Il sisme

Il Friûl-Vignesie Julie al è simpri stât teritori di taramots, cuntune sismicitât storiche ben cognossude e events ancje grâfs: taramots in potence distrutîfs cuntune magnitudo compagne o superiôr a 5.5 (ML 5.5) a son stâts regjistrâts intai ultins vot secui te aree de regjon, cuntune frecuence medie di un ogni 80 agns.

Fin de ete romane i moviments telurics a àn influençât la trasformazion dal teritori, la vite di singui insediaments, des zonis economichis e comerciâls. Tal 1222, a Cividât si regjistrarin dams seris par vie di un taramot che al veve tocjât ancje la Lombardie; compagn tal 1348, cuant che un taramot al sdrumà Vilac causant desenis di miârs di muarts e rivant ancje in Friûl, dulà che al butà jù un toc de basiliche di Aquilee, e tal Venit. Il taramot dal 1511 si disvilupà tra la mont furlane e chel che une volte al jere il Cragn (vuê la Slovenie), aree dulà che la Plache adriatiche e chê europeane si scuintrin. Al sucedè juste intai agns che il Friûl al jere fiscât de vuere e di un violent riviel popolâr: si contarin vitimis in dute la regjon, un maremot a Triest intant che a Udin e vignì jù la vecje fuartece sul cuel, volude dai patriarcjis, che e varès passât il so non (“cjistiel”) al gnûf palaç rinassimentâl. Cuant che ai 6 di Mai dal 1976 il scjas dal taramot al rivà fuart par dute la regjon, in tancj a vevin ancjemò iniment lis scossis dal 1928 a Tumieç, sintudis in diviersis localitâts des vals dai afluents dal Tiliment, e chês dal 1936 tal altiplan dal Cansei. L’epicentri dai doi sismis dai 6 di Mai e dai 15 di Setembar al fo la alte planure furlane daûr Udin e lis cuestis des Prealps subit parsore: un teritori abitât fis, ma ancjemò une vore agricul.

L’orcolat, che pe tradizion popolâr al è une figure mostruose che e vîf tai landris plui profonts de tiere, al à fat cuasi mil muarts, sdrumât paîs intîrs, savoltât la vite di desenis di miârs di personis. La comunitât regjonâl, e cun jê chê nazionâl, e rivà però a reagjî. Come che al jere za sucedût tes dôs vueris mondiâls, che a vevin fiscât pesant chest teritori, e trasformà la tragjedie intune esperience di cressite e inovazion.