Tal reagjî a un taramot,
la resilience no dipent dome de rispueste inte fase plui critiche de
emergjence, ni de capacitât di recuperâ in maniere eficiente: ce che le influence a fuart
al è trop che il teritori al è preparât al event catastrofic.
Sot chest aspiet, il
Friûl, te metât dai agns Setante dal secul passât, nol veve nissune struture di
pueste pensade par morestâ i dams di un taramot e par frontâ la emergjence: il
so patrimoni abitatîf al jere pe plui part chel des societâts agriculis
tradizionâls e il pericul dal taramot, cun dut che la sismicitât storiche si le
cognossès, al vignive sintût, tant de popolazion che des autoritâts, come une
fatalitât. In cheste impreparazion, il Friûl-Vignesie Julie nol jere dal sigûr
une ecezion tra lis regjons talianis: events che a jerin sucedûts di pôc tant
che il taramot dal Belice (1968) o che a levin plui indaûr tal timp, ma che a
vevin causât distruzions disastrosis tant che il sisme di Messine (1908, 7,1
Mw), la plui grande catastrofe naturâl de storie de Europe par numar di
vitimis, no vevin fat nassi struturis sientifichis o organizativis specifichis
par frontâ i disastris sismics. La prime leç su la Protezion civîl – mandade
fûr dopo de montane di Florence dal 1966 - e jere dal 1970, ma no veve ancjemò
i regolaments atuatîfs che a coventavin par metile in vore.
Prin di dut, par provâ a
spiegâ la reazion straordenarie al impat dal taramot si à di tignî cont di doi
elements. Il prin al è un fat une vore concret: tal teritori dal Friûl, logât
tal cjanton plui a Nordest de penisule taliane e sul confin cu la Republiche
Socialiste Federâl di Jugoslavie, a jerin dislocâts uns 100.000 oms dal esercit
talian: chest al permetè di mobilitâ miârs e miârs di soldâts za subit dopo de
scosse dai 6 di Mai e di meti a disposizion sul teritori, par tancj mês, un
grant numar di oms, furnîts daurman di imprescj adats e bogns di operâ in
maniere autonome e organizade.
Il secont element al è
plui culturâl, se no fintremai psicologjic. Tai sessante agns prime dal taramot
il Friûl-Vignesie Julie al jere passât par doi conflits devastadôrs. La Grande Vuere e jere
stade combatude propit culì: lis sôs distruzions, des Alps al Adriatic, a jerin
stadis catastrofichis, ancje parcè che dopo di Cjaurêt dute la regjon e jere
stade invadude fintremai te Plâf, e sotanade par un an a une ocupazion une vore
grivie. I furlans no si jerin ancjemò ripiâts dal savoltament de Prime vuere
mondiâl, che a vevin scugnût sopuartâ ancje la Seconde, cun vincj mês di
ocupazion todescje e cu la anession di fat al Tierç Reich di Hitler, e une lote
di resistence braurose ma che e veve domandât un presit alt. La esperience
storiche di chestis provis dramatichis e fo pal popul furlan un patrimoni
psicologjic fondamentâl: lu sburtà a frontâ la tragjedie dal taramot in maniere
reative, cence rassegnâsi, cirint di tramudâ la soference in stimul e
motivazion par ricostruî l'avignî.
I doi principis di fonde
doprâts par progjetâ la ricostruzion si palesarin tant che criteris costitutîfs
di une idee cussiente di resilience. Il sproc che al diseve che il Friûl al
veve di tornâ a nassi 'dulà che al jere e cemût che al jere' al de une prime
indicazion su cemût che si veve di reagjî. Decidi di tornâ a fâ sù i paîs su
lis fondis di ce che al jere stât sdrumât, e no di altris bandis, al voleve dî dâ
prioritât ae continuitât des comunitâts e ae permanence dai abitants intai lôr
lûcs; e ancje dâur ai
citadins la responsabilitât di creâ, par se e pai lôr nevôts, la
comunitât dal avignî. Al
è clâr che tornâ a costruî propit 'cemût che al jere' al sarès stât no
dome impussibil, ma ancje antistoric e pericolôs. Duncje, su la base des
cognossincis plui inzornadis di chel timp, midiant di une operazion di
standardizazion tecniche slargjade, par tornâ a fâ sù i edificis si sielzerin tecnichis antisismichis che a
forin perfezionadis ancje daûr de esperience cumulade sul puest. Al fo
un learning by doing grandonon, dulà
che tecnics, professioniscj e maestrancis a imparavin cul fâ.
La rispueste, in
gjenerâl, no fo rigjide, ma e le daûr dal disvilupâsi de situazion. La lezion imparade cu la prime ricostruzion, par
esempli, inviade dopo de scosse di Mai e che chês di Setembar a fermarin a sec
e in cualchi maniere a scancelarin, e fo fondamentâl. Si rivà a capî che
la promesse o la ilusion di trasferîsi in curt 'des tendis aes cjasis' e varès
comprometût la cualitât de ricostruzion e un doman e varès podût meti in
pericul il teritori. In buine sostance, si jere denant di chê che i specialiscj a clamin
'resilience evolutive e trasformative': une rispueste buine di adatâsi ae
evoluzion dai problemis, di vierzisi ai contribûts esternis, cul obietîf di no puartâ insom alc che
nol sarès stât util in curt, ma pes gjenerazions futuris. Un esempli in chest sens al
fo la aplicazion des tecnichis di costruzion antisismichis che a jerin za
stadis sperimentadis te ex Jugoslavie, e che a derin un contribût significatîf.
