Il Friûl al ringracie e nol dismentee

La solidarietât viers dal Friûl e fo imediade, i socors e il supuart economic a rivarin di dut il mont. Bielzà inte gnot tra i 6 e i 7 di Mai la Crôs Rosse Taliane, in plui di vê mandât lis colonis di socors, e scomençà a cjapâ sù fonts pes zonis colpidis dal taramot.

Autoritâts talianis e forestis a lerin tes zonis taramotadis, puartant no dome solidarietât ma ancje un jutori concret. Tra chestis, ai 13 di Mai a Osôf, il vicepresident american Nelson Rockefeller al garantì il supuart dai Stâts Unîts e dal president di chê volte, Gerald Ford.  In pôc timp, il Congrès al destinà 25 milions di dolars, cirche 21 miliarts di liris, e une sume compagne l’an dopo, dâts fûr de Agjenzie dai Stâts Unîts pal disvilup internazionâl (AID) e destinâts par fâ sù scuelis e cjasis di polse pai anzians. Ai 22 di Mai, ancje il president da Comission europeane, François-Savier Ortoli, al butà jù un plan di intervents che il Parlament european al fasè bon doi mês dopo.

Tal prin an dal sisme a rivarin dal forest in dut cirche 100 miliarts di liris, cjapâts dentri i materiâi e i machinaris doprâts tai intervents dai cuarps militârs forescj, che po a vignirin lassâts sul puest. In cheste corse di solidarietât a risaltarin soredut i Paîs dongje. Il guvier austriac al dopleà la sume cjapade sù dai privâts, puartantle a 5 miliarts di liris. Il guvier di Belgrât al stanzià 2 miliarts e 800 milions di liris par mandâ cjasis prefabricadis e roulottes, a chescj si zontarin 700 milions di donazions privadis. Aiûts gjenerôs a rivarin de Gjermanie ocidentâl e de Svuizare, dulà che a lavoravin tancj furlans emigrâts, ma ancje de Norvegje: il so guvier al donà plui di 250 cjasis prefabricadis, destinadis pal plui a Dalès, par un valôr di 630 milions di liris. De Arabie Saudite a rivarin adiriture 5 milions di dolars (cuasi 4 miliarts e mieç di liris): tra i paîs extraeuropeans dome i Stâts Unîts i rivarin denant par gjenerositât.

Lis donazions dal Canadà e de Australie a forin pal plui di privâts. In Canadà cuasi ducj i aiûts a jerin organizâts dal National Congress of Italian Canadian Foundation, che al rivà a meti dongje 4 milions di dolars: al è cun chescj bêçs che a saran fatis sù la Borgade Canadà a Forgjarie e dôs cjasis pai anzians a Taipane e a Bordan. In Australie il guvier al assegnà 250 milions di liris pe costruzion dai asîi di infanzie, in plui l’Australian Committee for Italian Earthquake Fund al cjapà sù 950 milions di liris. La machine internazionâl dai aiûts e podeve fâ cont sul supuart des associazions locâls peadis al Friûl: i Fogolârs Furlans e lis Fameis Furlanis.

La Crôs rosse e la Caritas (viôt culì une interviste inedite a Mons. Giovanni Nervo) a forin tra lis organizazions transnazionâls plui ativis, prin tai socors e po te solidarietât. La Crôs Rosse austriache e fasè sù asîi a Trasaghis te frazion di Vasinis, a Tarcint e te localitât di Tierç di Tumieç; chê svuizare e costruì apartaments antisismics simpri a Vasinis e prefabricâts a Taipane e te sô frazion di Prossenic, dulà che a rivarin ancje lis struturis provisoriis, e tra chestis une scuele elementâr, de Baviere. La Crôs Rosse todescje e prontà invezit un ospedâl prefabricât a Tumieç. A rivarin materiâi de Bulgarie, Danimarcje, Finlande, Svezie, France, Ream Unît, Gjermanie Est e Svuizare.

Contribûts finanziaris e aiûts a rivarin des Caritas todescje, austriache e svuizare par meti in vore cun maestrancis propriis un plan slargjât di cjasis prefabricadis, scuelis, asîi, ricovars pai anzians e par riparâ i edificis che a vevin patît dams.

In chest sfuarç di solidarietât mai viodût e fûr dal comun, za te fase de emergjence a forin in prime linie la Glesie furlane e la Conference episcopâl taliane. Ai 7 di Mai il gardenâl Antonio Poma, cuntun messaç indreçât a monsignôr Alfredo Battisti, arcivescul di Udin, al sigurave l’impegn dai vescui talians par garantî «lis necessitâts plui urgjentis» de popolazion. Si metè in pîts une rêt fisse di zimulaments che e colegave  i singui paîs colpîts aes diocesis talianis che a vevin dât la lôr disponibilitât. A rispuinderin al apel 50 realtâts. Il periodic «La Vita Cattolica», te edizion dai 16 di Lui dal 1976, al anunziave i prins zimulaments tra Glemone e la diocesi di Turin, tra San Denêl e chê di Gjenue; altris a rivarin tes setemanis dopo. Lis visitis dai prelâts che a puartavin il risultât de solidarietât des lôr diocesis a lerin indenant tai mês seguitîfs: midiant di cheste rêt di relazions si podevin ufrî cjasis provisoriis e struturis temporaniis par dâur une prime sistemazion a chei cence cjase.

