La rispueste volontarie dai artiscj e dai inteletuâi

Ai 12 di Mai dal 1976 un grup di cuindis inteletuâi al cjapà posizion cuintri des demolizions massivis autorizadis te prime emergjence. A firmarin e a faserin publicâ su la prime pagjine dal «Corriere del Friuli» un manifest che al invidave a tutelâ il «patrimoni uman, storic, culturâl e artistic» de regjon. Il ricuart des esperiencis dal Vaiont e dal Belìce al jere fresc, il test si indreçave duncje ai professioniscj – ai architets, inzegnîrs, gjeometris e perîts edîi – «par che a refudin tindincis e intervents discognossûts ae nestre civiltât, e a contribuissin cu lis popolazions a tornâ a dâ al Friûl il so aspiet, rispietant la struture urbanistiche e architetoniche particolâr che e jere tipiche sô».

L’apel al cjapave dentri ancje lis autoritâts e lis stiçave a ricusâ lis demolizions indiscriminadis e la dispersion dai materiâi origjinâi, bogns par restaurâ i edificis e i monuments ruvinâts; cun di plui, ur domandave di difindi i bens storics artistics e architetonics di tutelâ e preservâ, che a jerin elements identitaris des comunitâts furlanis.

Un altri inteletuâl che al intervignì al fo il scritôr Stanislao Nievo, pronevôt di Ippolito. Fra la fin di Mai e l'inizi di Jugn dal 1976 si indreçà ae stampe, in particolâr ae riviste «Friuli nel mondo», cuntune letare li che al proponeve aes citâts talianis e forestis di “adotâ”, midiant dal interessament dai Fogolârs furlans, i paîs taramotâts. Nievo al veve intuît il pericul di un coordenament falât tra lis diviersis formis di assistence e par chest al sostignive la impuartance di mandâ i aiûts di une “citât adotante” a un comun singul, tant che integrazion de planificazion statâl e regjonâl za in vore: «Fasìn partecipâ ognidun ae ricostruzion dal Friûl», si lei te letare, «disìnji dulà che a laran il so aiût, i siei bêçs, e a cui che a laran, e il so interès no si sfantarà, o almancul al calarà dome un pôc. Savê di precîs a cui che si done, al sburte a donâ». La idee e jere buine, ma dificile di meti in vore.

Ancje lis galariis di art a rispuinderin daurman; in dut il teritori talian a organizarin venditis e a bandirin astis par racuei fonts a pro des popolazions taramotadis, cu la vendite di oparis che i artiscj dispès a regalavin.  La cjase di art Finarte, par esempli, e inmaneâ par joibe ai 20 di Mai, aes 21, te plaçute Bossi a Milan une vendite al incjant: l’event al fo publicizât dal «Corriere d’informazione» cuntun avîs intitulât Anche gli artisti per il Friuli.

Une des iniziativis plui significativis e rivà di New York, cul patrocini di Maria Laura Vinci, femine dal ambassadôr talian tes Nazions Unidis di chê volte, e e veve tant che promotôrs il scultôr minimalist Carl Andre e il critic dal «New York Times» Thomas Bear Hess, che a faserin nassi il Friul Arts and Monuments (Friam). L’obietîf di fonde al jere di donâ ae citât di Udin une racuelte di oparis di art contemporanie americane, di chestis il 20 par cent al sarès stât destinât ae pinacoteche citadine e l’80 par cent che al restave si varès vût di vendilu, par finanziâ i restauris e il recupar dai monuments come la glesie di Sant Francesc a Cividât. A donarin lis lôr creazions artiscj impuartants, tra chescj Roy Lichtenstein, Sol Le Witt, Willem de Kooning, Frank Stella, Donald Judd, Robert Mangold, il stes Carl Andre e tancj altris, par un totâl di 114 oparis di art.

Esponudis dai 11 ai 27 di Avost dal 1976 intune mostre dal titul Project Rebuild, An Exhibition to aid earthquake-damaged Udine, inmaneade li de Grey Gallery and Study Center di New York, lis oparis a rivarin a Rome, te Academie Americane, ai 6 di Otubar dal 1977 e, tal Istât dal an dopo, a Udin. Inmò prin che lis oparis a rivassin di ca dai confins talians, il diretôr dal museu civic di Udin Aldo Rizzi e il sindic Angelo Candolini si domandarin se nol fos il câs di mantignî adun la colezion, cence dividile. «Chê che nus rive dai Stâts Unîts», al declarà Rizzi, «no je dome une prove di amicizie, ma une vere ricjece spirituâl, un patrimoni culturâl che no si pues no tesoreâ ancje par compensâ chês pierditis. […] In sumis al sarès stât un pecjât […] lassâsi scjampâ la ocasion di creâ un vêr museu di nivel culturâl cussì stimolant». Tal stes mût, a Candolini i someave un erôr «dispierdi une racuelte che e cjapave ancjemò plui valôr tal so contest». Ancje se «cualchidun al varès  podût stracapî e criticâ il fat che Udin al “profitàs”, o dut câs che al pensàs ae art americane intun moment cussì tragjic», i organizadôrs e artiscj americans a acetarin la cuintripropueste udinese, e un pôcs di lôr, vignûts a savê che lis oparis no saressin stadis vendudis ma ben metudis in mostre pal public, a rimplaçarin i lavôrs za donâts cun altris plui significatîfs.

