Tes tendis, tes roulottes

Il jutori tempestîf dal esercit, che in chê volte in Regjon al disponeve di cent mil oms (i doi tierçs dal Esercit talian e un tierç di dutis lis Fuarcis armadis), al fo fondamentâl ancje tal moment che, dopo di vê recuperât i ferîts e metût i lûcs in sigurece, si veve di viodi di cui che al jere restât cence cjase.

Dopo de scosse di Mai, il prin ricovar individuât par chei restâts cence cjase a forin i cjamps di balon, che a garantivin teren libar e in plan, bon par dâ acet aes tantis tendis che a varessin podût ospitâ, almancul pal Istât, la popolazion di desenis di paîs. Nancje l’esercit nol veve ducj i furniments che a coventavin par frontâ un sfuarç dal gjenar, ma la Regjon ju comprà cun urgjence e in part a rivarin dal forest, donâts dai esercits e des istituzions di tancj paîs europeans.

Tantis tendis a rivarin de Austrie, la prime a movisi par puartâ socors, e de Svuizare, che tes primis fasis, adun cun altris gjenars di necessitât, e mandà cirche 250 tendis. Altris tendis e jets di cjamp ju puartarin e ju meterin in vore il Bundeswehr, l’esercit de Gjermanie Ovest, e la Armée Belgie, l’esercit de Belgjiche. Ancje l’esercit inglês al mandà tendis, jets e cuviertis, altri materiâl al rivà de Crôs rosse dai paîs europeans. I prins cjamps si prontarin intune ventine di dîs, e tal complès a rivarin a dâur acet a cuasi 80 mil personis.

Tancj a cjatarin ripâr ancje tes carocis feroviariis metudis a disposizion des Feroviis dal Stât e a scomençarin a rivâ in Friûl di dute Italie lis roulottes, spes puartadis sul puest di citadins privâts in mût spontani. Te plui part dai paîs, a dispiet dai dams pardabon seris e dal grant numar di edificis sdrumâts, la struture urbane storiche e veve tignût, il centri nol jere stât ruvinât in mût irimediabil e duncje si podeve risanâ. Cussì il prin pinsîr dai furlans al fo chel di restâ dongjecjase: in plui des tendopolis tai cjamps sportîfs e dai cuartîrs di roulottes che si realizarin dongje dal paîs o dal borc di tornâ a fâ sù, tancj ricovars temporanis, creâts par iniziative di singulis fameis, a jerin logâts fûr des areis sieltis e furnidis, dongje di edificis lesionâts dome in part, di un capanon artesanâl che al veve tignût bot o di une stale, par permeti cussì di viodi des bestiis o dal ort.

Di là di 184 tendopolis, si realizarin un miâr di altris piçui insediaments, par sodisfâ la domande des fameis colpidis dal taramot di restâ tai paîs. Tal principi dal Istât la sielte di vivi in tende o tai borcs di roulottes i cjapà la volte a chê di partî, e no dome par secondâ lis domandis des comunitâts: di fat a mancjavin dâts precîs su la ricetivitât des zonis de marine, che in chel mês di Mai si preparavin a dâ acet ai turiscj estîfs. Plui di dut si veve pôre che la tragjedie e causàs une gnove bugade di emigrazion, come chê che dopo de vuere, tai agns Cincuante e Sessante, e veve sburtât di gnûf tancj furlans tal forest.

Tes tendopolis a nasserin formis di autogjestion dal dut origjinâls par coordenâ lis necessitâts coletivis (tant che la mense pai pascj), il rapuart cui volontaris e cu lis fuarcis dal ordin, par gjestî la comunicazion tra i insediaments, par dâ ordin e eficacitât al lavôr des istituzions impegnadis tal teritori – i comuns, la regjon, il comissari straordenari – in mût di frontâ la emergjence in maniere plui eficace. I comitâts di coordenament nassûts tai insediaments provisoris a forin une esperience straordenarie di autoguvier"dal bas" e di solidarietât tra lis gjenerazions. Tal mieç des tendis si instreçavin la esperience antighe de vite comunitarie dal borc e chê dal lavôr comun de tradizion de emigrazion, il spirt altruistic e di cuarp dai tancj alpins e lis ideis des gnovis gjenerazions e dai zovins dai agns Sessante e Setante. La politicizazion fuarte de societât di chê volte si rifleteve tal vivi adun di moviments diviers, di Lotta Continua a Comunione e Liberazione. Il «Boletindal coordenament des tendopolis» al nassè in maniere spontanie, e al rapresentà un imprest impuartant di monitorament e di comunicazion, doprât dispès dai sindics. Cul 1978 il so puest lu varès cjapât «In Uaite», un gjornâl di coordenament dai paîs colpîts dal taramot, diret di Mauro Tosoni.

A pene vot agns dopo dal taramot dal Belìce, si vevin ben claris lis imagjinis de popolazion siciliane che e jere ancjemò a stâ tai prefabricâts: par chest si cirì cun ducj i mieçs di slontanâ la pôre che la sistemazion in cuartîrs temporanis e podès jessi "par simpri." Si resonà di subit, cemût che al fasè il ministri dal Interni Francesco Cossiga dopo vê visitât il Friûl ai 9 di Mai adun cun Aldo Moro, cjâf dal guvier, che la sielte des tendopolis e jere temporanie, e che si veve di pensâ daurman a soluzions «definitivis».

