‘Cemût che al jere, li che al jere’ o new towns?

La decision di ricostruî il Friûl ‘cemût che al jere, li che al jere’ e fo imediade. Za tal articul 1 dal decret leç 227 dai 13 di Mai dal 1976, Providencis pes popolazions dai comuns de regjon Friûl-Vignesie Julie tocjadis dal taramot dal Mai dal 1976, si definì in maniere clare la linie che si veve di tignî: «La ricostruzion si varà di fâle tes areis di insediament dai abitâts che a esistin za». Uniche deroghe, la presince di «prevalents motîfs tecnics» che a obleassin a costruî di une altre bande. Il Stât, duncje, al fasè buine chê che a clamarin la “linie furlane”, za doprade tal instalâ lis tendopolis in ogni frazion di ogni comun, cun chê di no fâ lâ vie lis fameis e tutelâ la identitât dai borcs esistents.

Cualchi professionist afermât, invezit, al sburtave bande une idee di ricostruzion plui dongje des tindincis dal moment, che si sarès rifletude, come che o viodarìn, tal ridefinî il scheme urbanistic dal teritori. Cheste ipotesi no rapresentave la soluzion miôr pal Comissari Zamberletti, che al fo tra i prins a meti in vuaite la popolazion sui pericui di une impostazion dal gjenar. Compagn il sindic di Udin, Angelo Candolini, ancje se al varès vût plui di cualchi interès tal meti in vore la idee di un ‘grant Udin’. Candolini al pandè il so pinsîr tes pagjinis dal «Corriere della Sera»: «Divuardi lôr – al disè – se a lassaran che a rivin i urbaniscj a ‘ripensâ’ i nestris paîs».

I taramotâts a vevin pôre che ancje in Friûl si inviàs un procès di ‘vaiontizazion’, come che al jere sucedût dongje tal cjanâl de Plâf dopo de catastrofe dal 1963. Par tornâ a fâ sù Longaron, di fat, il Stât, pe prime volte tal dopovuere, al veve decidût di privilegjâ la urbanistiche e la necessitât di disvilupâ un plan di ricostruzion de citadine daûr di une vision teritoriâl complessive, cul intervent dal IUAV (Istitût Universitari di Architeture di Vignesie) te figure dal diretôr Giuseppe Samonà. La gnove Longaron, costituide (almancul te idee iniziâl) di blocs edilizis distints, cjasis a tor e edificis in linie che a riclamavin modei des new towns britanichis – une soluzion che e sarès podude jessi un esempli pe ricostruzion dal Friûl – dodis agns dopo de tragjedie e vignive za calcolade tant che un faliment: «Cui che al pense ai urbaniscj, che al pensi invezit a Longaron, al timp e ai bêçs butâts vie dopo dal Vaiont» al marcà Candolini, che al sierà cun chestis peraulis: «No, nissun al à di vignî a ridissegnâ i nestris paîs: o volìn tornâ a fâsai sù nô, di bessôi».

Il Vaiont nol jere l’unic câs negatîf cjapât in considerazion. Te val dal Belìce, colpide dal taramot tal 1968 e che si jere daûr a ricostruî, un plan “rivât dal alt”, su progjet dai inzegnîrs dal Istitût Superiôr pe Edilizie Sociâl (ISES), al veve puartât a bandonâ il borc di Gibellina e a edificâ il gnûf paîs a 18 km dal sît origjinâl.

Tra lis propuestis di ridefinizion urbanistiche dal Friûl taramotât plui famosis, o ricuardìn chês realizadis dal inzegnîr milanês Roberto Guiducci e dal architet furlan Marcello D’Olivo.

Guiducci, che al veve fondât la Tekne, une des societâts di inzegnarie plui grandis in Italie, tai agns Setante al veve colaborât ae redazion dal Plan Urbanistic Regjonâl Gjenerâl (PURG) dal Friûl-Vignesie Julie che però, tal Avrîl dal 1976, un mês prin dal taramot, nol jere ancjemò stât fat bon. Il Plan Guiducci al previodeve un ‘as fuart’ cuntune vocazion industriâl e une capacitât di cressite che si slungjave di Triest a Sacîl, passant par Gurize, Udin e Pordenon, e che al jere un riferiment par un Friûl plui ‘debil’ che al cjapave dentri la mont e la basse planure. Tes previsions dal inzegnîr, daûr di un moviment naturâl di contrazion e espansion, lis parts svantazadis si saressin a man a man disvuedadis a pro dal cûr dal svilup, dividint il spazi regjonâl tra lûcs di lavôr e lûcs dal timp libar. Il sisme, duncje, al varès rapresentât la ocasion par favorî chest procès, e ‘movi’ 80 mil abitants dilunc dal as Udin-Pordenon e su un ‘grant Udin’ destinât tal timp a dopleâ la sô popolazion e rivâ a cuasi 200 mil residents.