Dopo condividût il cambiament di percors, lis autoritâts dal puest a scomençarin a rifleti su dulà che si varès vût di esponi la donazion americane. Cussì, lis oparis a restarin tal dipuesit par tant timp. Fra lis diviersis propuestis, stant che il Cjistiel al jere stât lesionât dal taramot, a jerin il Palamostre, simpri tal centri di Udin, che ancjemò nol dave acet a esposizions, e la grande Vile Manin di Passarian, lontane vincj chilometris dal cjâf lûc. Ae fin, la esposizion des oparis si fasè te Sale Ajace dal Palaç comunâl di Udin, dai 20 di Setembar ai 16 di Novembar dal 1980, cul titul Arte americana contemporanea. Definide dal sindic un «tribût dovût ai donadôrs e al popul american in gjenar, che al è stât une vore dongje dal Friûl tes oris dramatichis dal sconvolziment sismic», la mostre e otignì un grant sucès di public, ma no judà a disgredeâ la cuistion de sistemazion de colezion che, dome di pôc, e pues svantâ une part esponude in mût permanent tal secont plan di Cjase Cavazzini, Museu di art moderne e contemporanie di Udin.

Une altre iniziative impuartante che e testemoneà la vicinance aes comunitâts tocjadis dal taramot e fo la rassegne “Friuli. Memoria, partecipazione e ricostruzione”, promovude de citât di Vignesie tai mês di Avost e Setembar dal 1976. Insuazât te curnîs de Bienâl, il progjet si realizâ cuntune schirie di manifestazions culturâls, mostris e seminaris finalizâts, daûr des peraulis dal sindic di Vignesie Mario Rigo e dal assessôr ae culture Stefano Zecchi, a «partecipâ, duncje, no dome in maniere emotive, cu la solidarietât dai prins moments, ae tragjedie dal Friûl: partecipâ par judâlu a tornâ a nassi». Te Galarie Bevilacqua La Masa si tignì une mostre documentarie dal titul “Prima e dopo il terremoto”, dulà che si viodevin un program audiovisîf su lis localitâts ruvinadis, diviersis oparis di art rivadis dal Friûl e lis fotografiis fatis intant di doi viaçs a Vençon, un prime e un dopo de scosse di Mai, di un grup di students de facoltât di urbanistiche dal Istitût universitari di architeture di Vignesie (Iuav). «O vin presentât il ritrat dal Friûl», al sclarì il pitôr udinês Romano Perusini, un dai tancj furlans che a partecipavin ae iniziative veneziane, adun cul fotograf Italo Zannier, «par po jentrâ tal vîf dai siei problemis, bisugne savê ce che si fasarà di Vençon, ce che si fasarà di Glemone, ce che si fasarà di dut il Friûl». Tant che compagnament de mostre, l’architet udinês Nani Valle al progjetà in place Sant Marc une instalazion imponente formade di une struture di metal tubolâr, che lis sôs armaduris a insuazavin gjigantografiis cun scritis descritivis e imagjins de catastrofe. A cheste, in plui dai diviers dibatiments culturâi sui problemis de ricostruzion, si zontà la rapresentazion in prime assolude, ai 13 di Novembar dal 1976 te glesie di Sant Laurinç a Vignesie, dal drame teatrâl I Turcs tal Friùl di Pier Paolo Pasolini, cu la colaborazion dal Teatri La Fenice e dal Piccolo Teatro «Città di Udine». Lis musichis a forin scritis di pueste di Luigi Nono, la senografie fate di Luciano Ceschia.

Si meterin in pîts ancje tantis altris iniziativis spontaniis par cjapâ sù fonts: concierts in diviersis citâts di Italie e manifestazions culturâls di plui gjenars. Gisella Pagano e incidè l’LP di cjançons tradizionâls furlanis No Mandi Friûl, che il rigjâf al fo donât a chês comunitâts dal dut sdrumadis.

Fra i tancj esemplis di solidarietât che invezit a animarin il contest locâl no si à di dismenteâ l’impegn civîl dal Istitût di art “Giovanni Sello”, che al restà viert dopo dai 6 di Mai, cun dut che il Proveditorât ai Studis di Udin al veve dât disposizion di sierâ lis scuelis, e che al deventà un pont di riferiment par ducj i students che a jerin a stâ cu lis lôr fameis tai paîs disastrâts. Su propueste dal coleç dai docents, lis diviersis classis dal istitût a parteciparin a esperiencis didatichis alternativis e interdissiplinârs, che si disviluparin su doi trois. Il prin, in cunvigne cu la Prefeture di Udin, al previodeve di preparâ plui di doi mil cartei di segnaletiche stradâl e di emergjence di instalâ tes tendopolis. Il secont, invezit, di realizâ cu la poie dal Centri di Catalogazion di Vile Manin (vuê Erpac, Ent Regjonâl pal Patrimoni Culturâl F-VJ), al compuartave la esecuzion di rilevazions fotografichis dal teritori de bande di scuadris operativis di students e di docents volontaris, che a lavin tai comuns taramotâts par documentâ i dams ai edificis: lis fotos fatis, cirche dîs mil fotograms, a vignivin po disvilupadis e stampadis su cjarte tai laboratoris de scuele. Cun di plui, vie pal Istât altris students a montarin un set fotografic te glesie di Sant Francesc a Udin, par catalogâ lis oparis di art prelevadis des glesiis o dai sîts malsigûrs.

Lis iniziativis culturâls nassudis par vie dal taramot a vevin doi aspiets in comun: di une bande al coventave fâi cuintri cun urgjence ae pierdite di oparis di art, dispès robadis o ruvinadis in mût ireparabil; di chê altre al jere impuartant controlâ che la ricostruzion e tignìs cont dal patrimoni architetonic, artistic e culturâl dal teritori. Tra lis tantis formis di solidarietât pandudis, si slargjà il timôr vîf e condividût peât ae dispersion dal patrimoni locâl.