La prime leç regjonâl de ricostruzion (n. 17 dal 1976)

L’inviament de fase di ricostruzion al fo il prin moment impuartant li che i monts de politiche, di une bande, e dai tecnics, di chê altre, a scugnirin confrontâsi e cjatâ soluzions concuardadis, par passâ de emergjence ae ricostruzion.

Ancje se la leç regjonâl promulgade subit dopo de prime scosse, la n. 15 dai 10 di Mai dal 1976, tal art. 6 e erogave contribûts «pe riparazion e pe ricostruzion, ancje sostitutive» di abitazions privadis sdrumadis o cun tancj dams, cu la leç regjonâl che e rivà dopo, la n. 17 dai 7 di Jugn (Intervents di urgjence par soperî aes straordenariis e imediadis esigjencis abitativis des popolazions tocjadis dai events telurics dal Mai dal 1976 tal Friûl-Vignesie Julie) il tiermin ‘ricostruzion’ al sparì.

Il legjislatôr regjonâl, di fat, al volè che i intervents si limitassin dome aes riparazions lassant fûr dal sostegn economic lis azions destinadis aes oparis struturâls, massime par evitâ di colâ tes disposizions previodudis des leçs antisismichis, cun chê di sveltî il passaç des tendis aes cjasis comedadis.

Tal dibatiment vivarôs in Consei regjonâl su la discussion che e puartà ae emanazion di cheste leç, la conseire Cornelia Puppini, personalitât di rilêf dal Moviment Friûl, ricuardant che il proviodiment che si varès esaminât al sarès stât dome il prin, e che al jere indreçât aes riparazions «par tornâ a sistemâ lis cjasis che no àn patît dams seris», e criticà il fat che si fossin lassâts fûr i intervents struturâi, cundut che al jere stât previodût che si saressin fats e che i proprietaris a varessin partecipât aes spesis paiant une part. Puppini e marcà ancje il pericul rapresentât des grandis impresis e dai «impresaris di ogni gjenar» seneôs di «speculâ su lis disgraciis di altris»», che za a balinavin pai comuns dai paîs taramotâts.

Ancje Francesco De Carli, conseîr pordenonês dal Partît Socialist, al evidenzià che il proviodiment al sarès stât impuartant ma «sigûr no definitîf e no in stât di frontâ di bessôl la evenience, ancje dome pal setôr de ricostruzion des abitazions»; che al varès rivuardât dome lis riparazions no peadis ai elements struturâi de abitazion; che al sarès stât «acetabil inte misure che al jentre intun plan organic pe ricostruzion».

Inte stesse sentade Franco Comuzzi, dal PCI, al precisà che; «in Comission no sin rivâts adore di vê un sclariment se al sedi dome un limit di caratar economic, ven a stâi di siet milions e mieç [par unitât abitative], o se dongje di chest nol sedi ancje un limit di no intervent, in assolût, su lis struturis par no finî tes disposizions des leçs antisismichis e, duncje, in mecanisims legjislatîfs plui complicâts».

No si à di dismenteâ che, come che al prescrîf il decret leç n. 227 dai 13 di Maidal 1976 (po convertît cun modificazions de leç n. 336 dai 29 di Mai), i lavôrs di riparazion struturâi a varessin rispietât lis prescrizions de leç 64 dai 2 di Fevrâr dal 1974 (Proviodiments pes costruzions cun particolârs prescrizions pes zonis sismichis) e dal decret atuatîf dai 3 di Març dal 1975. La leç regjonâl n. 17 e fo duncje une leç “cerniere” par regolamentâ i intervents destinâts aes riparazions imediadis e chê che e sarès stade la fase dopo, cu la vere ricostruzion. Di fat, si saveve za che, par vuidâ la ricostruzion, dopo di chest dissen di leç a ‘nt saressin rivâts sigûr altris, ma tal mês di Jugn dal 1976 si calcolave essenziâl intervignî par ripuartâ prin che si podeve il plui alt numar pussibil di citadins cence cjase ‘des tendis aes cjasis’; ancje riscjant di ridusi la pussibilitât di meti dongje i intervents dentri di operazions plui grandis, come che a varessin vût miôr i tecnics, parcè che si veve pôre che cheste metodologjie e podès limitâ sedi la azion dai citadins che a vevin patît dams, sedi lis sieltis strategjichis des aministrazions locâls.

Come che si à za dit, pai tecnics l’impuartant al jere cirî di evitâ erôrs rilevants e otignî une buine uniformitât tes valutazions dal dam realizadis in cundizions dificilis e cun pôc timp a disposizion. L’orghin regjonâl al decidè duncje di doprâ une schede di aciertament dai dams elaborade in particolâr dal inzegnîr Marcello Conti e dal architet Luciano Di Sopra (viôt culì une interviste), li che i rilevadôrs a vevin di ripuartâ un «judizi sintetic» su lis cundizions dal edifici, di catalogâ come ‘sdrumât’, ‘no ripristinabil’ o ‘ripristinabil’. In chest ultin câs si varès vût di segnâ se si tratave di un intervent totâl o parziâl e se al coventàs o no realizâ oparis struturâls.

