I bens culturâi

Dopo dal taramot di Mai, al fo clâr subit che si veve di tutelâ il patrimoni storic e artistic danezât, evitant cualsisei dispersion pussibile. Pôcs dîs dopo de prime scosse, Gian Carlo Menis, diretôr dal Museu Diocesan di Art Sacre di Udin, in cunvigne cul sindic Candolini, al prontà te glesie di Sant Francesc a Udin un dipuesit par racuei e restaurâ lis oparis che a saressin rivadis dai principâi comuns taramotâts: la prime a rivâ, ai 14 di Mai, e fo la pale di len prelevade des maseriis dal domo di Glemone. I bens, recuperâts di scuadris di volontaris, a vignivin fotografâts dai students dal Istitût di Art 'G. Sello' di Udin e inventariâts di un grup di studiôs. Fra chescj, a jerin Luciano Perissinotto e Luciana Marioni Bros (viôt culì une interviste) che, intal Dicembar dal 1976, e ricuardave cussì i mês passâts dentri de glesie e il contribût des autoritâts locâls: «Al è stât un impegn sincîr de bande di tancj, sindics, plevans e privâts, par salvâ ce che si podeve». In dut si meterin adun plui o mancul 1.500 manufats.

Dongje di cheste iniziative, che il ministri pai Bens culturâi di chê volte, Mario Pedini, vignût in visite tal 1976 al veve definît «un contribût impuartant pe ricostruzion», tal mês di Mai si ativà ancje la Zonte regjonâl, par istituî simpri a Udin, ma in vie Manzini 35, un secont Centri di racuelte des oparis di art e di tutele dai bens culturâi e ambientâi, ancje chest coordenât dal stes Menis.

Par facilitâ la organizazion des ativitâts di recupar e di traspuart des oparis, si dividè la aree taramotade in vot zonis di intervent che a cjapavin dentri plui comuns, ognidune assegnade a esperts di bens culturâi, cualchidun vignût di fûr regjon: la zone di Glemone (Luigi Menegazzi), di Dartigne (Giuliana Ericani), di Osôf (Roberto Baldissera), di San Denêl (Giuseppe Bergamini), di Tarcint (Mirabella Roberti e Sandro Piussi), di Mueç (Pietro Marchesi e Anna Serra Nigro), de Cjargne (Franco Quai) e di Pordenon (Antonio Forniz e Giuseppe Maria Pilo). Altris ponts di racuelte si meterin sù tal 'Seminari di viâl Ongjarie a Udin, tal Museu civic di Pordenon e tes stanziis dal palaç Cjampeis a Tumieç. Al impegn dal Museu diocesan e de Regjon si zontarin, prin di dut, lis iniziativis dai singui comuns, fra chescj Vençon, li che Remo Cacitti al istituì un comitât locâl e un dipuesit te caserme dai alpins, doprât fin ai 15 di Setembar. In plui, tal Jugn dal 1976,  cuntun decret dal ministri pai Bens culturâi e ambientâi, a fondarin a Rome un 'Comitât paritetic pal coordenament dai intervents sui bens culturâi de Regjon Friûl-Vignesie Julie colpîts dal taramot tal Mai dal 1976', che al veve funzions di colegament e di coordenament dai intervents.

Dopo prontade la machine organizative par meti in sigurece lis oparis ruvinadis, lis istituzions locâls a scomençarin a rifleti sui intervents di fâ par garantî la lôr conservazion.

Ancjemò prin de creazion di un laboratori temporani pal restaur dai manufats di len te glesie di Sant Francesc ai prins di Otubar dal 1976, donât de Provincie Autonome di Trent e dal Stât federâl de Baviere, la aministrazion regjonâl e intervignì par slargjâ lis funzions dal Centri di catalogazion di Vile Manin di Passarian, previodût de leç regjonâl n. 27 dai 21di Lui dal 1971; la leç regjonâl n. 43 dai 16 di Avost dal 1976 e cambiâ i siei compits e i assegnà la redazion e l'inzornament dal catalic dai bens culturâi e la promozion dal restaur, si che duncje ai 7 di Dicembar dal stes an il Centri al fo infin istituît. Ai 22 di Març dal 1977, cu la supervision di Marioni Bros, al scomençà il prin cors di cuatri agns cun aprofondiments teorics e esercitazions pratichis. Une altre leç regjonâl decisive, simpri in materie di restaur, e fo la n. 60 dai 18 di Novembar dal 1976, mandade fûr dopo des scossis di Setembar par finanziâ lavôrs di conservazion, di restaur e di valorizazion di bens mobii calcolâts di interès artistic, storic e archeologjic.

