Conservâ la organizazion urbane: i Plans detaiâts di Vençon e di Glemone

I intervents e lis proceduris metudis in vore pe ricostruzion dai centris storics di Glemone e Vençon a rapresentin te maniere miôr la strategjie doprade par mantignî l'asset urbanistic de aree taramotade e contribuî cussì ae sô rinassite, deventant un dai elements distintîfs dal Model Friûl.

Dopo di vê stabilît i criteris e lis proceduris par assegnâ i fonts, la Regjon e sospindè il procès di aprovazion dal Plan Urbanistic Regjonâl Gjenerâl (PURG) pe zone tocjade dal taramot e e definì il percors par lâ indenant cu la aprovazion des leçs regjonâls n. 33 dal 1976 e n. 63 dal 1977: dutis dôs lis misuris a anticipavin une ricostruzion vuidade dai struments urbanistics e, in particolâr, dai Plans detaiâts preparâts dai Comuns. E fo soredut la leç regjonâl n. 63 a inviâ diviersis inovazions, prin di dut, cemût che al à spiegât l’architet Giorgio Dri, cul assegnâ ai Plans detaiâts lis «funzions di variantis dai plans regoladôrs o dai programs di fabricazion cuant che no rispietavin lis disposizions dal strument superiôr. Te stesse maniere, la aprovazion dai Plans detaiâts e rapresentave une declarazion di utilitât publiche e di improrogabilitât e urgjence di dutis lis oparis e i implants previodûts dal plan stes».

La planificazion urbanistiche e ve un rûl indiscutibil te fase di ricostruzion, cemût che e à dimostrât une ricercje realizade dal CNR par cont dal Consorzi regjonâl tra lis cooperativis di progjetazion dal Friûl-Vignesie julie (Con-coop). Il studi al ricognosseve la impuartance dal lavôr fat in sinergjie dai professioniscj e des aministrazions publichis, che a elaborarin plans bogns di rispietâ i aspiets derivâts de proprietât fondiarie e des stratificazions storichis dai lûcs. La cussì clamade planificazion ‘a cjadene’ e semplificà dut il percors. E fo une sielte strategjiche che, cemût che al sclarì l'assessôr regjonâl pe Ricostruzion Salvatore Varisco, e permetè di tacâ daurman «la planificazion atuative, cul separâle dal rapuart jerarchic subordenât a chê urbane gjenerâl e comprensoriâl inte suaze dai orientaments e des metodologjiis dal Plan Urbanistic Regjonâl».

A Glemone, par esempli, il plan al stabilì la assegnazion des proprietâts e la prefigurazion morfologjiche dal progjet edilizi. A Osôf, invezit, il strument urbanistic si disvilupà intun plan cuadri par passâ dopo a un nivel di specificazion urbanistiche e ae definizion planivolumetriche, lavorant sul asset fondiari dome te ultime fase. A Dartigne e a Buie si meterin in vore proceduris similis, intant che a Tarcint, unic câs in regjon, la ricostruzion dal 'Compart B2' (une aree dal centri storic) e passà par un concors di ideis: un grup di proprietaris, cun dentri ancje il Comun, al costituì un consorzi e al domandà a cuatri professioniscj innomenâts di presentâi lis lôr propuestis. Il progjet vincidôr al fo chel dal architet udinês Gianni Avon, che po al ve il compit di realizâ un dai edificis. 

Il Plan detaiât pe ricostruzion de aree centrâl di Glemone al aplicà ad implen il principi dal 'cemût che al jere, li che al jere', rispietant la linie dai fronts edilizis (segnade cuntune linie puntinade o continue a seconde che e ves un valôr indicatîf o prescritîf pe costruzion dai gnûfs volums), la forme dal lot e dal front stradâl, configurant la idee dal contest in verticâl e orizontâl. Il plan al favorive elements edilizis lineârs e coerents, al stabilive la sacomadure ortogonâl dai cuarps di fabriche (par facilitâ l'inlineament continuât dai fronts e la fature regolâr dai cuvierts), l'incurnisâ cun pieris lis viertiduris (par condizionâ lis lôr dimensions e il rapuart dai plens e dai vueits intes façadis cu la proporzion tradizionâl), e la finidure dal difûr limitade ae stabilidure semplice.

L’obietîf nol jere chel di tornâ a fâ sù la vecje Glemone: «Il timp straordenari, fluit, ecezionâl di dopo de catastrofe – al spiegà l’architet che al firmà il Plan, Giovanni Pietro Nimis – al conseave di evitâ soluzions 'sieradis', che a saressin stadis arbitrariis intal compit delicât di ricostruî une citât disdrumade mantignint la sô memorie». Il Plan pensât di Nimis al frontave i elements urbans essenziâi, par esempli la agjibilitât interne dai volums, al rimandave lis decisions no necessariis o urgjentis par specificâ invezit lis oparis che si vevin di fâ dentri dai volums edilizis, stant che la assegnazion dal finanziament public e domandave plui detais. Par superâ lis complessitâts leadis al alt nivel di stratificazion des proprietâts tal centri storic, dopo vê analizât i sfueis dal catastic, si definì une rêt morfologjiche dulà che si zontarin i intervents unitaris che a podevin agregâ dentri di un stes perimetri, in areis unitariis, plui parteselis.

