subietivis, si tornarin a dissegnâ lis proprietâts e a discuti i dirits, cun implicazions patrimoniâls e familiârs par nuie margjinâls.

In pratiche, la responsabilitât assegnade ai Comuns di cjapâ sù il caric de ricostruzion e ve ancje un ledrôs de medaie. Cul incentivâ la espansion edilizie a spesis des zonis agriculis, «e darà sburt al straçament dai terens rinfuarçant la division in piçui lots di cjamps, orts e braidis, e la passion ambigue, schizoide, moderne pes vilutis isoladis» (G.P. Nimis).

Al è dificil dâ un judizi complessîf e definitîf su la eficacitât di chest sisteme dulà che, in mancjance di regulis gjenerâls, la piramide jerarchiche e fo ribaltade. La framentazion decisionâl e puartà a esperiencis une vore diferentis, e dongje di Plans detaiâts limitâts a pocjis unitâts di abitazion a 'nd jerin altris slargjâts a dut il centri urban, cun risultâts urbanistics (e a cjadene, architetonics) diferents, plui che lodevui in cualchi câs, cence dubi mendôs in altris. La cumbinazion di chest procès cu la grande libertât lassade ai singui e à vût tant che risultât, almancul par Glemone, «un 'planificâ su se stes' che al funzionà une vore ben dal pont di viste de cuantitât ricostruide [e de velocitât de ricostruzion, al vignarès di zontâ] ma chest al sucedè cence une vision comun e al menà ae creazion di un ecès di insediaments che al sveltì lis tindincis individualistichis di une urbanizazion slargjade e cence control» (P. Valle).

Dongje di chescj struments legjislatîfs, finide la fase de emergjence post taramot, ai 5 di Mai dal 1978 si cjapà sù il Plan Urbanistic Gjenerâl Regjonâl (fat bon ai 15 di Setembar dal 1978), il prin esempli in Italie di planificazion regjonâl in scjale grande. Tal timp, dut câs, il so impat su lis dinamichis de ricostruzion al sarès stât une vore limitât: la preminence de planificazion comunâl, che e restà salde par ducj i dîs agns de ricostruzion, rispiet al strument dal Plan comprensoriâl su scjale superiôr (za previodût de leç n. 63 dai 23 di Dicembar dal 1977), e comprometè il so dissen iniziâl. L’argoment al fo dibatût te 'Conference regjonâl sul teritori' organizade a Udin dai 5 ai 6 di Jugn dal 1981, li che si censirin i Comuns che a vevin adeguât i lôr plans regoladôrs al PURG dal 1978: al risultave che dome pôc plui di un tierç (82 di 219) a jerin conformis. Par ducj i agns Otante, i Comuns a lerin indevant cu la revision smirade dai plans metûts in vore intant che si spietave la prime ricostruzion, midiant dai struments previodûts des modifichis puntuâls o di assestament. Dome tal 1991, cu la leç regjonâl n. 52 dai 19 di Novembar dal 1991, la planificazion urbanistiche e teritoriâl e fo revisionade e modificade in maniere definitive.

La valutazion complessive de gjestion urbanistiche dal taramot dal Friûl dal 1976 e je, cemût che in part si à za dit, ancjemò argoment di studi e di discussion. Compagn che in altris localitâts dal Nordest, ancje tal Friûl culinâr e pedemontan si son disvilupâts chei procès di urbanizazion rapide e slargjade tipics di zonis economichis cuntune fuarte difusion di impresis piçulis e une vore piçulis. Lis azions dai Comuns e i struments regjonâi metûts in vore intes zonis sdrumadis o sdrumadis in part no jerin concepîts, ni aplicâts par fermâ chest gjenar di evoluzion dal teritori, sedi par vie che si veve pocje cussience de dinamiche, sedi parcè che une vere sensibilitât su cheste cuistion, ven a stâi la trasformazion in tiermins di fat metropolitans dal teritori, e jere svilupade pôc o nuie. Il 'cemût che al jere, li che al jere' al implicà duncje ancje il pericul di esponi il teritori storic furlan a chê espansion disordenade che cun dute probabilitât e sarès sucedude istès.