Cemût tornâ a costruî: la discussion tecniche

Sclarît il principi che l’implant teritoriâl al veve di restâ chel tradizionâl, si tacà a dibati su la oportunitât di doprâ o no gnovis tecnichis edilizis pe ricostruzion e su cemût rindi antisismics i intervents di risistemazion des muraduris di piere de edilizie tradizionâl. Se si veve di tornâ a fâ sù ‘dulà che al jere’, ricostruî ‘cemût che al jere’, intun teritori sismic, nol varès vût nissune logjiche e al varès esponût la popolazion a gnovis tragjediis.

Un prin concors nazionâl di ideis sul teme: ‘Tipologjiis abitativis e procediments tecnics pe ricostruzion des abitazions sdrumadis dal sisme dai 6 di Mai dal 1976 in Friûl’ al fo inmaneât tal Avost dal 1976, prin des scossis di Setembar. Bandît de Regjon Piemont (cu la consulence dal Politecnic di Turin e dal Istitût Universitari di Architeture di Vignesie), al previodeve une «sperimentazion imediade cu la realizazion di prototips a caric e par cure dal Comitât promotôr». Lis propuestis, al diseve il bant, «a varan di previodi l’ûs plui larc pussibil des maestrancis locâls». Di chest concors no si sa nuie, ni dai partecipants ni di cui che lu à vinçût, si sa dome che al fo calcolât tant che une intromission irispietose viers il Friûl de bande di une regjon aministrade di une fazion politiche diferente. L’aspiet des tecnichis ricostrutivis cun elements prefabricâts si lu frontà, invezit, subit dopo de seconde scosse di Setembar, cu la cunvigne ‘Friûl: edilizie industrializade par une ricostruzion rapide’, fate a Udin dai 24 ai 29 di Setembar dal 1976 e inmaneade de Provincie e de Associazion Taliane Prefabricazion pe Edilizie Industrializade (AIP). Si analizarin lis pussibilitâts che la industrializazion edilizie e podeve furnî ae ricostruzion: cu la esposizion di une schirie di plastics di progjets di eventuâi intervents specifics, a forin presentadis lis alternativis tecnologjichis, tipologjichis, produtivis e organizativis a disposizion, calcoladis in stât di risolvi lis criticitâts plui o mancul complessis de edilizie di grandis dimensions.

Ai operadôrs e soredut ai politics, ur fo ilustrade la pussibilitât di riadatâ il patrimoni edilizi ruvinât midiant di elements industrializâts cun recuisîts antisismics. Dilunc de cunvigne, i intervents dal architet Domenico Bortolotti e dal inzegnîr Marcello Conti, doi professioniscj furlans, a stiçarin un interès particolâr. Par Bortolotti, invezit di lâ indenant a pensâ a une industrializazion edilizie ‘a cicli sierât’, come un sisteme inclusîf di progjetazion e metude in vore, al sarès stât miôr zovâsi di un sisteme ‘viert’, caraterizât de realizazion di components di serie che cualsisei progjetist al varès podût doprâ in cualsisei progjet, metûts in opare di impresis di montaç. Ancje Marcello Conti al insistè su la necessitât di une gnove vision des cuistions urbanistichis e des costruzions, adun cu la valutazion atente e juste di ducj chei fatôrs che a definissin la «macrostruture» urbane e la «microstruture» costrutive. Il compit de industrializazion edilizie al sarès stât chel di sodisfâ ducj i recuisîts di nature culturâl, economiche e sociâl che a jerin ae fonde de volontât di ricostruî il Friûl tal plen rispiet des sôs carateristichis ambientâls.

Il confront su lis diviersis metodologjiis di ûs de prefabricazion nol finì cul sierâsi de cunvigne. Tal principi dal an dopo, di fat, al fo inmaneât un ‘Concors di ideis pe ricostruzion dal Friûl’, bandît de AIP e de Provincie di Udin e cul patrocini dal Comissari Straordenari di Guvier, de Regjon e dal Consorzi dai istitûts autonoms cjasis popolârs. Dentri dai 15 di Jugn dal 1977 grups di progjetiscj in associazion a impresis edîls o industriis de costruzion a presentarin i elaborâts «pe progjetazion di sistemis edilizis destinâts ae ricostruzion dal Friûl tal rispiet des esigjencis e des tradizions abitativis dal so teritori». Il bant al previodeve la premiazion di cinc progjets e la segnalazion di altris cinc sistemis edilizis ‘flessibii’, adats aes diviersis necessitâts dal teritori, che al domandave intervents sigûrs e eficaçs. Tra lis 68 propuestis sometudis, a forin premiadis lis soluzions presentadis di Bruno Morassutti e dal grup di Augusto Romano Burelli, Paola Gennaro e Nino Tenca Montini. Tra i progjets segnalâts a forin chei di cualchi grant non de architeture internazionâl: Renzo Piano e Peter Rice cun Ove Arup & partners; il Studio BBPR cun Lodovico Belgioioso e l’udinês Nani Valle; Federico Marconi cun Vittorio Zanfagnini; il grup formât di Giuliano Parmegiani, Lorenzo Giacomuzzi Moore e Anna Buffa. Une partecipazion largje e cualificade, completade cu la presince dal olimp de inzegnarie taliane di chê volte: Silvano Zorzi che pe ocasion si de adun cu la imprese Rizzani di Udin; Riccardo Morandi; Sergio Musmeci tal grup di Domenico Bortolotti; Roberto Guiducci, l’urbanist che cualchi mês prin al veve proponût la realizazion di une citât lineâr tra Udin e Pordenon, adun cun Leonardo Fiori. Leìnt la liste dai partecipants si cjatin ancje l’artist Giuseppe Zigaina cun Luciano Di Sopra intun grup che al meteve dongje impresis edîls talianis e jugoslavis.

