Ai
prins di Setembar dal 1976, za prime des scossis de metât dal mês, al jere clâr
par tancj che al sarès stât impussibil tornâ dentri tes cjasis comedadis prin
dal Invier. Il desideri di passâ drets "des tendis aes cjasis", cemût
che al diseve un dai sprocs che a vevin segnât lis primis fasis de
ricostruzion, nol podeve inverâsi.
A
forin soredut lis fuarcis politichis di oposizion a riclamâ ae realtât e a
domandâ di sostituî lis tendis cun roulottes, caravans e cjasis traspuartabilis
par permeti ai taramotâts di passâ l'Invier. A Lignan, su la cueste furlane,
dopo finide la stagjon turistiche e sarès stade la disponibilitât di une vore
di lozaments. Ancje se il scuam sismic al leve indevant, anzit forsit propit
parcè che si scomençave a usâsi aes scossis, la popolazion furlane no voleve
bandonâ lis cjasis. Chei che a podevin fâlu a acetavin di jessi ospitâts di
parincj e di amîs fûr dal Friûl, ancje se la resistence tal partî e restave
fuarte.
Dopo
des gnovis scossis violentis dai 11 di Setembar, il sindic di Glemone, IvanoBenvenuti, al declarà: «O cirarai di fâi capî ae int che no si trate di parâju
vie. Ma i prefabricâts no rivin e sot des tendis nol è pussibil restâ, te
maniere plui assolude». Benvenuti al domandà al prefet di podê disponi di sîs
mil puescj tai albiercs di Lignan: i imprenditôrs a jerin stâts mobilitâts vie
pal Istât. Altris 10.000 puescj jet ju individuà la Regjon Venit tes localitâts
balneârs de marine veneziane di Jesolo e Bibion in albiercs, cjasis di polse e
coloniis. L'ENI al metè a disposizion pal Invier 100 vilutis dal complès
turistic di Borca dal Cjadovri (Belum) che a podevin dâ acet a 600 personis, e
al proviodè a organizâ la assistence sociâl e scolastiche pai sfolâts. Dute la
Italie si mobilità par dâ ricet ai taramotâts e par permetiur di sorevivi ae
stagjon invernâl: a Bologne il sindic Zangheri si indreçà ai citadins par che a
dessin la lôr disponibilitât a ospitâ lis fameis furlanis.
Ai
13 di Setembar, duncje doi dîs prime de gnove grande scosse, denant de
impussibilitât par Regjon e Comuns di risolvi il probleme de disocupazion,
Zamberletti (viôt culì une interviste inedite) al fo riclamât e nomenât di gnûf Comissari straordenari dal Guvier
pal Friûl taramotât, cun podês plui slargjâts. Al à di vê vût un pês ancje il
risultât de visite di Giulio Andreotti a Glemone, ai 3 di Setembar, cuant che
il cjâf dal guvier al fo contestât par vie dai ritarts che si ingrumavin. A
Zamberletti i fo dât di fat il compit di furnî aes desenis di miârs di personis
che a jerin ancjemò sot des tendis un ricovar adeguât tai prefabricâts prin che
al rivàs l'Invier, di passâ duncje de fase dai socors a chê de ricostruzion, e
i fo dade cjarte blancje par operâ «in deroghe a dutis lis leçs, includint chês
su la contabilitât gjenerâl dal Stât» (art. 1 dal D.L. 648/1976).
Cu
la scosse dai 15 di Setembar i events a precipitarin e la soluzion dal esodi e
tornà a cjapâ fuarce. Zamberletti al identificà tes localitâts turistichis di
mâr o di mont, che a vevin struturis ricetivis adatis, lis zonis di evacuazion
dulà che a forin istituîts centris operatîfs di coordenament, clamâts
"Dipartiments assistenziâi." Par permeti l'esodi
"volontari" i veicui militârs a lavin sù e jù desenis di voltis in dì
dai paîs sdrumâts a chestis localitâts.
