Ai 6 di Setembar dal 1976, duncje prin de scosse
disastrose di chel mês, il Consei regjonâl al istituì la 'Segretarie Gjenerâl
Straordenarie pe ricostruzion dal Friûl', l'ufici tecnic che al puartà indenant
la ricostruzion par almancul dîs agns. A cjâf de Segretarie al fo nomenât
l’inzegnîr Emanuele Chiavola.
Lûc di contat permanent e operatîf tra la Regjon e il
teritori, tra tecnics e aministradôrs locâi, la Segretarie e jere organizade in
trê ripartizions: aministrative, tecniche e de assistence. Dentri a operavin
doi gjenars diferents di organisims tecnics: il Grup Interdissiplinâr Centrâl
(CIG) o Grup A, e il Grup B. Il prin al jere costituît di 29
professioniscj: 16 inzegnîrs, 9 architets, 2 gjeometris, un perît industriâl e
il professôr Miha Tomacevitz dal Istitût pe ricercje sui materiâi e lis
struturis (Zavod za Raziskavo Materiala a Konstrukcij - ZRMK) di Lubiane, che
cun lui, cemût che si à za dit, e jere in pîts une colaborazion
tecniche. Il Grup A al puartà indenant compits di programazion e di
coordenament, in particolâr al formulà la normative tecniche pe progjetazion e
pe direzion des oparis. Ae fin dal 1979 al rivà a vê 41 membris.
Intal 1977, il Grup
A al fissà lis liniis vuide de ricostruzion tai Documents Tecnics zontâts ae leç n. 30 dal 1977, i famôs DT, preseâts
inmò vuê pe utilitât che a àn vût. Cui DT, di fat, si podè standardizâ une
metodologjie di progjet e di intervent, evitant che ogni professionist al les
indenant in maniere diferente.
Il prin di chescj documents, il DT1, al dave lis
istruzions par presentâ i progjets, al elencave i documents di zontâ ai
elaborâts grafics e i contignûts che chescj a vevin di vê, al definive il
formât des taulis grafichis e i simbui di doprâ par segnâ lis lesions
struturâls e lis demolizions. Il DT2 al meteve adun lis Racomandazions pe riparazion struturâl dai edificis di muradure, al
furniveduncje lis istruzions su lis
tecnichis e lis tecnologjiis di aplicâ par consolidâ e fâ deventâ antisismics i
edificis di muradure, tignint cont dai diviers gjenars di costruzion. Disvilupât
su la fonde dai prontuaris publicâts dal Centri di Ricercje Aplicade e di
Documentazion (CRAD) istituît de Cjamare di cumierç di Udin in colaborazion cul
ZRMK di Lubiane, e su studis di altris istitûts, fra chescj il Politecnic di
Milan, il DT2 al fo inzornât plui voltis daûr des esperiencis pratichis cumuladis
sul puest cu la ricostruzion. Il DT4 al jere dedicât ai capitolâts di apalt e
al sclarive cemût regolâ i rapuarts tra i ents apaltadôrs e lis impresis di
costruzion, ripuartant la descrizion e lis carateristichis dai materiâi di
doprâ. Il DT5, plui cognossût come 'Liste unificade dai presits', al
standardizave a nivel economic lis vôs che si podevin meti dentri tai
capitolâts. Se il DT6 al furnive istruzions su la procedure di osservâ e su la
modulistiche di doprâ par realizâ un intervent public progjetât dai grups B, il
DT7 al definive i parametris tecnics e economics che a coventavin par decidi se
e valès la pene lâ indevant a riparâ un edifici.
I 14 documents tecnics publicâts tra il mês di Otubar
dal 1977 e chel di Dicembar dal 1981 – il numar 15, dedicât ai dâts finâi de
ricostruzion, ancje se al jere stât anunziât nol fo mai editât – a jerin tescj
complès par contignûts e proceduris, ma facii di consultâ e, cun esemplis
pratics, a jerin indreçâts a professioniscj e aziendis. Cemût che al disè
Luciano Di Sopra, a puartarin "une razionalizazion significative di dut il
procès, in rapuart a une azion atomizade in desenis di miârs di câs particolârs».
Incargât de Regjon di elaborâ la stime dai dams, Di Sopra al fasè un lavôr
decisîf sedi tal classificâ lis zonis colpidis dal sisme, che a riceverin i
aiûts economics, sedi tal definî lis liniis vuide di une pussibile leç cuadri
nazionâl par frontâ lis calamitâts che, dut câs, e restà dome su la cjarte.
Il secont organisim multipli che al operà dentri de
Segretarie Gjenerâl Straordenarie al consisteve dai Grups di lavôr B. Ognidun di lôr al meteve adun i tecnics pe
progjetazion, direzion, assistence e contabilitât dai lavôrs e pe verifiche de
lôr esecuzion regolâr; si 'nt formarin 56, che a cjapavin dentri ducj i Comuns
taramotâts: ogni grup al veve 9 membris. In dut, a parteciparin 162 inzegnîrs,
125 architets, 220 gjeometris e 77 perîts edîi, supuartâts di 8 societâts di
progjetazion. Stant che a operavin in maniere direte sul teritori, i Grups B a forin fondamentâi pe
aplicazion dai contignûts dai DT tes voris di ricostruzion.
