Come che al è za stât
ricuardât fevelant des primis fasis de emergjence, ai 7 di Mai a Rome si de
dongje il Consei dai ministris, cun a cjâf Aldo Moro, che al nomenà Giuseppe Zamberletti Comissari straordenari dal Guvier. Cinc dîs dopo, intune seconde
sentade, al fo fat bon il decret leç n. 227, che al veve dentri i prins proviodiments
urgjents e une assegnazion gjeneriche di deleghe pe ricostruzion ae Regjon
autonome Friûl-Vignesie Julie.
Tal principi de
setemane dopo, li de segretarie dal Consei dai ministris, si fasè une riunion
par un prin esam des propuestis presentadis dai ministeris par frontâ la
emergjence. A parteciparin il president de Regjon Antonio Comelli, l’udinês Mario Toros, ministri dal Lavôr e de previdence sociâl, e il deputât Pier Giorgio
Bressan, ancje lui di Udin. A un ciert pont dal incuintri, al rivà su la puarte
il president dal Consei Aldo Moro che, indreçantsi a Comelli, cence tantis
cerimoniis, i domandà di confermâ che la Regjon e veve la olse e la energjie
par cjapâ sù a nivel istituzionâl il compit de ricostruzion. Comelli, al è un
fat cognossût, al rispuindè di sì: za ai 8 di Mai dal 1976, in ocasion de
visite dal president dal Consei a Glemone, i vevin fate la stesse domande, e
Comelli, dopo vê interogât cuntune voglade il conseîr regjonâl Salvatore
Varisco e il sindic di Glemone di in chê volte, e vê vût di lôr un timit mot di
conferme, al veve acetât di cjapâ sù cheste responsabilitât enorme.
Parcè Moro – si
domande l’inzegnîr Diego Carpenedo, un dai protagoniscj de ricostruzion –
vevial cjapât cheste iniziative? Tal timp a son vignûts fûr trê motîfs
pussibii: il prin al è che al ves un leam particolâr cul Friûl, la regjon plui
‘moroteiste’ di Italie. Il secont al è che i risultâts otignûts in Sicilie e te
ricostruzion dal Belice a jerin stâts scjars, e che chest al jere avonde
evident pe opinion publiche. Il tierç motîf si à di cirîlu tal debit morâl che
Moro al veve stipulât cu la Regjon: intai mês prin dal sisme al veve fat
preparâ un dissen di leç par assegnâ fonts, daûr dal articul 50 dal Statût
regjonâl, pe «esecuzion di programs organics di disvilup». La fin dal so V
Guvier (che al jere durât dome 77 dîs) in Avrîl e veve però interot chel iter;
ma Moro al voleve mantignî chel impegn cu la Regjon e cu la sô Zonte. E sarès
stade ancje une forme di supuart a cheste ultime, li che a cjapavin part dome
la DC, il PSDI e il PRI e che e steve in pîts cuntune maiorance minime di 31
conseîrs regjonâi su 61.
I partîts di çampe
dal PCI e dal PSI – chest ultin al jere jessût dal Guvier regjonâl dopo nûf
agns, tal Otubar dal 1975 – a vioderin tal taramot la ocasion par fâ tornâ la
DC su la soluzion dal centri-çampe slargjât: il discontent dopo de scosse dal
mês di Mai pe lentece de azion regjonâl al fo un pont a pro di cui che al
voleve meti in crisi la soluzion dai trê partîts.
Il PSI si impegnà
plui di ducj par tornâ a une coalizion di centri-çampe, cuntune dure bataie in
Consei regjonâl cuintri de Zonte Comelli, che però no puartà ai risultâts
eletorâi sperâts. Tes elezions politichis dai 20 e 21 di Jugn dal 1976 al le a
votâ il 95 par cent di chei che a vevin dirit (cuntune piçule incressite a pet
di cuatri agns prin) e al fo premiât il bipolarisim. La DC (38,7 par cent) e
restave il prin partît in regjon e il PCI si svicinà (34,4 par cent), cence
però passâle. Il PSI al rivà dome al 9,6 par cent.
A metât dal mês di
Lui, dopo dal dibatiment che al frontave lis cuistions dal ripristinament des
ativitâts produtivis, dal reperiment des areis destinadis a intervents edilizis
urgjents e des espropriazions par utilitât publiche, che si jere sierât cu la
aprovazion des leçs regjonâls n. 28 dal 1n di Lui dal 1976 e n. 33 dai 21 di Lui dal 1976, il PCI e il PSI a stabilirin di no partecipâ plui ai
lavôrs de Comission consiliâr speciâl dal Consei regjonâl pes zonis
taramotadis, che si veve za decidût di istituî cu la discussion dai 8 di Mai in
Consei. La Comission, direte dal democristian Salvatore Varisco, e veve il
compit di mantignî il colegament tra il Consei e la Zonte par dutis lis
«cuistions peadis al event sismic che a sedin rilevantis o urgjentis e che no
sedin di competence des comissions permanentis». I doi partîts a tornarin a
partecipâ in Setembar e Antonio Comelli, ai 21 di chel mês, te aule dal Consei
regjonâl, tal ricuardâ la riprese des scossis, che nissun si spietave, propit
cuant che «si iludevin che il fenomen sismic al les al mancul» e l’esodi «ancje
se provisori» des popolazions des localitâts tocjadis, si rimetè a un «pat pe
ricostruzion» tra lis fuarcis politichis regjonâls, par evitâ il spopolament e
«la muart dal Friûl».
