Il dibatiment

Intai dîs subit dopo de scosse dai 6 di Mai dal 1976 il president dal Consei Aldo Moro al cjapà une decision fondamentâl pe ricostruzion: la protagoniste e sarès stade la Regjon autonome Friûl-Vignesie Julie, une regjon a statût speciâl che, a pet di chês ordenariis, e esisteve za di uns dodis agns e e veve za une discrete esperience te gjestion aministrative.

Ancje la discussion su ce strategjie doprâ e tacà daurman, cu la politiche convinte che si ves di pontâ sul ‘cemût che al jere, li che al jere’ e i studiôs di urbanistiche e i architets, invezit, che a crodevin che la ricostruzion e sarès stade la ocasion par provâ a imagjinâ soluzions diferentis buinis di sodisfâ, se no di anticipâ, lis tindincis de modernizazion economiche e sociâl.

La discussion su cuale filosofie cjapâ sù si fermà, par dî il vêr, ae part teoriche: tant il popul des tendopolis che la classe politiche a deciderin daurman che i paîs a vevin di tornâ a nassi tal stes puest li che a jerin prin des scossis e che lis cjasis butadis jù, intai limits dal pussibil, a vevin di tornâ a jessi costruidis come prin dal taramot. Si doprarin i gnûfs materiâi e lis gnovis tecnichis antisismichis, ma si cirì di salvâ dut ce che si podeve. E nassè dome une piçule new town, Puartis Gnûf tal Comun di Vençon, parcè che il borc origjinari al jere menaçât di un slac.

Il secont episodi decisîf che al segnà l’inviâsi de ricostruzion, invezit, nol sucedè te capitâl, ma te sede de Regjon a Triest. Al fo il pat informâl tra la fuarce politiche di maiorance in regjon, la DC, e lis fuarcis di oposizion cul PCI in prime file. Si stabilì che dutis lis componentis politichis e culturâls dal teritori a varessin lassât di bande diferencis e rivalitâts par colaborâ unidis e fâ rinassi il Friûl: une sorte di ‘compromès sismic’, come che lu àn clamât, che al cjapà dentri ducj tal procès di rigjenerazion dal Friûl taramotât. I uficis regjonâi, lis aministrazions locâls e i sindics a forin il motôr di cheste imprese.