Il
decret 227 fat bon ai 13 di Mai dal 1976 al rapresentà la fonde de gjestion
statâl de emergjence midiant de azion dal Comissari straordenari di guvier
Giuseppe Zamberletti, rivât a Udin la buinore dai 7 di Mai. Te stesse dì a
partirin di Turin lis primis colonis di socors dai vigjii dal fûc, ancjemò
impegnâts a distudâ il fûc tai capanons produtîfs de FIAT Mirafiori, risultât
di un dai tancj ats teroristics di chei agns. La destinazion de colone dai
vigjii dal fûc e jere la Prefeture di Udin, dulà che a rivarin ancje ditis e
singui artesans muredôrs e marangons di dute la regjon, che a forin subit
impleâts tes voris di sopontament dai fabricâts malsigûrs. Si coordenavin cui
Centris operatîfs, ven a stâi cui organisims diretîfs che a intervignivin sot
de vuide dai sindics e dal control dal comissari Zamberletti. Intai comuns si
metevin dongje scuadris di intervent, coordenadis dai prins citadins par liberâ
lis stradis des maseriis e meti in sigurece i edificis: tes primis setemanis a
operarin un miâr di vigjii dal fûc, personâl dal esercit, i alpins in congjêt –
dilunc dal Istât plui di 15 mil ex penis neris si derin la volte e a passarin
culì lis feriis – e miârs di volontaris, come i 7 mil scouts rivâts di dute
Italie. Ancje denant di dams impuartants al patrimoni edilizi, ingriviâts des
cundizions particolârs dal teren e de posizion dai paîs tocjâts, dispès vieris
e logâts insom di alturis, i Centris operatîfs a rivarin a garantî il supuart
che al coventave par meti in sigurece chei lûcs. I uficiâi dal Cuarp nazionâl
dai vigjii dal fûc a verificarin la tignude des struturis edilizis e des
infrastruturis che a vevin patît dams, proviodint aes demolizions e ai prins
sopontaments, doprant centenârs di mieçs.
Daûr dai
manuâi e des dispensis didatichis pe formazion dai vigjii dal fûc, la
instalazion des sopontis e jere la tipologjie di intervent provisionâl
principâl tai câs di emergjence sismiche. I vigjii dal fûc a vevin za colaudât
chest gjenar di operazions te gjestion des emergjencis dai taramots di Messine
tal 1908, di Avezzano tal 1915, di Aquilonia e Lacedonia tal 1930 e dal Belice
tal 1968. Midiant dai sopontaments si fasevin sù struturis di sostegn
provisoriis cun trâfs di len o materiâi struturâi, buinis di stabilizâ lis
parêts o altris elements edilizis malsigûrs. Chescj prins intervents, che a
jerin fondamentâi par evitâ altris dams, a permetevin aes scuadris di socori
chei che a jerin restâts blocâts sot des maseriis e di recuperâ i lôr bens.
Spes i lavôrs a tacavin pocjis oris dopo des scossis, ancje in graciis de
colaborazion cun impresis edîls locâls che a metevin a disposizion la esperience
e la competence dai lôr tecnics e des lôr maestrancis.
Cun
cheste misure si rivà adore a salvâ vitis umanis e a evitâ altris cediments,
preservant tal stes timp il patrimoni culturâl e storic dal Friûl. Cun di plui,
une azion dal gjenar e fo essenziâl par contignî i efiets disastrôs des scossis
di Setembar che, come che al è facil imagjinâ, nissun al varès podût previodi.
I prins sopontaments a deventarin il simbul de rispueste imediade, sigure e
cualificade dal Friûl, ma ancje il segn distintîf de grande solidarietât che si
jere difondude dopo dal taramot.