Ancje se si jere tratât di un concors cussì cualificât, par risultâts e presincis, la prefabricazion tal procès di ricostruzion dal Friûl taramotât e restà di fat dome su la cjarte. Lis formis elaboradis dai innomenâts architets no jentravin nuie cu la architeture tradizionâl tant invocade di cui che al domandave a fuart un Friûl ‘cemût che al jere, li che al jere’. Cussì, tal Jugn dal 1980, il «Corriere dell’Economia», suplement economic dal «Corriere della Sera» al varès titulât: Nemmeno il terremoto è riuscito a far decollare la prefabbricazione. La ricercje su la prefabricazion pesante frontade di Bruno Morassutti tal so progjet vincidôr e vignarà metude in vore dome doi agns dopo dal concors, tal 1979, no masse lontan dal Friûl taramotât, cu la realizazion di un cuartîr residenziâl a Staranzan, in provincie di Gurize.

Par judâ i professioniscj su lis tecnichis di doprâ par ripristinâ i edificis, tal 1976 il Centri di Ricercje Aplicade e Documentazion (CRAD) de Cjamare di Cumierç di Udin, in colegament cul Istitût pe ricercje sui materiâi e lis struturis (Zavod za Raziskavo Materiala in Konstrukcij - ZRMK) di Lubiane, al creà il ‘Servizi di sperimentazion e divulgazion des tecnichis di ripristinament struturâl dai edificis’ che al publicà e al divulgà prontuaris che a pescjavin tes avanzadis esperiencis jugoslavis. Dentri, a jerin presentadis in detai lis tecnichis conseadis par rinfuarçâ lis muraduris di piere cun tirants di açâl, iniezions di maltis aglomerantis e une coesion miôr di chescj elements cun chei struturâi di len (solârs e cuvierts).
Dopo la publicazion dai cuaders dal CRAD, dai 17 ai 22 di Zenâr dal 1977 si fasè a Udin un ‘Seminari su lis tecnichis slovenis di riparazion dai edificis’ inmaneât dal CRAD e dal ZRMK cu la poie de Regjon autonome. Al fo un incuintri internazionâl li che si ilustrarin lis regulis e lis pratichis metudis in vore dai tecnics slovens pal recupar antisismic dai edificis in muradure, che a jerin stadis sperimentadis ancje intai piçui borcs des Vals dal Nadison tal Istât-Autun dal 1976, cuant che scuadris di tecnics dal servizi civîl de Republiche slovene a forin ospitâts dai abitants de Sclavanie furlane cun chê di trasmeti lis tecnichis che a vevin perfezionât. Stant che chês tecnichis a vevin funzionât ben pe tignude dai edificis ancje dopo des scossis di Setembar, la cunvigne e metè in evidence il grant interès dai professioniscj furlans e di ducj i operadôrs impegnâts (tecnics e politics) che, in cheste maniere, a capirin che si podeve pardabon preparâsi ae ricostruzion dopo dal taramot doprant metodologjiis specifichis di adeguament antisismic dal patrimoni edilizi esistent. Il confront volût dai tecnics talians cu lis esperiencis slovenis plui avanzadis, disvilupadis sedi sul front dal monitorament sismic che su chel dal recupar antisismic des struturis in muradure tipichis de edilizie tradizionâl sedi in teritori sloven che furlan, al ve tal architet Valentino Simonitti, di San Pieri dai Sclavons, un so impuartant esponent: al fo lui, di fat, a creâ un servizi tecnic par assisti la int di chês vals tal recuperâ lis propriis cjasis. Simonitti al presentà cheste esperience a Triest tal Mai dal 1978 intun intervent al ‘Simposi sui problemis socioeconomics e ambientâi dai slovens in Italie’: citant il sintiment de culture contadine dal ambient furlan (di là di chel sloven), al ricuardà che «riparâ une cjase al è simpri miôr che no tornâ a fâle sù […], il recupar dal patrimoni esistent al evite gnovis infrastruturis e gnovis superficiis […], te opare di recupar […] e pues cjatâ spazi soredut la maestrance locâl, cun invistiments che a restin sul puest».

Cun di plui, tal 1978 e jere za in vore la normative tecniche che e vuidà la ricostruzion, metude dentri te leç regjonâl n. 30 dai 20 di Jugn dal 1977, e che tra i siei elements fondamentâi e veve propit il document tecnic dedicât al adeguament sismic. Di chest argoment si fevelarà ancjemò, parcè che al sarès stât un dai contribûts plui inovatîfs de esperience dal taramot furlan.