Il taramot furlan dal 1976 si pues calcolâlu
tant che il prin, fuart taramot talian studiât su la fonde di un numar
impuartant di dâts sientifics e di analisis struturadis. Al à inviât la
ricercje coordenade a nivel nazionâl, cu la nassite dal “Progetto Finalizzato
Geodinamica” li che a àn partecipât gjeolics, sismolics e inzegnîrs,
evidenziant la necessitât di un sisteme nazionâl di protezion civîl, che al
sarès stât istituzionalizât tal 1982. Par plui aspiets al è stât il pont di
partence de moderne indagjin sismologjiche in Italie, che e à produsût gnûfs
struments di monitorament, classificazion dal teritori e prevenzion, che a
permetin di cognossi miôr il compuartament dal teren e di ridusi i efiets dai
taramots che a vignaran.
Tal principi dal 1976 lis organizazions
sientifichis dal Friûl-Vignesie Julie no pandevin un grant interès pe
sismicitât locâl: al è ancje par chest che lis scossis a cjaparin di sorprese
la popolazion e i aministradôrs, che no jerin preparâts par un event
straordenari come chel dai 6 di Mai. In chê volte in Italie a funzionavin dome
33 stazions sismometrichis, logadis tes universitâts o tes istituzions
gjeofisichis. Te Italie nordorientâl a Triest, Udin, Padue, Salò e Bolzan,
dongje dal Friûl, tal rai di 250 km, a jerin stazions operativis in Slovenie, a
Lubiane, Cerknica, in Cravuazie, a Zagabrie, Labin e Puntijarka, In Austrie, a
Kremsmunster, Mariazell, Molln e Innsbruck, in Gjermanie, a Bad Reichenhall,
Fürstenfeldbruck e Garmisch. Tal mês di Jugn dal 1976, la universitât di Viene
e instalà gnovis stazions a Clanfurt e Bad Blaiberg in Carintie.
L’Istitût Nazionâl di Gjeofisiche (vuê Istitût
Nazionâl di Gjeofisiche e Vulcanologjie, INGV) al jere incargât di monitorâ la
sismicitât taliane e al mandave fûr doi boletins. Dal 1906 tal Osservatori
maritim di Triest e esisteve une stazion sismografiche che e à cjapât sù dâts
sismologjics su lis Alps Orientâls fin al 1958. In chel an e tacà a jessi part
dal Osservatori Gjeofisic Sperimentâl (OGS, vuê Istitût Nazionâl di Oceanografie
e di Gjeofisiche Sperimentâl); tal 1963 a trasferirin la stazion dal centri di
Triest (Campo Marzio) a un sît dentri de Grote Zigante là che al jere un bas
rumôr ambientâl. Le colegarin ae rêt mondiâl World Wide Standardized Seismographic
Network (WWSSN), instalade dal Servizi gjeologjic dai Stâts Unîts e integrade
intune rêt mondiâl che e monitorave lis esplosions nucleârs americanis, ma
soredut chês sovietichis.
Intun prin moment l’OGS al rivà a studiâ la
scosse dai 6 di Mai dal 1976 e la secuence sismiche dai dîs dopo dome cui dâts
regjistrâts de Grote Zigante, parcè che al jere une vore dificil colegâsi cu
lis stazions dongje par vie che lis liniis telefonichis a jerin interotis o
sorecjamadis. Al fo duncje dificil individuâ l’epicentri dal taramot e par
stimâ la profonditât si podè dome valutâ la nature superficiâl dal event, cu
lis scossis che, cjapant dentri ancje lis replichis, a forin localizadis tai
prins 7-10 km. Sul imprin si veve calcolât che l’epicentri al fos stât sul San
Simeon, dulà che la Fele e va a finî tal Tiliment; po dopo, si cjaparin in
considerazion la fasse pedemontane des Prealps Juliis a Est di Glemone e il
Cjanâl di Resie a Nordest di Vençon. Infin, si fissà l’epicentri te aree di
Mondiprât, tra Taipane e Lusevare, tes Prealps Juliis.