Diviers inteletuâi furlans a presentarin propuestis alternativis a chês dal guvier, che al sburtave par che si doprassin lis tendis, une soluzion discomude. Il diretôr dal «Messaggero Veneto» Vittorino Meloni, che al jere simpri stât contrari ai prefabricâts, al proponeve di sostituî lis tendis cu lis roulottes. Pre Toni Beline, un plevan che la popolazion e poiave un grum, e che al jere ancje un gjornalist famôs e un scritôr in lenghe furlane, al racomandave invezit che a chei restâts cence cjase ur vessin dât acet tes casermis; il storic furlanist Gino di Caporiacco al proponeve di sistemâ lis fameis in capanons industriâi, che si podevin fâ sù ae svelte e che ae fin de emergjence si saressin podûts tornâ a doprâ tant che struturis polivalentis al servizi des comunitâts.

Tignint cont des elezions politichis programadis pai 20 e 21 di Jugn, i candidâts a sielzerin di no doprâ il tiermin dispreseatîf "barache" e di vê miôr la espression "abitazions sostitutivis", par dâ il sens di une soluzion temporanie ma dignitose. Te L.R. 17 dai 7 di Jugn dal 1976, Intervents di urgjence par proviodi aes esigjencis abitativis straordenariis e urgjentis des popolazions tocjadis dai events telurics dal Mai dal 1976 tal Friûl-Vignesie Julie, che e de un prin cuadri di riferiment pe emergjence, la Aministrazion regjonâl e jere autorizade «a stipulâ contrats di acuist, di nauli o di leasing cun ditis specializadis, midiant di negoziazions privadis, pe furnidure e instalazion di abitazions mobilis o cun elements componibii, di destinâ in mût temporani a lozament pes fameis cence cjase, cjapant dentri lis infrastruturis che a coventin».

La volontât di passâ subit ae ricostruzion e sburtà la Regjon – cu la L.R. 33 dai21 di Jugn dal 1976, Normis par reperî areis di destinâ a intervents edilizis urgjents tai comuns cjapâts dal sisme dal Mai dal 1976 e normis in materie di espropriazion par utilitât publiche – a autorizâ i sindics a identificâ terens che a podevin jessi metûts a disposizion dai proprietaris, se pussibil cence che al coventàs espropriâju, par trasformâ lis primis tendopolis in areis urbanizadis, adatis ancje pe instalazion di Insediaments abitatîfs provisoris (Iap).

Par prontâ prin lis areis, e po dopo lis oparis di urbanizazion primarie, tal Istât e fo incargade daurman une societât par azions, partecipade di 80 aziendis di costruzions furlanis e venetis: il Co.Ri.F. (Consorzi pe Ricostruzion dal Friûl). Une sielte contestade cun fuarce dai partîts di oposizion, che daûr de voie di "fâ di bessôi" a viodevin la decision di lassâ in bande cualchi grande aziende (tra chestis Italstat e Fiat) che e jere za in vore sul teritori, ancje tal cantîr de autostrade Udin-Tarvis, che in chei dîs al jere fer par vie dal taramot. Lis polemichis a tocjarin ancje la sielte des dôs aziendis che a varessin furnît i prefabricâts, une furlane e une trentine, e il fat che ur anticiparin un acont di 5 miliarts di liris. Altris contrascj a jerin peâts al fat di no vê optât par unitâts abitativis "monobloc," che a saressin stadis plui facilis di instalâ.

Vie pal Istât il Comitât di Coordenament des tendopolis, fasint jeve propit su chest gnûf spirt di partecipazion che al jere nassût, al organizà dôs manifestazions popolârs, la prime a Udin e la seconde, ai 16 di Lui, a Triest, sede de Regjon. A parteciparin plui di trê mil e cinccent taramotâts, mobilitâts par denunziâ i ritarts e lis dificoltâts simpri plui grandis peadis aes cundizions precariis de vite tes tendis, e si rivà a ocupâ fintremai la sede de RAI. In chê stesse dì, i sindicâts e i partîts di çampe a proclamarin une " " a Udin, par rimarcâ i intarts de azion regjonâl. Dut chest al judà a cambiâ il clime politic bande une condivision plui grande des sieltis urgjentis di fâ.

Cu lis scossis dai 15 di Setembar al fo clâr par ducj che il passaç des tendis aes cjasis e la ricostruzion sperade no varessin podût jessi svelts: dal sigûr no varessin podût tacâ prin dal Invier. Dopo dal timp des tendis, al coventave cjatâ par fuarce une soluzion prin che e rivàs la stagjon frede. Intant, si cirì di rimplaçâ il prime pussibil lis tendis cun roulottes e cun prefabricâts. I prefets di dute Italie a recuisirin uns 4.000 roulottes, sedi di aziendis sedi di privâts: metudis adun a Cjampfuarmit, dongje Udin, a restarin a disposizion dai taramotâts tant che ricovars temporanis.