Ancje se
in chê volte si cognossevin za putropis tipologjiis di intervent, tant che il
sopontament di tratignude o di contrast di len, chel di sostegn di solârs e
barcons, il sopontament des viertiduris, il centenament di len di arcs e volts,
lis cercladuris e lis tirantaduris, si ve miôr meti in vore tancj di chescj
intervents intun secont moment, te fase di consolidament des struturis. Cualchidune
des scuadris che a operavin tai comuns disastrâts, formadis di abii
cjarpentîrs, e insiorà la liste dai intervents provisionâi cuntune gnove
soluzion, che e previodeve l’ûs di tirants di metal e trâfs di len cu la
funzion di tratignî e stabilizâ la struture, come che si viôt tal scheme.
Dilunc
de prime fase comissariâl (dai 7 di Mai ai 25 di Lui dal 1976) si inviarin
ancje une prime schedadure e une stime preliminâr dai dams patîts dai edificis
e dai lôr elements struturâi. Lis lesions des costruzions a forin censidis e
monitoradis midiant di schedis di rilevazion di pueste, cun chê di realizâ une
bancje dâts omogjenie e consultabile, buine di individuâ e classificâ lis
diviersis carateristichis struturâls dai edificis e di furnî soluzions
pussibilis par metilis in sigurece. E fo une operazion imponente, dibatude par
agns tal ambit dal Cuarp nazionâl dai vigjii dal fûc. Fasint capitâl de
esperience furlane, il Dipartiment de protezion civîl nazionâl, nassût tal
1982, al prontà tal 1997 une schede e un manuâl, po informatizâts, par intervignî
tai teritoris taramotâts de Umbrie e des Marcjis, e par gjestî dutis lis
emergjencis fin al taramot di L’Aquila tal 2009.
A
L’Aquila al è stât istituît il Nucli coordenament oparis Provisionâls dal Cnvvf
(Ncp) intant che il Ministeri dal interni al à realizât il Vademecum STOP –
Schedis tecnichis des oparis provisionâls pe metude in sigurece post sisme de
bande dai Vigjii dal Fûc (2010), un gnûf struc di dutis lis esperiencis
cumuladis fin a chel moment, racueltis intun manuâl di oparis provisionâls par
l’intervent tecnic urgjent tes emergjencis sismichis. Chel model sperimentât
sul cjamp al permet ancjemò vuê di garantî che i intervents provisionâi fats
dai vigjii dal fûc a sedin omogjenis, e di monitorâ il lôr stât di avanzament.
Midiant des schedis metudis dentri tal Vademecum, di fat, si puedin realizâ lis
oparis provisionâls in emergjence, progjetâ i intervents e stimâ tal detai trop
materiâl che al covente par fâ lis voris.
Il Nucli
si è zovât dal supuart sientific dal professôr Stefano Grimaz de Universitât dal
Friûl che, in gracie de sô esperience furlane, al à coordenât un grup specific
di lavôr che tal mês di Lui dal 2014 al à presentât une version inzornade de
“Schede Aedes pal rilevament dai dams, pront intervent e agjibilitât dai
edificis ordenaris te emergjence post sismiche” e dal relatîf manuâl di
compilazion.
Su la
fonde des cognossincis disvilupadis, tal Ateneu furlan al è nassût il laboratori
di Sigurece e protezion intersetoriâl (Sprint). In plui, ai 7 di Mai dal 2016,
cuarante agns dopo dal sisme, la Regjon Autonome Friûl-Vignesie Julie adun cu
la Protezion civîl, il Cuarp nazionâl dai vigjii dal fûc, la Universitât dal
Friûl, la Associazion dai comuns taramotâts e dai sindics de ricostruzion dal
Friûl e il Comun di Vençon a àn firmât un acuardi par ativâ la Scuele
internazionâl di formazion pe gjestion de rispueste in emergjence sismiche (International
training school in seismic emergency response management), clamade “SERMacademy”. La scuele e à un cjamp di adestrament a Vençon, te frazion di Puartis
Vecjo, un dai lûcs simbul dal taramot dal 1976. Tal 2018, simpri te Universitât
dal Friûl, a àn istituît une catedre Unesco in Sigurece intersetoriâl pe riduzion
dai pericui di disastri e pe resilience.