Za prin dal 1976 tancj taramots disastrôs a
vevin scjassât il Friûl. Ae fin dal Votcent il gjeolic Annibale Tommasi al veve
fat une liste di 190, ancje se tancj di lôr a jerin stâts manifestazions minôrs
o a fasevin part di une code sismiche: di fat, 126 a forin catalogâts tant che
events locâi. In dì di vuê, lis basis di dâts plui inzornadis, come il Catalic
Parametric dai Taramots Talians, curât dal Istitût Nazionâl di Gjeofisiche e
Vulcanologjie (viôt culì),
a ‘nt ripuartin a centenârs.
Il prin sisme documentât in Friûl al è chel che
al à savoltât Aquilee tor dal an Mil, scuviert dal inzegnîr Gaetano Ferrante
tal 1853 intant che al studiave i dams patîts de basiliche di Marie Assunte tal
998 par vie di «un taramot che no dome al sdrondenà e sdrumà edificis, ma che
par vie di chel a colarin citâts interiis». Ferrante nol à sclarît se al fos il
stes «taramot grant e spaventôs» che tal 1001 al scjassà Verone e la lagune
furlane. Il prin par gravitât te Ete di Mieç, invezit, al fo dal sigûr chel dal
1117 (o 1116, daûr di altris datazions). Par Ludovico Antonio Muratori, intai Annali
d’Italia, e prime di lui l’abât Gian Francesco Palladio degli Olivi tes Historie
della Provincia del Friuli, il taramot dal 1117 al tocjà lis tieris
todescjis «e in particolâr la Italie». Muratori al à scrit che lis scossis a
lerin indenant par cuarante dîs, Palladio degli Olivi, invezit, al contà che a
vignirin jù lis toratis di difese dal munistîr e de basiliche di Siest.
A misdì dal dì di Nadâl dal 1222 un «terribil
Tremuoto», cuntune scjale di magnitudo dal moment stimade di 5,68 (Mw 5,68), al
cjapà dentri la Lombardie, la Ligurie, la Emilie, il Venit e il Friûl. La citât
plui fiscade e fo Bressie, in Friûl i dams plui grâfs ju patì Cividât. Une des
consecuencis pe citât ducâl e fo che il patriarcje al le a stâ a Udin, dulà che
il sisme al jere stât mancul fuart, favorint il disvilup de «vile de Udin» in citât.
Tal stes secul, ai 23 di Avrîl dal 1279, un taramot «fuartissim» al fasè vignî
jù cetancj cjistiei dal Friûl.
Dopo dome 22 agns, ai 11 di Jugn dal 1301, un
altri sisme une vore violent «al causionà la ruvine di tantis cjasis in cierts
lûcs dal paîs» e, al zonte Francesco di Manzano, subit daûr al rivà un «burlaç
trement cun tampieste gruesse tant che un ûf di gjaline, e in particolâr tal
teritori di Cividât, cussì che par cualchi an cheste regjon e restà vitime de
miserie». Ma un dai taramots plui disastrôs di dute la storie dal Friûl, e de
Italie, al fo chel dai 25 di Zenâr dal 1348 (Mw 6,63), tal stes an che in
Italie e in Europe si jere discjadenade la peste nere. Su la fonde des fonts
storichis, al pâr che al sedi stât il plui fuart a Nord dal Po. L’epicentri al
fo tes Alps Juliis e lu sintirin in Venit, Lombardie, Emilie, Austrie fintremai
te Baviere e te Dalmazie. Al fasè miârs di muarts e dams fûr di misure. A Udin
al sdrumà une part dal cjistiel e dal palaç patriarcjâl, a Aquilee e vignì jù
un toc de basiliche, a Ruvigne, Flavuigne, San Denêl, Tumieç e Sacîl a colarin
cjistiei e palaçs. Nancje Glemone e Vençon no scjamparin a cheste devastazion.
I dams plui grancj a forin tes tieris arciducâls: la rive meridionâl dal massiç
dal Dobratsch e slacà e a Vilac a restarin in pîts dome lis cjasis di len cence
fondis. Dal 1348 al 1511 Tommasi al cjapà note di nûf events sismics, par plui
locâi, che no faserin tancj dams ancje se daûr des cronichis «a ruvinarin
cualchi edifici».
Ai 26 di Març dal 1511, juste un mês dopo de rivolte de zobia grassa (joibe grasse) dai 26 di Fevrâr - un riviel
sanganôs tra fazions filovenezianis e filoimperiâls che di Udin si slargjà a
buine part dal Friûl – un altri teribil taramot (Mw 6,32) al scjassà une grande
aree montagnose dongje dal confin atuâl tra Itale e Slovenie. Lis scossis a
lerin indenant fintremai il mês di Avost e lis sintirin in dut il Venit,
massime a Vignesie, e in Romagne. I croniscj a contarin che al fo «il plui
spaventôs che a Udin e in Friûl al fos mai stât». A Udin a vignirin jù di gnûf la
plui part dal cjistiel e dai mûrs de sô cengle, la lozute de glesie di Sant
Zuan, il cjampanili e la glesie di Sante Marie e tantis cjasis. Ancje il domo
al patì dams: Palladio degli Olivi al conte che di insom «e colà jù une spice
che e disfà il cuviert e e distaponà cualchi tombe di chei che a jerin muarts
tai riviei de joibe grasse». A Cividât il taramot al sdrumà 28 cjasis, il
cjampanili e une tor dal munistîr maiôr. La bugade di distruzion e rivà ancje a
Osôf, Sacîl, Pinçan, Faedis, Tarcint, Murùs, Colorêt, Feagne, Vilalte e
Dartigne. A Pordenon, invezit, i dams a forin pôcs.