Ancje il secont principi
vuide de ricostruzion, ancje chel vignût dal bas, o ben dal umôr de popolazion,
cul sproc 'prime lis fabrichis, po lis cjasis e lis glesiis' al pandeve
une indicazion preziose: la idee che la ricostruzion e il disvilup economic e
sociâl si vevin di promovi dutun. Za intal document fat bon ae unanimitât dal
Consei regjonâl al 1n di Fevrâr dal 1977, si faseve riferiment al
Plan Urbanistic Regjonâl Gjenerâl (PURG) scrit pôc prin dal disastri. Si
racomandave di peâ la ricostruzion cul plan gjenerâl di svilup di dut il
Friûl-Vignesie Julie. Cemût che si viodarà, par otignî chest obietîf
paralêl a àn contribuît plui fatôrs, e tra chescj il caratar une vore viert e
proatîf dai imprenditôrs de industrie furlane, pal plui zovins e intune fase di
espansion, che a cjaparin il taramot tant che une sfide di frontâ cun braùre.
Une altre lezion che si
pues gjavâ fûr de esperience dal 1976 in Friûl, e dai agns dopo, e je che la
ricostruzion di un teritori colpît in maniere cussì grivie no pues concentrâsi
dome sui edificis, ma e scuen par fuarce tignî cont de metude in sigurece de
aree tal so complès: midiant di imprescj urbanistics che a àn di definî cemût e
dulà ricostruî, cun intervents specifics di inzegnarie civîl, di gjeologjie
tecniche e idrauliche forestâl par insaldâ struturis e infrastruturis cul fin
di prevignî un doman slacs e criticitâts.
Ancje la atenzion
particolâr tal conservâ e, in cualchi câs, tal tornâ a fâ sù, i lûcs di
socializazion e fo une componente decisive de ricostruzion. Cheste cure pal
contest comunitari e pes relazions si le viodè fin dal principi, inte fase de
emergjence e in chê dopo, inte organizazion des tendopolis, dai insediaments provisoris
e di chei des roulottes, inte sistemazion dai miârs di sfolâts tes
localitâts di vacance vie pal Invier 1976-1977: pardut si ve grande cure di
organizâ spazis comuns dulà che lis personis, massime chês che no levin a vore
vie pal dì, a podessin cjatâsi, passâ il timp adun, par no patî la solitudin e
no avilîsi cul ricuart di cui che nol jere plui. Ricostruî un teritori dopo di
un taramot o dopo di cualsisei tragjedie - chest al è l'insegnament - nol vûl
dî dome tornâ a meti impins i mûrs, fâ funzionâ i uficis o lis fabrichis, ni
tignî dongje une comunitât in mût gjeneric: al vûl dî tignî cont dal spirt di
ogni singule persone, viodi di chês plui fragjilis e di chês che a son restadis
di bessolis. In dut chest, la presince e l'altruisim di miârs e miârs di
volontaris, che in chei mês tant dificii a dedicarin il lôr timp par stâi
dongje al popul furlan, al è stât un dai moments plui alts de storie de nestre
comunitât nazionâl.
Par Stefano Grimaz, lis logjichis de ricostruzion
post taramot «a àn anticipât ce che
lis politichis des Nazions Unidis a clamin vuê Build Back Better (tornâ a costruî miôr), li che il recupar no si
lu calcole tant che un tornâ a un stât dulà che al è dut come prin, ma tant che
une oportunitât par puartâ in miôr dut il sisteme, smirant a gnûfs obietîfs e a
gnûfs nivei di svilup e di cualitât de vite. In pratiche, il procès di ricostruzion al fo la
aplicazion precursore dal concet di resilience trasformative». Cu la
continuazion de autostrade A23 tal toc Cjargne-Cocau, cul dopleament de ferade
Pontebane, cui invistiments tes stradis e tes infrastruturis ancje di fûr de
aree cjapade dal sisme, la ricostruzion dal dopo taramot e je stade un motôr di
cambiament, un aceleradôr di dinamichis di evoluzion dal teritori.
Come che al sucêt in
dutis lis trasformazions une vore sveltis, al è clâr che no si rivà adore di mantignî o conservâ
dut: massime intai prins moments, a forin tancj i edificis butâts jù e
mai plui ricostruîts; ni ducj i contribûts dal 'moderni' a àn pandût il stes
nivel di cualitât e di significât. Un altri element problematic che si ten cont
da râr al è il cost totâl, pai patrimonis des fameis e dai individuis, de
ricostruzion civîl. In plui des sovenzions vudis dal Stât, tantis fameis a
invistirin te cjase ducj i sparagns di une vite e la plui part des lôr energjiis
lavorativis; tantis si indebitarin, ridusint cussì la pussibilitât di destinâ
bêçs a invistiments produtîfs o ai consums. E fo in cualchi maniere, tal Friûl dopo
dal taramot, une sorte di 'petrificazion de ricjece', o almancul dai sparagns,
che e ve ancje consecuencis negativis.
Tancj dai paîs che a jerin
stâts ricostruîts su la plante dal vecjo dissen urbanistic si son vierzûts cui
agns Novante a chê proliferazion urbanistiche cence criteri che e à interessât
tantis zonis de Planure Padane orientâl, segnadis de espansion costante des
areis edificadis e di un ûs intensîf dal teritori a nivel industriâl e comerciâl.
Dut câs, al è probabil che chest destin al Friûl i sarès tocjât istès, come che ur è sucedût a chei
teritoris de Italie che a son jentrâts plui tart tal svilup economic moderni
e duncje tal ultin cuart dal Nûfcent a son passâts par une fase di
trasformazion plui fuarte e radicâl.