Restâ o partî?

Par chei che a vevin vudis lis cjasis ruvinadis de scosse dal Mai dal 1976 la sperance di podê tornâ dentri tes lôr abitazions si sfantà in curt. Si capì subit che al jere impussibil passâ “des tendis aes cjasis”. Cul passâ dai mês a refudâ lis “barachis”, che i taramotâts a sintivin tant che il pericul di une cundizion za vivude di altris bandis in Italie, a restavin simpri in mancul. Tes tendis e montave la rabie des personis preocupadis di scugnî passâ l’Invier in chês cundizions.

Chei restâts cence cjase si davin dongje in comitâts, un par ogni tendopoli, cu la poie de Glesie furlane, e a denunziavin in public la lôr situazion, ancje intant de visite in Friûl dal president dal Consei, Giulio Andreotti (viôt culì une interviste inedite). Pôc timp dopo, lis gnovis, fuartis scossis de metât di Setembar a distudarin ogni ilusion, metint in clâr che la ricostruzion e sarès stade lungje e che al coventave preparâsi pal Invier aromai dongje. Al fo riclamât in Friûl il Comissari straordenari Giuseppe Zamberletti: al veve vude cjarte blancje par organizâ l’esodi di miârs di personis e la instalazion dai prefabricâts, che si impegnà a puartâ insom dentri dal Març dal 1977.

In pocjis setemanis al fo organizât il trasferiment, judât dal esercit, di passe 32 mil personis tes localitâts de cueste adriatiche furlane, di chês balneârs venetis dongje e tes monts cjargnelis. Tes cjasis si de acet aes fameis, i anzians che a vevin bisugne di assistence a jerin ospitâts tai albiercs. Si metè in moviment une rêt di supuart straordenarie. Tes localitâts turistichis lis comunitâts si organizarin par coordenâ i servizis, par assisti lis personis fragjilis o chei che a vevin pierdût i familiârs, par tignî vîf il sens dal stâ insiemi. I predis e i zovins a forin lis colonis di une esperience di comunitât straordenarie.

Tal zîr di sîs mês Zamberletti al invià e al puartà insom la realizazion dai borcs prefabricâts. Ai 31 di Març dal 1977 si liberarin i albiercs tes localitâts turistichis, chei cence cjase a tornarin tai lôr paîs e culì a cjatarin lis abitazions temporaniis che ur varessin dât acet fin cuant che la ricostruzion no sarès stade puartade insom. Al sarès stât un lavôr lunc, e al coventave il supuart di ducj.