Sul front des pituris murâls e dal patrimoni dai imobii, invezit, e intervignì la Sorintendence, che intune prime fase si impegnà a fâ la ricognizion des oparis tai paîs dal cratêr sismic: si sopontarin tancj edificis storics e si distacarin tancj afrescs dai mûrs malsigûrs, sistemantju su panei provisoriis. Dopo di vê superade la emergjence e verificade la gravitât dai dams, il Stât, cu la leç n. 546 dai 8 di Avost dal 1977, al assegnà ae Sorintendence 100 miliarts di liris pal cuincueni 1977-1981. Il contribût al jere impuartant, ma i restaurs, coordenâts dai sorintendents, i architets Riccardo Mola prime e dopo Pietro Scurati, a lerin indevant biel planc. Tal 1976 la gjestion dai bens culturâi e jere une vore carente. L'Ufici di Udin de Sorintendence dai Bens Culturâi al jere stât istituît dopo dal taramot cun masse pôc personâl par gjestî la emergjence. A inacuarzisi dal disordin di cheste prime fase nol fo dome il Consei pastorâl diocesan che, ai 18 di Novembar dal 1978, cul document La ricostruzion e la rinassite des zonis taramotadis dal Friûl, al pandè il so disacuardi: «La situazion e somee une vore carente ancje par ce che al inten la cuistion dai bens culturâi. Il finanziament straordenari di 100 miliarts [...] al riscje di sfantâsi intune ploie disordenade di intervents cence coordenament, cence nissun plan organic di riferiment ae realtât des zonis taramotadis». Cacitti lu veve fat a Vençon za tes primis oris dopo dal sisme, une vore prin di publicâ, tal 1980, insiemi cuntun grup di inteletuâi impegnâts a nivel nazionâl, Le pietre dello scandalo, il libri blanc su la politiche dai bens culturâi intal Friûl dal taramot.

Par un cambiament di rote si varès vût di spietâ fin al prin di Zenâr dal 1981, cuant che Gino Pavan al cjapà la direzion de Sorintendence. Il so impegn pal recupar dal patrimoni culturâl al fo fondamentâl, tant che al è ricuardât fra i autôrs principâi de 'ricostruzion artistiche' de regjon. Ae fin dal so mandât, intal Zenâr dal 1986, i  bens artistics restaurâts a jerin 670, lis architeturis recuperadis 301.

La Sorintendence e coordenà centenârs di lavôrs di restaur in dute la regjon. Tra i intervents plui complès a son i restaurs dal cjistiel di Udin, dal domo di Glemone, tornât a vierzi al cult intal Zenâr dal 1986, dai mûrs e de ricostruzion dal domo di Vençon che ai 3 di Avost dal 1995 al tornà a vierzi lis puartis ai fedêi. I restauradôrs de Sorintendence a recuperarin ancje tancj ciclis di pituris a fresc, come la decorazion dal Cuatricent te gleseute di Sant Stiefin a Dartigne, un esempli superlatîf di distac e ricolocament sul puest.

Ducj i edificis che no jerin calcolâts «di interès artistic o storic» daûr de leç nazionâl n. 1089 dal prin di Jugn dal 1939 a jerin escludûts di chescj intervents. La situazion e mudà, inte prospetive di une rivalutazion di cheste part dal patrimoni culturâl furlan, cu la leç regjonâl n. 30 dai 20 di Jugn dal 1977, che tal articul 8 e ricognosseve in ciertis architeturis locâls la presince di «valôrs ambientâi, storics, culturâi e etnics» che a justificavin il lôr restaur. Al Servizi regjonâl dai bens ambientâi e culturâi i spietave, su segnalazion dai comuns interessâts, la redazion di une liste, cu la schedadure e la catalogazion, «dai edificis, ancje chei par ûs no residenziâl, danezâts dai events sismics e rapresentatîfs dai valôrs indicâts parsore», che dopo e vignive valutade e fate buine de Zonte regjonâl. In chest mût, di là dai bens culturâi tal sens plui stret, in Friûl si rivà adore di recuperâ e tutelâ plui di 1.500 esemplis di architeture rurâl e spontanie, che a vignirin restaurâts o ricostruîts.

