Il taramot
dal Friûl dal Mai dal 1976 al è stât il prin event sismic trasmetût in direte
televisive: lis imagjins dal dolôr e de distruzion a jentrarin tes cjasis dai
talians cuntune fuarce che prin no si varès podût imagjinâ. I gjornâi a mandarin
sul puest i lôr inviâts plui impuartants, i media di dut il mont a slargjarin la
gnove, che e rivà ai emigrâts furlans e ai lôr dissendents sparniçâts in ducj i
continents.
L’event
al causà une onde di emozion cence pâr. Dopo de inondazion di Florence, la Italie
dal boom economic e confermà di jessi un Paîs di volontaris: miârs di oms e di
feminis a rivarin in Friûl, prin par sgjavâ o par tirâ sù lis tendis, dopo par
fâ sù i prefabricâts, e ancjemò plui indevant, salacor dome par dâ une man.
Za intai
prins dîs e scomençà a operâ ancje la machine de solidarietât, che si slargjà
planc planc de Italie ae Europe, e plui innà. Tes primis setemanis, midiant di
plui canâi, a rivarin tes zonis colpidis gjenars di prime necessitât, farmacs e
medisinis, vistîts, tendis, roulottes e caravans e ancje donazions di bêçs. Si mobilitarin
i Paîs dongje, prin di dut la Austrie e la Jugoslavie, la Union Europeane (che in
chê volte e veve dome nûf membris), i Stâts Unîts che a mandarin subit il
vicepresident in visite, la Australie, il Canadà e dute la Americhe dal Sud, dulà
che a jerin cetantis comunitâts furlanis, fintremai la Arabie Saudite. A
intervignirin la Glesie taliane e lis diocesis, lis organizazions dai lavoradôrs,
la associazion “Friuli nel mondo” cui siei fogolârs, i cûrs de furlanetât tes
tieris di emigrazion.
Si mobilitarin
i inteletuâi, i scritôrs, i artiscj, i conservadôrs dai museus, dut il mont de culture intune. No si tratave
dome di tignî vive la atenzion sul pericul des demolizions cence criteri, causadis
de emergjence, ma di cjalâ intune maniere gnove il patrimoni architetonic e
culturâl de regjon. Tra lis tantis robis che a saressin restadis dal taramot e
je ancje une cussience gnove su ce che e je la lidrîs, la ereditât culturâl di
un teritori storic.