Un altri element cu la stesse valence pe rinassite di Glemone al fo l’inviament de progjetazion edilizie partecipade. Clamâts a partecipâ a une serie di riunions, i proprietaris di ogni aree unitarie a deciderin cuasi subit di associâsi par assegnâ un apalt comun a une imprese uniche. Il rûl dai architets al fo centrâl tal mediâ e meti adun un grant numar di domandis singulis individuâls, cjapant sù lis dibisugnis pandudis dai citadins e rielaborant dut chel materiâl in formis praticabilis, in mût che ducj a podessin fâlis lôr e ricognossilis. Par tancj professioniscj si tratà di une esperience uniche, che e sburtà a slontanâsi de ideazion su la taule di dissen, dispès nivelade su regulis estetichis, par trasformâ la progjetazion intune sorte di terapie sociâl 'ansiolitiche'.

Il borc medievâl di Vençon, monument nazionâl dal 1965, al è un altri esempli di ricostruzion di sucès. Disdrumât dal taramot, al tornà sù dal dut 'cemût che al jere', cu lis stessis pieris, par anastilosi: dividudis par palaç e par zone, daûr dai criteris stabilîts intun vêr plan di recupar, lis maseriis a forin trasferidis tai Riui Blancs, intune aree difûr dal paîs. Ogni piere, e tra chês lis trê mil dal domo, e fo catalogade e tornade a doprâ te ricostruzion dal borc storic.

La partecipazion popolâr e fo decisive pe rinassite 'filologjiche' di Vençon, domandade intal Avost dal 1977 dai abitants cuntune racuelte di firmis, dal Comitât istituît ai 19 di Març di chel stes an, e dal Comitât di Coordenament pal Recupar dai Bens Culturâi (CCRBC) di Vençon, in ativitât dai 7 di Mai dal 1976. A cjâf dal moviment popolâr a jerin il professôr Remo Cacitti e la insegnante Miriam Calderari, e un grup straordenari di inteletuâi, che cence di lôr la ricostruzion e varès cjapât cuasi sigûr une altre strade.

Supuartât dal vincul ministeriâl in vore dal 1965, de documentazion esistente e de decision che il Comitât di setôr dal Consei nazionâl dai bens culturâi e ambientâi al veve cjapât intal Dicembar 1977, il Comun al refudà la idee di ricostruî il centri storic doprant modui residenziâi prefabricâts. Invezit, al cjapà sù il progjet campion presentât dal Comitât ai 19 di Març, in contrast cu la propueste vignude fûr dal concors di ideis bandît de Provincie di Udin e de Associazion taliane dai produtôrs di prefabricâts. Il 'Plan detaiât pe ricostruzion dal centri storic di Vençon', elaborât dal professôr Romeo Ballardini, che al jere za un membri dal Comitât di setôr dal Consei nazionâl dai bens culturâi, al fo adotât ai 23 di Avrîl dal 1980 e fat bon in maniere definitive de Regjon ai 19 di Lui dal 1980. Intant, intal Dicembar dal 1979, al jere deventât operatîf l'ufici dal centri storic cun funzions di coordenament de ricostruzion, diret dal stes Ballardini.

Il plan definitîf si fondave suntune ricercje cognossitive precise dal abitât, derivade dai catastics storics e de documentazion di prin dal taramot confrontade cui rilevaments fats dopo dal sisme. La progjetazion esecutive dai isolâts dal centri storic e jentrave tai detais di ogni opare, des fondazions e dai mûrs fin ai particolârs costrutîfs, ai sieraments o aes pavimentazions dai puartis. Par evitâ intarts e garantî la uniformitât dai intervents dentri dai isolâts, il Plan detaiât al previodeve di procedi cu la espropriazion temporanie des proprietâts, la esecuzion dai intervents e la riassegnazion des abitazions, dopo finîts i lavôrs, a chei che a 'nt vevin dirit, e che in ogni câs a verin la cjase tant plui tart di chei altris taramotâts.

Ancje la ricomposizion dal domo di Vençon e fo esemplâr. Lis pocjissimis parts che si jerin salvadis a forin consolidadis e restauradis, intant che i blocs di piere dai mûrs dal perimetri a vignivin recuperâts des  maseriis e, in gracie dai rilevaments fotogrametrics za fats, a vignivin ricognossûts e metûts te posizion precise dulà che a jerin prin di colâ jù, integrant la ricostruzion parziâl e residuâl cul recupar des muraduris e l’ûs di materiâi gnûfs (ancje dal beton armât rinfuarçât cun armaduris).

Vençon al reste un câs di studi simpri atuâl, tant di deventâ un laboratori a cîl viert: chest fat lu conferme la istituzion de Scuele antisismiche internazionâl, SERM Academy (Sismic Emergency Response Management), volude de Regjon, de Universitât dal Friûl, de Associazion dai Comuns taramotâts e dai sindics de ricostruzion dal Friûl e dai Vigjii dal fûc. Inaugurade dîs agns indaûr, ai 7 di Mai dal 2016, te vecje frazion di Puartis, disabitade pal pericul di un slac, la Scuele e dopre lis ruvinis dai edificis sdrumâts dal taramot par permeti ai esperts di svilupâ lis tecnichis di prime emergjence e di metude in sigurece.