Tai dîs
subit dopo de scosse dai 6 di Mai, il president dal Consei dai ministris Aldo
Moro al de al president de Zonte regjonâl dal Friûl-Vignesie Julie, Antonio Comelli, la deleghe par gjestî la ricostruzion. Prime di chê volte il Stât nol
veve mai assegnât competencis dal gjenar a une regjon, decidint di mantignî
dome la gjestion de emergjence cu la nomine dal sotsegretari dal Interni,
Giuseppe Zamberletti, a Comissari straordenari di Guvier.
Ai 7 di
Mai, duncje, il comissari si insedià a Udin, te Prefeture, dulà che al organizà
il cuartîr gjenerâl pe organizazion dai intervents e la distribuzion dai aiûts
tal teritori. Zamberletti al volè vê dongje cuatri vicecomissaris, i prefets di
Udin, Domenico Spaziante, e Pordenon, Mario Arduini; il gjenerâl Mario Rossi,
comandant de division Mantova, e l’inzegnîr Alessandro Giomi, comandant nazionâl
dai Vigjii dal fûc, par planificâ ancje la operativitât dai Centris operatîfs
di setôr (Cos) che al istituì cualchi dì dopo a Cividât, Glemone, Maian, Resiute,
Osôf, San Denêl, Tarcint, Tumieç e Spilimberc (po dopo trasferît a Pordenon). Ognidun
di lôr al operave intune desene di comuns par un totâl di 40 mil abitants.
Ai Cos, che
a jerin sot dal coordenament diret dal comissari, a parteciparin i sindics, rapresentants
de Regjon, uficiâi des Fuarcis armadis e di dutis lis fuarcis impegnadis tal
teritori. Cundut che tancj sindics a jerin in cjarie dome di un an, cun pocje
esperience e cence imprescj tecnics adats par fâ front a un stât di emergjence
cussì grant, Zamberletti al capì daurman la funzion che a varessin podût vê tal
valutâ lis dibisugnis des lôr comunitâts. A levin però supuartâts almancul te
logjistiche, e a ogni sindic i meterin dongje un comandant militâr. Une volte
definide la organizazion, si le indenant tal frontâ une circostance che e jere
par ducj une novitât assolude.
La
situazion e jere une vore critiche ancje a nivel sanitari: tancj ospedâi, come
chei di Glemone, Tumieç e San Denêl, a jerin pal plui inagjibii e il complès
sanitari di Udin al garantì une funzion di assistence essenziâl, ricoverant
passe 700 pazients intai prins cuatri dîs. Come che al à osservât Franco Perraro (viôt culì une interviste inedite), primari de Medisine di urgjence dal ospedâl di Udin, la Regjon tal
1976 no veve une operativitât uniforme dal pont di viste ospedalîr, ma e podè
contâ su la mobilitazion di tancj infermîrs e miedis rivâts di dute Italie e
dal forest. Cun di plui, si doprà une schede sanitarie di emergjence che e veve
dentri i dâts su la situazion gjenerâl dai ferîts par facilitâ la planificazion
di misuris organizativis adatis.
Ai 25 di
Lui dal 1976, cuant che Zamberletti al puartà insom i siei compits di
comissari, e finì ancje la prime fase de emergjence cuntun lent tornâ ae
normalitât. Cun dut dal spirt dal “fasìn di bessôi” e che la regjon si fos
impegnade daurman par comedâ i edificis che a vevin patît dams (Leç Regjonâl17, dai 7 di Jugn dal 1976), tor la fin di Avost tra i taramotâts e scomençà a
zirâ la pôre di scugnî passâ l’Invier tes tendis. Si veve sotstimât i timps che
a coventavin par meti in vore il plan di abitazions prefabricadis, che al
previodeve di instalâ miârs di cjasutis par dâ acet a cirche 30 mil personis
restadis cence une sistemazion. I taramotâts a protestarin, a sfilarin denant
dai palaçs de Regjon pandint a fuart il lôr malcontent, sigûrs aromai che il
sproc “des tendis aes cjasis” al fos deventât improponibil.
Dutis
lis sigurecis e lis sperancis si sfantarin ai 11 e ai 15 di Setembar, cuant che
l’orcolat – la figure mostruose che la tradizion popolâr e pee al taramot e che
e vîf tes profonditâts de tiere – al tornà a fâsi sintî, sdrumant la plui part
di chel che al jere restât in pîts dopo des scossis dal mês di Mai, e ancje ce
che al jere za stât comedât. Il Friûl al plombà une altre volte tal stât di
emergjence. Su chest cont, il bonsignôr Alfredo Battisti, che in chê volte al
jere arcivescul di Udin, al declarà che «Il taramot dai 6 di Mai al à sdrumât
il Friûl, chel di Setembar al à sdrumât i furlans. Il prin al à disfatis lis
cjasis ma al à lassât la sperance; il secont al pâr che al vedi roseade ancje
la sperance».