Se la propueste di Guiducci no le di là di une discussion margjinâl dentri dal PURG, tant che no son dissens progjetuâi, chê realizade di Marcello D’Olivo adun cuntune societât di progjetazion romane e jere plui elaborade. Ancje la stampe nazionâl e frontà la cuistion: cul intart che si jere cumulât par inviâ la ricostruzion, si domandave cemût mai che no vessin inmò calcolât chei plans urbanistics e teritoriâi di pront intervent. Intune prime propueste pe ricostruzion de aree cjapade dal sisme, D’Olivo al imagjinà un anel stradâl a cercli cuntun diametri di 14 km che al varès cjapât dentri, a Nord di Udin, i paîs di Buie, Maian, Trep Grant, Colorêt di Montalban, lassant fûr Glemone. Dilunc de circonference si varès fat sù sîs centris residenziâi gnûfs, ognidun di cirche 2 mil abitants, realizâts tignint cont di criteris di sostignibilitât ecologjiche che D’Olivo al veve studiât par agns.

Po dopo e fo presentade ancje une seconde soluzion, diferente de prime a nivel formâl, ma cu la stesse logjiche, cuntun percors stradâl no plui a cercli, ma che al leve daûr de topografie origjinarie cuvierzint une aree plui grande, di Vençon fin a Tresesin. Compagn che te prime propueste, ancje in chest câs dilunc dal percors si varès costruît insediaments di cirche 2 mil abitants. In plui, a pet de prime soluzion, intai 12 paîs esistents D’Olivo al dissegnà gnovis zonis residenziâls, dutis in forme di miezelune, cul clâr fin di dâur ai gnûfs paîs une struture formâl diferente di chê za presinte. Lis propuestis di D’Olivo a smiravin a assegnâi ae ricostruzion une forme architetoniche globâl e gnove, cu la sperance di evitâ chê edificazion slargjade e disordenade che po, in part, si viodè ator.

Lis soluzions di Guiducci e D’Olivo par une ricostruzion ‘centralizade’ dal Friûl, in particolâr chê di D’Olivo, visionarie e masse lontane de realtât, a levin a clâr cuintri de linie dal ‘cemût che al jere, li che al jere’: tant i taramotâts che i politichis no concuardarin cun chês propuestis, interpretadis subit tant che sieltis rivadis dal alt.

Une new town però, ancje se piçule, e fo realizade istès. I ‘motîfs tecnics’ contignûts tal articul 1 dal decret leç n. 227, che tal câs di Puartis, la frazion di Vençon logade su la rive dal Tiliment, a jerin peâts a un front di slacs che ancjemò vuê al menace la zone, a oblearin i aministradôrs a decidi di bandonâ l’abitât storic e di tornâ a fâlu sù di plante fûr. No cate la oposizion iniziâl dai abitants, che prime de scosse di Setembar a vevin picjât te jentrade Sud dal paîs cartei une vore clârs: «Puartis al reste in Puartis», «Puartis al à di rinassi achì», il progjet al fo puartât insom. Ai 15 di Dicembar dal 1978, dopo di discussion ferbintis, si costituì la Cooperative Nuova Portis e si assegnà la sô progjetazion al architet Roberto Pirzio Biroli. La costruzion e tacà tal Avost dal 1979 e ai 28 di Novembar dal 1981 si fasè la cerimonie di consegne des primis cjasis. Tal articul publicât la dì dopo sul «Messaggero Veneto», il cronist al presentà Nuova Portis tant che un preseabil «esempli de volontât di riprese dal Friûl».

Finît tal Lui dal 1985, il cantîr di Puartis Gnûf al deventà un esempli di ricostruzion partecipade parcè che, par rivâ al obietîf, a jerin stadis consultadis lis fameis e rispietadis lis parteselis catasticâls dal vecjo borc dongje. Cualchi an dopo, il stes Pirzio Biroli al rimarcà la impuartance di cheste esperience: «Par cirî di fâ architeture e lavorâ pe architeture cu lis cooperativis di proprietaris o cun cui che al veve dirit ae cjase, o ai provât a realizâ alc di uman, che si podès comunicâ, trasmeti, ereditâ, obietîfs modescj, ma concrets, che ducj a podessin confrontâ e che a permetessin procès di partecipazion».

Intant che il dibatiment teoric su la impostazion teritoriâl di dâ al Friûl al leve indenant vivarôs, e scomençà la ricostruzion, gjestide de Regjon cuntun spirt di colaborazion comun a ducj i partîts e cul supuart des Provinciis, dai Comuns, dai Ents teritoriâi. Intai paîs dulà che, a dispiet dai dams une vore seris e dal grant numar di edificis sdrumâts, la struture urbane tal complès e veve ret, si le dilunc cul recupar, confermant i plans regoladôrs o i programs di fabricazion che a esistevin za. Nol fo nancje tant dificil prontâ cun rapiditât, tes zonis li che al coventave, plans detaiâts di risanament che a limitassin lis espropriazions, fasint in mût che si rivàs a recuperâ la plui part des infrastruturis esistentis.

E fo creade la Segretarie Gjenerâl Straordenarie regjonâl, l’orghin tecnic sientific de ricostruzion, diret dal inzegnîr Emanuele Chiavola, un professionist cun grandis competencis tecnichis e capacitâts umanis e politichis fûr dal comun. Si metè in pîts, no cence tensions e conflits, un vêr ecosisteme, dulà che dutis lis parts si integrarin, fin a completâsi, e che al rivà a garantî une maniere comune di operâ, di là dal completament puntuâl e tempestîf des voris programadis. Si scoltarin lis contestazions, la cuintriinformazion, la ‘critiche militante’ che e veve rapresentât e metût in struc lis istancis dal ‘popul des tendis’. Cun cheste capacitât di sintesi, cun chestis ideis il Friûl si invià sul troi de ricostruzion.