La grande cuantitât di dâts cjapâts sù de
stazion di Triest e à permetût di localizâ 695 scossis dal mês di Mai a chel di
Otubar dal 1976, e une migrazion de sismicitât bande Nordovest. Il taramot dai
6 di Mai dal 1976 al tocjà une aree di 5.700 km2 tal Friûl
centriorientâl. In chê volte a stimarin che la sô fuarce e ves vût une
magnitudo di 6,5 grâts (ML 6.5, vuê Mw 6.42), tra chês plui altis mai
regjistradis te Italie setentrionâl. Lu sintirin intune aree une vore largje,
fin tal mâr Baltic, anticipât un minût prin di une scosse cuntune magnitudo di
4,5 (ML 4.5 vuê Mw 4,5), calcolade tant che une scosse premonitorie (foreschock)
e no un event par cont so fûr de secuence. La intensitât macrosismiche massime
e fo dal X grât de scjale Medvedev-Sponheuer-Karnik (MSK)
a Glemone, Vençon, Trasaghis, Bordan, Forgjarie, Maian e Osôf. Il taramot nol
cjapà citâts popolosis: chê plui dongje, Udin, logade a 30 km dal epicentri, e
patì dams margjinâi parcè che il moviment dal teren al le subit al mancul bande
Sud.
Aes 21
di sere dai 6 di Mai dal 1976 e tacà duncje une des secuencis sismichis plui
fuartis e distrutivis de seconde metât dal Nûfcent in Italie. Cheste e le
dilunc cun scossis a man a man mancul fuartis e frecuentis – la repliche plui
fuarte e fo chê dai 9 di Mai (Mw 5,08) – e po dopo si cuietà vie pal Istât. Intant che si
tornave a costruî la tiere e tremà ancjemò: doi taramots ai 11 di Setembar (Mw
5,25 e Mw 5,60, max Mw 5,58) e doi ai 15 di Setembar (Mw 5,93e Mw 5,95,max Mw 6,02) a causionarin gnûfs muarts e dams. Un
altri scjas fuart al rivà un an dopo, ai 16 di Setembar dal 1977 (Mw 5,14), cun
daûr une schirie di replichis che a lerin indenant par plui di un mês.
La secuence interie e rapresente la evoluzion
di un event complès che al à cjapât dentri tantis struturis tetonichis alpinis
compressivis, spes vuarbis, e cualchi faie dinariche, come pai fuarts taramots
dai 7 e dai 9 di Mai dal 1976. La scosse dai 6 di Mai, che si pues colegâ a une
faie contrarie alpine a angul bas, e je stade prin associade ae faie
Susans-Tresesin e po ae linie Buie-Tresesin; par altris studis, invezit,
l’event si à di peâlu sedi al sorescoriment Tresesin-Cividât che a chel
Periadriatic, come pal event dal mês di Setembar dal 1977 (Mw 5,14),
logât a Ovest dal Tiliment.
La panoramiche des interpretazions e conferme
une liste di faiis ativis in Italie, che e identifiche cuatri sorzints pai
episodis de secuence furlane: la faie Glemone Sud, pal event principâl dai 6 di
Mai; la linie di Tarcint, pal sisme dai 11 di Setembar; chê di Montenârs, pe
scosse di magnitudo (Mw 5,93) dai 15 di
Setembar; e, par ultin, la faie Glemone Est, pal event di magnitudo (Mw 5,95) dai 15 di Setembar.