Ancje l’Ent nazionâl dai lavoradôrs rimpatriâts e dai sfolâts si metè subit in vore par cjapâ sù e gjestî fonts di doprâ par prontâ centris pai anzians e pai zovins, in particolâr a Secuals, Mueç e Tarcint.

Compagn l’Ente Friuli nel mondo, la organizazion che dal 1953 e prudele i colegaments fra i furlans in Italie e chei tal forest, che si mobilità daurman fasint partecipâ milions di furlans, e i lôr dissendents, in ducj i continents: al cjapà sù fonts pe prime emergjence, al organizà viaçs par permeti ai taramotâts di lâ li dai parincj lontans e al favorì i contats tra lis comunitâts furlanis origjinaris e la rêt dai Fogolârs furlans in Italie e tal forest.

La riviste de associazion, «Friuli nel mondo», e promovè in Avost un “Fonts di solidarietât pai taramotâts”, e subit e scomençà a dâ cont des donazions, massime di chês rivadis dal forest. Si vignì cussì a savê che il fogolâr di Faulquemont (in France) al veve contribuît cun 250 mil liris, e chel di Saarbrückner, dulà che a jerin a stâ tancj furlans emigrâts di Glemone, Dartigne, Tarcint e Maian, cun 6.400 marcs, destinâts aes comunitâts di Buie e di Susans (Maian).

A Thionville e a Saarbrückner (Gjermanie), tes coloniis estivis risiervadis pai socis dai fogolârs si de acet ai fîs dai taramotâts di Mueç, Resie e Resiute. Di Grenoble, cu la poie de Crôs Rosse, a rivarin in diviers ospedâi sachis di sanc e di plasme, e un machinari par fâ prelêfs e trasfusions. Te citât francese, in gracie di doi radioamadôrs, al funzionà ancje un puint radio che al tignive inzornâts i furlans emigrâts sul stât di salût dai lôr familiârs. Il fogolâr di Colonie al furnì un servizi telefonic di emergjence in vore 24 oris in dì e midiant di chel al cjapà sù intun sôl mês cirche 15 mil marcs. A chescj si zontarin 35 mil marcs donâts de Ford e altris 50 mil de Union dai gjelatârs. Tal Lussemburc, te Belgjiche, in Danimarcje, in dute la Europe li che e jere une associazion di furlans, o ancje dome grups spontanis di emigrants e dai lôr dissendents, si inmanearin racueltis di fonts. Al Friûl dal taramot a rivarin aiûts finanziaris de Famee furlane di Oakville (Canadà), dal Fogolâr di Toronto, de Federazion des societâts furlanis de Argjentine, dal circul furlan di Avellaneda, de Union furlane Castelmonte (Villa Bosch), de Societât furlane di Buenos Aires, dal Fogolâr di Olavarria, dal Centri furlan di Mendoza e di tancj altris puescj.

Di no podê contâ lis toneladis di vistîts, di gjenars di prime necessitât, di medisinis che a rivarin tai mês de prime emergjence, e in chei dopo. Une liste complete des donazions no je mai stade fate, e aromai e sarès in pratiche impussibile di tornâ a meti dongje.

Soredut, al sarès impussibil dâ cont di ducj i contribûts dai privâts, in particolâr di chei personâi e risiervâts. La plui part des sumis si cjaparin sù cun coletis publichis inmaneadis dai cuotidians nazionâi e internazionâi, sostignudis dispès cuntune sume iniziâl metude a disposizion de testade, come i 350 mil marcs racuelts dal cuotidian bavarês «Münchener Merkur» par costruî prefabricâts po instalâts de Crôs Rosse bavarese, o pûr lis cjasis fatis a Lusevare cui fonts ufierts dai letôrs dal «Corriere della Sera». A nasserin comitâts di pueste: tra lis coletis spontaniis, chê dai diplomatics increditâts te Sante Sede e tirà sù cirche un milion di liris.

Al è probabil che la prime colete publiche a pro dai taramotâts e sedi stade chê inviade te sede dal Fogolâr di Milan, diret dal gjeolic e esploradôr furlan Ardito Desio (za a cjâf de spedizion de prime rimpinade dal K2), te buinore dai 7 di Mai. Doi dîs dopo il fondadôr e diretôr dal cuotidian «il Giornale nuovo», Indro Montanelli, cuntun editoriâl dal titul Quando suona la campana, al sugjerì di organizâ une racuelte di fonts tra i cuotidians talians e forescj: tra i tancj, a parteciparin ae iniziative «Le Figaro» di Parîs e Tele Montecarlo. La sotscrizion si sierà ai 2 di Jugn e in mancul di un mês e tirà dongje 2 miliarts e 700 milions di liris. Cuant che al veve di sielzi cemût spindiju, visantsi di ce che i vevin dit cierts donadôrs, che tal mandâ il lôr contribût a vevin domandât che nol les al guvier, Montanelli al decidè che i bêçs a saressin stâts consegnâts drets «a cui che al veve bisugne». La sume si le doprà pe costruzion di abitazions in trê localitâts, sielzudis di Ardito Desio e dal gjornalist Egisto Corradi: Montenârs, Sedilis di Tarcint e Vît. Tant che segn di ricognossince chest ultin comun, tes frazions di Anduins e di Pielunc, al intitulà une vie aes Cjasis Montanelli, progjetadis di un grup di tecnics di Milan.