Cemût che si à vût dit, la leç n. 30 dal 1977 i permeteve
al singul citadin di sielzi se riparâ o ricostruî la sô cjase in autonomie o se
delegâ cheste operazion al public. Tal prin câs, al bastave presentâ lis
domandis ai Comuns che a istruivin lis pratichis e, se il risultât al jere
positîf, a concedevin daurman i contribûts. I impuarts a podevin rivâ al 60% o
al 80% de «sume ametude» e a vignivin dâts fûr in trê ratis, cul 50% di chestis
che al rivave cuant che a tacavin i lavôrs. La spese ametude si le calcolave
daûr dai limits su la volumetrie dal edifici, de destinazion di ûs e dal numar
di unitâts imobiliârs che la struture e veve dentri. Il Grup B, che al veve competence tal teritori, al verificave la
regolaritât dal progjet e la coerence dal impuart stimât, aprovantlu o
domandant modifichis o integrazions. «A cualchidun», al à scrit l'inzegnîr
Diego Carpenedo, membri dal Grup A, «i pareve riscjôs dâur ai sindics il compit
di ricevi lis domandis dai citadins, di istruî lis pratichis colegadis e di assegnâ
i contribûts, par vie de piçule dimension di tancj comuns dal cratêr e duncje
de lôr modeste operativitât. I fats a faserin cuintri a cheste vision
pessimistiche, e a confermarin ancje la ecelence de assistence tecniche furnide
dai Grups B al servizi dai comuns». La pussibilitât pai privâts di procedi in
cheste maniere e permetè di inglobâ une nebulose di piçulis impresis, di
artesans e di lavoradôrs singui che se no a saressin restâts fûr de
ricostruzion, e che invezit le puartarin insom in pôc timp.
Se, al contrari, il citadin privât al rinunziave al
contribût e al lassave al Comun ducj i adempiments tornant in possès de unitât
imobiliâr cu la fin dai lavôrs, i Grups B
a viodevin di dute la procedure, de progjetazion ae direzion dai lavôrs. In dut,
il 40% di chei che a vevin dirit al sielzè l'intervent public, massime i
citadins mancul benestants, pandint une fidance straordenarie inte
aministrazion publiche che e calamirà un grum i coscj dal procès di
ricostruzion di chê edilizie privade che e veve patît dams.
Tes intenzions, il Grup
B al varès vût di compensâ lis carencis dai uficis tecnics comunâi, che
dispès a vevin un organic limitât. Il lôr jessi sotdimensionâts e no adats par tornâ
a fâ sù paîs intîrs a forin ostacui che a vignirin fûr a clâr in dute la lôr
impuartance, e che il sisteme metût in vore al rivâ a compensâ dome in part. I
professioniscj dai Grups B no
supuartarin i tecnics dai Comuns in maniere esclusive, puartant indevant la lôr
ativitât professionâl privade. Ancje Chiavola al fevelà dai risultâts modescj
otignûts de colaborazion tra public e privât, che al atribuive aes «pressions
dai citadins e dai Sindics». Il zovâsi di libars professioniscj «al puartâ a brusâ
la operazion, causant inconvenients di caratar gjenerâl».
Chel altri orghin speciâl che al à caraterizât il Model
Friûl al fo l'Ufici Operatîf Centrâl, za tratât, che al ve il compit di fâ
partecipâ ducj i partîts principâi inte risoluzion di cuistions di grant
interès gjenerâl, come i apalts.
Si à di ricuardâ ancje il personâl tecnic e aministratîf
de Regjon Autonome Friûl-Vignesie Julie, che i rivà intor une vere burascjade,
buine di savoltâ cualsisei ritmi lavoratîf abituâl. Nassût pôc plui di dîs agns
prin, il gnûf ent regjonâl nol pative ancjemò di chê dilatazion cence control
des competencis e des plantis organichis che a varessin caraterizât il regjonalisim
talian dopo de nassite des Regjons a statût ordenari. Ancje par chest motîf, e
magari ancje pal fat che li e lavorave une gnove gjenerazion di funzionaris, il
personâl regjonâl al dimostrà tal complès une grande dedizion e impegn.
No dut, in conclusion, al
funzionà cemût che al varès vût e cemût che al coventave, e no dome par vie de
complessitât dal moment e de enormitât dai compits che il mont de economie, de
politiche e de aministrazion publiche si cjatarin a frontâ; la rispueste de
classe dirigjente tecniche dal Friûl-Vignesie Julie, dut câs, e fo in gjenerâl une
vore rilevante.