La ricostruzion dal Friûl taramotât e fo puartade insom
intune desene di agns. In pratiche ducj chei che a vevin vût la cjase danezade
o disdrumade, a metât dai agns Otante a jerin intune abitazion gnove e plui
sigure. Tignint cont de entitât sismiche dal event e de aree che al à tocjât,
no son esemplis, almancul in Italie, di un recupar tant svelt e eficient.
Il 'cemût che al jere, li che al jere' che al vuidà
cheste opare al ve la sô massime realizazion inte ricostruzion dai centris
storics disdrumâts. Par tornâ a fâju vivi, metint in vore lis tecnichis
antisismichis modernis, e coventà la cooperazion di ducj: des aministrazions
comunâls, che a verin une grande autonomie inte planificazion urbanistiche, dai
architets, dai professioniscj e des impresis che a mediarin jenfri i desideris
dai abitants e i limits tecnics, e infin de popolazion stesse, che e jemplà lis
assembleis popolârs par dâ il so contribût tes decisions plui impuartantis. La
citât di Glemone e il borc murât di Vençon a son i câs plui cognossûts in chest
sens, ma i stes obietîfs comuns si realizarin ancje a Buie, Dartigne e in
altris paîs plui piçui.
Il sisteme sielzût, fondât su la standardizazion tecniche
dai intervents e su la ricostruzion sul
puestde edilizie residenziâl,
al limità la pussibilitât di variâ lis sieltis stilistichis e costrutivis: il
risultât al è stât, in chest sens, une grande uniformitât di lengaç
architetonic. Il 'moderni' al podè pandisi di altris bandis, te edilizie
publiche, tai edificis di cult, intes fabrichis.
Un altri setôr dulà che la colaborazion tra privât e
public e funzionà une vore ben al fo chel dal recupar e de tutele dai bens
culturâi: sedi chei che no jerin tutelâts sul teritori, par esempli lis cjasis
tradizionâls, che par chês e fo creade une specifiche categorie normative di
intervents, sedi il grant numar di oparis
artistichis metudis in sigurece, catalogadis e studiadis, in tancj câs pe prime
volte, creant lis cundizions par valorizâlis. Mostris e cunvignis di impuartance
internazionâl a compagnarin il lôr recupar, rinfuarçant la idee che la essence
di un teritori e de sô popolazion e ven ancje de sô culture.