Lis
tantis scossis regjistradis tal mês di Setembar a scurtarin i timps pe gnove
nomine dal Comissari straordenari, che aromai e jere deventade inevitabile.
Cheste volte, i derin podês inmò plui grancj e ecezionâi che tal mês di Mai.
Zamberletti al tornà in Friûl ai 13 di Setembar, doi dîs prin dal gnûf taramot,
che al cjapà di sorprese ancje la comission parlamentâr rivade a visitâ la aree
disastrade. Il comissari, che al tornà a clamâ i vicecomissaris e a riativâ i
Cos, si cjatà a scugnî organizâ il trasferiment di 32.276 personis tes
localitâts turistichis cun struturis ricetivis come Grau, Lignan, Bibion,
Cjaurlis, Jesolo, Ravasclêt e altris comuns de Cjargne. Culì si istituirin i
Dipartiments assistenziâi che a lavoravin a strent cui Centris operatîfs logâts
tes zonis di divignince dai taramotâts: a chescj ur sigurarin une sistemazion,
la assistence sociosanitarie e servizis teritoriâls, tant che farmaciis viertis
fûr stagjon, colegaments direts cu lis localitâts di origjin, liniis di
traspuart sore nuie, ativitâts scolastichis in 196 classis par 3 mil 500 arlêfs
e fintremai il bloc dai presits dai bens di prime necessitât. E jere une
maniere par tignî dongje lis comunitâts tes citâts che ur devin acet,
sigurantjur ducj i servizis pal timp che al coventave par tirâ sù insediaments
provisoris e prefabricâts.
E fo une
corse cuintri il timp. Il comissari al scugnì meti in vore soluzions adatis
ancje pai sfolâts che no podevin trasferîsi di altris bandis. Fra chescj a
jerin i contadins, obleâts a fermâsi par viodi des bestiis, chei che a jerin
assegnâts aes lavorazions a cicli continui e i anzians, che par resons emotivis
no volevin lassâ il puest li che a jerin nassûts. Cirche 3 mil personis a
restavin però tes tendis ator pai comuns taramotâts e si prontavin par frontâ
l’Invier. Zamberletti, supuartât de Regjon, dal ministeri dal Interni e des
Prefeturis, si impegnà par cjatâ fûr roulottes. Midiant di acuiscj direts, di
un prestit solidaristic sotscrit di privâts e di recuisizions temporaniis, si
rivà a tirâ dongje 5.200 roulottes in dut, che a garantivin 15 mil puescj jet.
Il
comissari al capì subit che si veve di potenziâ il plan regjonâl dai
prefabricâts di mût che i furlans tocjâts dal taramot a tornassin dongje prime
che tes localitâts che ur devin acet e tacàs la stagjon turistiche 1977. Si
realizarin duncje altris 10 mil e 500 lozaments in areis individuadis dai
comuns, dopo che i gjeolics a vevin dât un parê positîf su la idoneitât dal
lûc. Si instalarin 50 tipologjiis diferentis di sistemazions semipermanentis:
containers monobloc di metal, struturis cun panei autopuartants o telâr modulâr
e prefabricâts di len. I doi programs, par un totâl di cuasi 30 mil lozaments,
a forin puartâts insom in nûf mês, cu la metude in vore di passe 2.600 unitâts
par mês. Par tirâ sù chestis struturis a lavorarin impresis privadis, vigjii
dal fûc e oms dal Esercit, cjapant dentri ancje la Associazion nazionâl dai
alpins (ANA).
Zamberletti
al veve previodût che i taramotâts a saressin tornâts dongje dentri dai 31 di
Març dal 1977, prometint ai gjestôrs dai albiercs che a varessin vût indaûr lis
struturis prin che e scomençàs la stagjon estive. A dispiet dal program, però,
la realizazion dai 350 insediaments e patì cualchi ritart in 91 comuns. Dome
cui 30 di Avrîl di chel an, di fat, dutis lis personis a saressin tornadis
cjase e ancje la gjestion comissariâl si sarès sierade. Une date, citant lis
peraulis di Zamberletti, «che e invià il percors di ricostruzion e che e
regjistrà un “mandi” plen di comozion tra i furlans e i tancj che cun lôr a
vevin condividût une stagjon dolorose, ma ancje siore di impegn e di fiducie te
rinassite».
Cu la
conclusion de seconde e ultime fase de emergjence, li che la solidarietât
internazionâl e la sielte decisive di decentrâ i intervents a jerin stâts
fatôrs determinants, i taramotâts a tornarin biel planc a un stîl di vite
abituâl intai prefabricâts: i events associatîfs, lis esibizions di grups
musicâi, lis fiestis di bal e lis discussions a jemplarin di vivôr lis
zornadis. La grande domande, la grande cuistion di fonde che tant lis
comunitâts che i aministradôrs e lis autoritâts a cognossevin ben e jere però
cemût tornâ a componi il contest urbanistic e architetonic di un teritori che
il sisme al veve tocjât in maniere une vore fuarte.