Il pat informâl che lis
fuarcis politichis a firmarin in chê volte, clamât plui indenant il ‘compromès
sismic’, pe assonance cul ‘compromès storic’ li che il PCI e la DC a lavoravin
di timp par puartâ il Partît Comunist tal guvier dal Paîs, al tornà a svicinâ
lis posizions dispès estremis des formazions politichis. Cun di plui, al rivà a
morestâ lis istancis dal Moviment des tendopolis, che si jerin trasformadis in manifestazions
di place, dulà che a vevin vôs i zovins sostignidôrs de çampe extraparlamentâr,
che a sburtavin par une ricostruzion gjestide dal bas tant che ocasion par
disvilupâ un gnûf model sociâl.
Il ‘compromès sismic’
al fo la intese politiche che i metè braçs e gjambis ae ricostruzion post
sisme, cu la realizazion di politichis abitativis e di ricualificazion
teritoriâl, leçs cuadri di pueste e bants pensâts par supuartâ i citadins e lis
impresis tal recupar dal patrimoni imobiliâr danezât o pierdût. In cheste
maniere, si rivà a fâ buinis daurman chês leçs regjonâls fondamentâls,
previodudis de leç n. 546 dai 8 di Avost 1977, che e delegave a cjadene ai sindics
e aes comunitâts locâls larcs podês decisionâi. Cjalant i risultâts otignûts, si
lu pues calcolâ tant che un dai câs di sussidiarietât regjonâl plui di sucès daûr
di ce che al stabilìs l’articul 118 de Costituzion.
La ricualificazion e
il potenziament de viabilitât a forin gjestîts cu la semplificazion des
proceduris burocratichis, il recupar struturâl e l’adeguament sismic dai
edificis mandant fûr pratichis normativis tecnichis come i Documents Tecnics
(DT) zontâts ae leç regjonâl n. 30/1977. Il dialic cu la Sorintendence al fo
garantît par tutelâ il paisaç, la architeture tradizionâl e monumentâl, si
definirin intesis cun associazions di categorie dal setôr edilizi par sigurâ la
disponibilitât dai materiâi di costruzion e mantignî i presits calamirâts.
Intai agns che a
vignirin dopo, cul lâ al mancul a nivel nazionâl de pussibilitât di un acuardi
storic tra DC e PCI, intun clime dificil ancje par vie dal terorisim di çampe e
il stragjisim neofassist, la ricostruzion dal Friûl e le indenant su la fonde
dal pat di unitât e di colaborazion trasversâl fat dopo de seconde scosse: une
intese tra la Democrazie Cristiane di Antonio Comelli e la oposizion, in
particolâr il Partît Comunist Talian, cu la partecipazion ative di dutis lis
fuarcis politichis e culturâls de regjon.
In chest contest, ae
Segretarie Gjenerâl Straordenarie si volè zontâi l’Ufici Operatîf Centrâl: un
organisim politic formât di un rapresentant de DC, un dal PCI, un dal PSI, un
dal PRI e un dal PSDI, che al veve il compit di fâ in maniere che in regjon a
rivassin grandis impresis cun tecnologjiis avanzadis e maestrancis adatis; un
organisim dulà che i rapresentants dai partîts a decidevin i ‘apalts agregâts’,
daûr di une filosofie che, plui indenant, e sarès degjenerade.
Simpri in chei
agns, come che si à viodût, e lavorà ancje la Comission speciâl regjonâl pe
ricostruzion, direte in principi di Salvatore Varisco, membri de Democrazie
Cristiane elet in Consei regjonâl tal 1964 e deventât il prin assessôr ae
Ricostruzion tal 1980; in continuitât cul ‘compromès’ in vore, il so puest lu
cjapà dopo Giulio Magrini che, rapresentant la Cjargne in Consei regjonâl dal
1973 al 1988 tal Grup consiliâr dal PCI, al de un contribût impuartant tal fâ
aplicâ la leç regjonâl che e istituive lis comunitâts di mont e tal elaborâ lis
primis liniis di intervent su la rinassite dal Friûl taramotât.
La esperience de
Regjon autonome Friûl-Vignesie Julie e, plui in gjenerâl, il lavôr di dutis lis
istituzions impegnadis e de classe dirigjente regjonâl a varessin confermât la
validitât des sieltis politichis, cjapadis dispès te presse dal moment, tacant
cu la decision di Aldo Moro di dâi ae Regjon, in prime persone, la gjestion de
rinassite dal Friûl. Graciis ae funzion di vuide tecniche puartade indenant de
Segretarie Gjenerâl Straordenarie, ai singui professioniscj, ai ordins
professionâi, aes competencis tecnichis ancje esternis mobilitadis, a dutis lis
maestrancis che, a nivei diferents, a derin il lôr contribût, in dîs agns al fo
pussibil puartâ insom la ricostruzion de aree taramotade.