In plui, par valutâ se e valès la pene lâ indenant a ripristinâ l’edifici, te schede si furnive il so valôr stimât ai 5 di Mai e il cost indicatîf dal intervent di riparazion, calcolât tant che sumatorie dai ‘coscj unitaris elementârs’ riferîts ai siei elements costrutîfs principâi. In cheste maniere, si invià un sisteme elaborât che al varès vût di evitâ cualsisei indicazion di caratar progjetuâl de bande dai grups di rilevament; cun dut che dopo, in sede politiche, si decidè che dongje dal verbâl di aciertament si varès vût di zontâ un sfuei cun dentri lis Indicazions di massime su lis modalitâts tecnichis dal intervent di risistemazion. Ogni grup di rilevament al jere fat di trê tecnics, funzionaris publics o esperts iscrits tes listis dai ordins e dai coleçs professionâi regjonâi, supuartâts di coleghis che a rivavin di dute Italie: il pic al fo di 319 tercets impegnâts intal stes moment, e di 957 tecnics.

Tal Novembar dal 1976, dopo che lis scossis di Setembar a vevin ruvinât 3 mil edificis che a jerin za stâts riparâts, la Regjon e calcolà un dam totâl stimât pes riparazions di 210 miliarts di liris, dividûts in 139 miliarts leâts ai Comuns disastrâts, 59 miliarts pai Comuns danezâts in maniere serie e 12 miliarts par chei danezâts. Une cifre che, tignint cont dal PIL talian di chê volte, e corispuint a cirche 4 miliarts di euros dal 2025.

Tal câs dai edificis mancul colpîts, i lavôrs di riparazion a tacarin dispès ancje cence che il tercet di tecnics al ves fat il rilevament, tant che te citade sentade dai 29 di Mai si decidè di ameti a contribût regjonâl ancje chês riparazions fatis prime dai rilevaments: al è duncje dificil determinâ il numar di abitazions metudis a puest tal Istât dal 1976. Daûr di un studi realizât di Luciano di Sopra sui Coscj dai taramots, i edificis danezâts in maniere lizere tornâts a comedâ cu la leç regjonâl 17, e duncje fin ae promulgazion de leç regjonâl n. 30 dal Jugn dal 1977, a forin plui di 29 mil.

Cemût sono stadis fatis alore lis riparazions dal Istât dal 1976, in part scanceladis cu lis scossis di Setembar? O vin viodût che invezit dal intervent public e dai apalts agregâts si ve miôr lassâ la iniziative tes mans dai singui citadins. I intervents a forin duncje gjestîts in maniere individuâl o midiant di cooperativis, dispès cun voris ‘in economie’. Emanuele Chiavola, diretôr de Segretarie Gjenerâl Straordenarie, cuntun judizi sec al disarà che al fo «un tentatîf di ricostruzion ‘par aclamazion popolâr’, intune atmosfere di kermesse […] une sagre di ilusions, di ilusion massime sui timps».

Tra lis realtâts plui ativis te opare di riparazion si distacarin i grups de Associazion Nazionâl Alpins (ANA), che in chê volte e veve cirche 250 mil iscrits: la associazion di arme plui grande dal Paîs. Metint dongje lis sezions nazionâls, dentri de fin di Mai la ANA e vierzè undis cantîrs di lavôr autonoms e autosuficients che a tacarin a jessi operatîfs tra i 2 e i 4 di Jugn. De metât dal mês di Jugn ae metât dal mês di Setembar, plui di 15 mil alpins in congjêt a lavorarin intai cantîrs a Magnan, Atimis, Buie, Glemone, Vile di Cjargne, Maian, Mueç, Osôf, Cjavaç, Pinçan. A chescj si zontarà il cantîr di Vedronze, gjestît de sezion di Udin. Ogni cantîr al jere diret di un grup di sezions de stesse zone, cun volontaris che si davin la volte cun turnis setemanâi. Prin de fin di Lui i alpins in congjêt a comedarin 1.097 cjasis, che ai 11 di Setembar a rivarin a 3 mil. Cu la lôr opare sore nuie a ripristinarin ancje 76 edificis publics e 63 m² di cuvierts, a faserin voris di recupar ambientâl e sistemazions idraulichis. In chel Istât la ANA e mandà fûr la campagne ‘Vacancis di lavôr de fraternitât alpine’. Il sproc al jere «Chest an lis feriis dai Alpins in Friûl»: la rispueste e fo straordenarie.

Cu la fin dal Istât il legjislatôr e dute la comunitât regjonâl a scugnirin riviodi lis lôr strategjiis e i struments par frontâ i gnûfs dams che lis scossis dai 11 e dai 15 di Setembar a vevin causât.