La tutele dal patrimoni e jere compagnade de pôre di gjavâ lis oparis dal lôr contest di riferiment: al jere vitâl che, dopo restaurâts, i bens a tornassin tai lûcs di dulà che a jerin stâts puartâts vie, se si podeve. Il diretôr di cumò dal Museu diocesan, Giuseppe Bergamini, al interpretave cussì la cuistion, par lui «lis oparis de nestre tiere [...] a vevin un sens, a vevin une lôr validitât propit parcè che a jerin dentri intun contest che al fevelave ancjemò ae nestre int». Al deventave indispensabil, duncje, ricostruî no dome lis cjasis singulis, lis glesiis singulis, restaurâ lis oparis singulis, ma «tornâ a creâ l’ambient – un ambient uman, un ambient furlan – che par chel dut chest al jere stât creât». La plui part des oparis si lis tornà duncje a puartâ tai lôr lûcs di origjin, chês plui fragjilis invezit, o chês che a rivavin di edificis vignûts jù dal dut, a forin sistemadis tal Museu diocesan di Udin.

In chest contest, no mancjave la sensibilizazion des comunitâts taramotadis par che nol parès "margjinâl", fra cjasis sdrumadis e ferîts, pensâ ai monuments e aes oparis di art. Par chest fin si faserin in Friûl mostris, dibatits e conferencis. Fra chestis, la 'Cunvigne sui problemis de ricostruzion dal patrimoni storic artistic dal Friûl e sul recupar dai centris storics', organizade a Cividât ai 21 di Novembar dal 1976, e un cicli di conferencis a Triest tal 1977, dal titul 'Friûl 6 di Mai dal 1976', dulà che Menis, cul obietîf di une ricostruzion che e tignìs cont prin di dut de int furlane, al rimarcà che «la ricostruzion plui urgjente e veve di jessi chê de comunitât stesse: al coventave ricostruî il tiessût uman tes zonis disastradis». A chestis iniziativis si zontarin diviersis esposizions di caratar storic artistic. Prime fra dutis 'Oparis mestris di art in Friûl. Une culture di salvâ', curade di Aldo Rizzi, diretôr dai museus civics di Udin, e inmaneade a Vile Manin dai 5 di Setembar ai 31 di Dicembar dal 1976. Dopo di chê, intal Mai dal 1977, e rivà 'Friaul lebt - 2000 Jahre Kultur im Herzen Europas (Il Friûl al vîf - 2000 agns di culture tal cûr de Europe)', une rassegne itinerante, pensade dai arcivescui di Viene e di Udin, che e tocjà par un an diviersis localitâts austriachis, cul dopli obietîf di cjapâ sù bêçs par ripristinâ i monuments sacris e testemoneâ i leams artistics tra Austrie e Friûl.

Une altre mostre impuartante, presentade in plui di vincj citâts che a ospitavin comunitâts di furlans vie pal mont, in Europe e in Americhe, e fo ‘Civiltât furlane di îr e di vuê’, screade ai 10 di Mai dal 1980 a Vile Manin. Simpri a Passarian si faserin ancje, une tal 1983 e chê altre tal 1986, la 'Mostre de sculture dal len in Friûl', incentrade suntun dai bens plui danezâts dal sisme, e 'Friûl ricostruzion 1976-1986', organizade de Segretarie Gjenerâl Straordenarie in cunvigne cu la Regjon, che e ufrì un struc di ducj chei intervents che tal zîr di dîs agns a contribuirin in maniere concrete ae rinassite dal Friûl.

La idee di fonde, che si concretizà te tutele e tal recupar dal patrimoni storic artistic e architetonic dal Friûl, e fo, cemût che al à scrit Remo Cacitti, che «nissun popul al pues sorevivi a lunc cence la permanence de memorie dal so passât».