La resilience

Fin cumò La fuarce de Tiere al à contât i efiets che i taramots dal 1976 a àn vût sul teritori furlan, la gjestion de emergjence, la capacitât de comunitât di reagjî e di frontâ la tragjedie e la distruzion causadis dal sisme, cemût che al è stât organizât il procès di ricostruzion e cemût che si à rivât a puartâlu insom cuasi dal dut, almancul te edilizie privade, tal zîr di dîs, dodis agns. Par fâ duncje un belanç complessîf di cheste esperience straordenarie, si zovarìn dal concet di ‘resilience’, che si lu à tacât a doprâ tant cu la epidemie dal Covid-19, ma che par dî il vêr al à une lungje storie sientifiche.

In inzegnarie, la 'resilience' si riferìs ae capacitât di un materiâl di sopuartâ une colision, e ae velocitât che i covente par tornâ a cjapâ la sô forme origjinâl. Cheste peraule, cul timp, le àn tacade a doprâ ancje altris siencis e si è insiorade di significâts. Cun ‘resilience ecologjiche’, par esempli, si intint la capacitât di un ecosisteme di assorbî disturps ancje impuartants cence mudâ il so stât o lis sôs funzions di fonde: plui che su la capacitât di tornâ ae svelte ae normalitât, la atenzion e je duncje su la cuantitât di cambiament che un ecosisteme al pues tolerâ prin di passâ a un stât diferent.

Cu la espression 'resilience sociâl' si à partant scomençât a descrivi la capacitât dai grups umans di frontâ, di adatâsi e di ripiâsi des perturbazions di nature sociâl, economiche o ambientâl: tal stes mût che la biodiversitât e fâs cressi la resilience dai ecosistemis, al è stât osservât che ancje lis diversitâts internis aes comunitâts a infuartissin la resilience. Tal ultin, i studiôs dal teritori (economiscj, gjeografs, urbaniscj) a àn tacât a domandâsi in ce che e consist la 'resilience teritoriâl', e a àn diferenziât tra la reazion iniziâl al colp, la capacitât di recuperâ, la riorganizazion o l'adatament struturâl ae gnove realtât, il rinovament a tiermin lunc.