Dopo dal 1511, tal secul XVI al è stât cuasi un taramot par an: Tommasi a
‘nd à contâts passe 50, no ducj violents, nissun disastrôs come chel dal 1511.
Tal Sîscent, invezit, lis cronichis a ripuartin events rârs, contrari che tal
Sietcent, un altri secul tibiât di tancj events telurics distrutîfs, che vuê o
cognossìn in graciis de ativitât simpri plui costante e atente di studiôs e
croniscj.
Ai 28 di Lui dal 1700 une scosse di intensitât fuarte (Mw 5,70) e scjassà
Enemonç, in Cjargne. In chê ocasion «e tremà la tiere, a vignirin jù cjasis, i mûrs de glesie si creturarin e a
muririn sîs personis». Dopo dai events dal 1746, 1750 e 1776, a Tramonç e a
Midun (Mw 5,86), la scosse dai 20 di Otubar dal 1788 a Tumieç (Mw 5,19) e fasè
vignî jù il domo e uns cuarante cjasis, sepulint tantis personis. Chê dai 26 di
Zenâr dal 1790, cul epicentri a Sudri, e ruvinà tancj edificis e tra chei la
fabriche di telariis Linussio a Tumieç, che in chê volte e jere une des
industriis tessilis plui grandis de Italie, ma che no rivà plui a tornâ in sest
par vie dai dams patîts.
Cul secul XIX, i events consistents o lis
singulis scossis di intensitât basse a tacarin a jessi regjistrâts cuntune
frecuence cuasi anuâl: lis informazions, di fat, a circolavin in maniere simpri
plui fite e ancje i studiôs e i gjornâi a pandevin un interès plui marcât pai
events sismics, che a vevin une origjin e motivazions che la sience no veve
inmò rivât a sclarî. Pal Votcent, si contin in dut 115 segnalazions, un numar
che al conferme che il Friûl al è un teritori une vore tocjât di cheste categorie
di manifestazions fisichis.
Dal taramot te zone di Pordenon dai 25 di
Otubar dal 1812 (Mw 5,62) il furlan Girolamo Venerio, tes sôs Osservazioni
meteorologiche, al à scrit che «al fo gaiart a Belum, Trevîs, Vicence e tal
Garde, ma ancje tal Trentin e te Baviere», regjistrant fin a Zenâr dal
1842 altris 23 scossis lizeris. A chestis, si varessin di zontâ lis 27 che,
daûr di ce che al ripuartave il periodic udinês «L’Alchimista friulano», si
saressin disvilupadis tra Fevrâr e Març dal 1853.
Tra i taramots di intensitât fuarte, no si pues
no ricuardâ chel dai 29 di Jugn dal 1873 che al cjapà dentri Mortean e Sante
Margarite dal Gruagn, ma che al fo «disastrosissim» a Belum li che, come che si
lei tal «Giornale di Udine», la Zonte comunâl «e spesseà di mandâ glace»:
l’epicentri al fo tal Cansei e te Val Pagote, cuntune intensitât straordenarie:
6,29 Mw.
La tiere e tornà a tremà in Friûl tal 1906,
1908, 1910, 1911, 1920, 1924 e 1926, prin de scosse une vore violente (Mw 5,99)
che, ai 27 di Març dal 1928, cul epicentri in Cjargne sul Bottai, e sdrumà i
comuns di Verzegnis e Cjavaç, causant dams une vore grâfs di Paluce a
Çurçuvint, di Tramonç a Vençon.
Ancjemò plui fuart (Mw 6,19) al fo
l’event dai 18 di Otubar dal 1936, cul epicentri tra la Val Pagote e il Cansei,
che si slargjà te zone di Sacîl, Polcenic e Cjanive. Lu sintirin fin a Triest,
e al fasè vitimis e tancj dams, massime al domo di Sacîl. Al è un taramot pôc
cognossût: il regjim fassist al ve miôr no clamâ la atenzion suntun event
tragjic tal an de proclamazion dal imperi e de vuere di Spagne. No si bandì
nissune sotscrizion e i stes gjornâi locâi a fevelarin dal fat dome tes
pagjinis internis, cun cualchi curt rindicont.
Tal secont dopovuere, prime dal taramot dal
1976, altris events sismics a àn tocjât la Cjargne. Dopo une serie di scossis
minôrs, ladis indenant tra il 1954 e il 1957, ai 26 di Avrîl dal 1959 il Cjanâl
di S. Pieri al fo scjassât di un sisme (Mw 5,25)
che, pûr cence fâ muarts, al ruvinà in maniere serie lis cjasis di Zui.