La complessitât tetoniche dal teritori furlan,
siôr di sistemis di faiis par plui contrariis, e la emission intermitente di
energjie elastiche, a àn sburtât la Regjon Autonome Friûl-Vignesie Julie a
realizâ une rêt sismometriche regjonâl (screade ai 6 di Mai dal 1977) cu lis
primis trê stazions, che in chê volte a jerin ativis te aree epicentrâl. Intai
agns dopo il numar des stazions al è incressût fin a rivâ a 20: 15 a periodi
curt e 5 a bande largje. A chestis si à di zontâ chês tal Venit e chês tes
provinciis autonomis di Trent e Bolzan; dutis adun a costituissin la rêt
sismometriche de Italie nordorientâl. In bande di cheste struture e je ancje la
rêt acelerometriche regjonâl (RAF), che si compon di 14 stazions che a misurin
il scjassament efetîf dal teren intant des scossis plui fuartis, ufrint dâts
fondamentâi pe progjetazion antisismiche e pe valutazion dai efiets locâi. La
rêt sismometriche e chê acelerometriche a son complementârs.
Pôc timp indaûr, doprant i dâts des stazions
publichis e privadis, permanentis e temporaniis, lontanis mancul di 250 km dal
Friûl centrâl, si à fat une revision dai 2012 events cuntune profonditât focâl
tra cirche 5 e 14 km che si son disvilupâts tra la secuence dai 6 di Mai dal
1976 e i 31 di Dicembar dal 1977. In cheste maniere, si à rivât adore di elaborâ
une gnove interpretazion des liniis sismichis te fasse pedemontane furlane,
ufrint une leture inedite, buine di fâ capî miôr il disvilup de secuence
furlane: si à cussì presentât un gnûf model struturâl pe sismicitât dal Friûl,
che al pant une relazion strente tra il sisteme trascorint diestri Idrie-Dimpeç
(de val dal Lusinç te Slovenie ocidentâl ae alte val dal Tiliment in Cjargne) e
i sorescoriments tes Prealps Juliis e te pedemontane furlane (faie
Glemone-Cjaurêt, faie Susans-Tresesin, linie di Buie, Puçui, Udin).
Al è stât duncje pussibil individuâ trê
avigniments che a àn anticipât l’event:
1. te Grote Zigante di Triest ai 26 di Zenâr dal
1973 si regjistrà un salt evident su dutis dôs lis componentis dai pendui
Marussi, cun disturps anormâi tes oris dopo. Chel fat al tornà a sucedi spes e
si fermà di colp cul taramot dai 6 di Mai, par po tornâ fûr in maniere debile
prin des scossis di Setembar. Di in chê volte, chel gjenar di disturp nol è
plui stât regjistrât;
2. te zone di Tisane, te basse planure furlane che
e cjale il Mâr Adriatic, une zone calcolade asismiche fin a chel moment, tal Invier 1975-1976 a son stâts cuatri taramots di
intensitât basse, tra magnitudo 2,5 e 3,5, che la popolazion e à sintût in maniere nete. Dopo dai 6 di Mai si à ipotizât che chescj episodis a fossin un event
precursôr, parcè che a jerin provocâts di microcrevaduris che si jerin
disvilupadis dilunc de fase di acumulazion di sfuarç compressîf prin dal
taramot;
3. te dighe de Dimbieste (a Sudovest di Tumieç) si
regjistrà cualchi variazion clinometriche, come che al jere sucedût tal taramot
precedent, chel dai 11 di Otubar dal 1954 dongje Glemone.
La plui part des ricercjis realizadis a àn
duncje permetût di fâ grancj progrès ancje sul front de prevenzion: «la
protezion cuintri dai taramots», al à scrit Marcello Riuscetti, docent di
sismologjie aplicade te Universitât dal Friûl e un dai progjetiscj de Rêt
Sismiche Nazionâl, «e je un compit complès che si pues puartâ insom cun sucès,
se si à tant che prerecuisîts une salde cognossince de sismicitât, une
legjislazion sismiche moderne, adate pe culture, pe economie, pes
carateristichis dal patrimoni imobiliâr e la organizazion socioaministrative de
nazion, la sô aplicazion rigorose a edificis vecjos e gnûfs e un sisteme di
intervent post taramot eficient (gjestion des emergjencis)».