La emergjence

Catastrofictaramot in Friûl al titulave il «Messaggero Veneto» ai 7 di Mai dal 1976. Passade la gnot a cirî di socori i ferîts e recuperâ i muarts, la buinore dopo chei che a jerin scjampâts ae furie dal cataclisme si cjatarin denant dai 45 comuns dal cratêr sismic disdrumâts – tra chescj Glemone, Vençon, Buie, Osôf -, 40 danezâts in maniere serie e 52 danezâts. Si contaran cuasi mil muarts e passe 3 mil ferîts, 18 mil edificis distruts e 75 mil cun dams.

La machine dai socors e fo imponente: in plui dal Esercit talian, che al jere za une vore presint in regjon, e dai Vigjii dal fûc, a rivarin ancje sezions di esercits forescj e cetantis associazions di volontaris come la Crôs rosse, i alpins in congjêt, la Caritas e i scouts. Lis liniis dal telefon e chês eletrichis no funzionavin e, za tes primis oris dal disastri, il supuart dai radioamadôrs cui lôr barachins al fo determinant par sigurâ i colegaments radio.

Il Comissari straordenari di guvier Giuseppe Zamberletti al rivà a Udin la buinore dopo de scosse. Il centri pal coordenament de emergjence e dai socors al fo organizât li de Prefeture. Par gjestî lis operazions, il comissari al jere judât di cuatri vicecomissaris e nûf Centris operatîfs di setôr, distribuîts tal teritori. Si tirarin sù lis primis tendopolis par dâ acet ai sfolâts, si tacà a puartâ vie lis maseriis e a curâ i ferîts. In curt, la int e scomençà a convincisi dal fat che nol sarès passât tant timp prin di lassâ lis tendis e tornâ tes cjasis, ma la scosse dai 15 di Setembar e parà vie cualsisei sperance di une pronte rinassite. Il Guvier i domandà a Zamberletti, il comissari che ai 25 di Lui al jere lât vie dal Friûl, di tornâ par trasferî in puescj sigûrs cirche 40 mil personis e garantî ai sfolâts insediaments plui stabii dulà lâ a stâ. Midiant dal comissari straordenari, il Stât al gjestì la emergjence delegant la ricostruzion ae Regjon e ai ents locâi.