Par
dâi plui fuarce ae iniziative, ai 24 di Setembar il comissari straordenari al
imponè ai sindics dai comuns di Jesolo, Cjaurlis, Bibion-San Michêl (tal
Venit), e di Lignan, Grau e Ravasclêt (tal Friûl-Vignesie Julie) di recuisî
"in ûs" fin ai 31 di Març dal 1977 lis "cjasis che in chest
moment a son disabitadis", midiant di une procedure essenziâl, notificade
cuntune afission su la puarte di ingrès de abitazion. La recuisizion dai
albiercs e jere za stade ipotizade di Francesco Cossiga cualchi dì dopo de
scosse dai 6 di Mai, adun cu la pussibilitât di dâ acet a 5.000 personis cence
cjase sui transatlantics Michelangelo e Raffaello pronts a tirâ sù lis ancuris
di Gjenue par lâ a Triest.
Une
setemane dopo, il 1n di Otubar, i sfolâts za regjistrâts e ospitâts
inaltrò a jerin cirche 31 mil: plui di 18 mil a Lignan, passe 5 mil a Grau, 4
mil 575 a Bibion, uns 1800 a Jesolo, 500 a Cjaurlis e 360 a Ravasclêt. Al fo
duncje specificât che il riferiment al jere a "cjasis no abitadis di
personis residentis tal comun li che e je la cjase" e aes sîs localitâts tocjadis
de disposizion si 'nt zontarin altris cuatri: For Davôtri, For Disore, For
Disot e Rigulât, dutis sot de jurisdizion dal Dipartiment assistenziâl di
Ravasclêt.
«E
je stade une sfide – al à ricognossût Zamberletti intervistât tal 2016 – tant
al è vêr che il Guvier al jere inciert denant di une date cussì dongje [...] O
recuisirin dutis lis cjasis di feriis fin al Març dal an dopo, ricognossint ai
proprietaris un fit decidût dal ufici erariâl. Tai apartaments o sotetarin lis
fameis, distribuidis in dipartiments in mût di tignî dongje i abitants dal stes
comun e lis scueladis. I anzians no autosuficients invezit a vignirin ospitâts
tai albiercs, che a ricevevin une rete par persone». A jerin ancje chei che no
domandavin jutori e a preferivin paiâ dal lôr. «Tes localitâts di mâr – al
ricuarde Zamberletti – o vevin metût dongje lis comunitâts, o vevin ancje
ricreât lis classis di scuele». No cate dut chest «la int de Cjargne, di Resie
e di Resiute no voleve partî: no tornarìn plui, a disevin». La pôre di no tornâ
e ven fûr a clâr dal document preparât il prin di Otubar dal Centri di
coordenament dai paîs taramotâts: “Pâr no' murî a Lignàn”, dulà che i sfolâts
si lamentavin des cundizions di vite te citadine balneâr e des dificoltâts di
colegament cu lis zonis taramotadis.
Intun
servizi televisîf trasmetût de Rai ai 5 di Novembar dal 1976, il gjornalist
Bruno Vespa al contà di chest esodi e a 'nt ripuartà i dâts. Si diseve che a
Lignan, che al veve 5 mil abitants vie pal Invier e 150 mil di Istât, «la
struture colossâl dai albiercs e veve tignût bot cence fastidis al impat di 20
mil sfolâts» tal mês di Setembar. Un pôcs dai titulârs di albiercs e desenis di
proprietaris di cjasis a ufririn ospitalitât in mût spontani ai cence cjase.
Aes fameis componudis di pocjis personis si de acet tai albiercs, a chês plui
numerosis tai apartaments, sielzint. di preference chei che a jerin tai plans
plui bas dai edificis, parcè che la int provade des scossis e veve pôre di
jessi a stâ plui adalt.
Une
relazion dal Comun di Lignan e ripuarte in maniere puntuâl lis fasis de
sistemazion dai sfolâts. Za te tarde buinore dai 14 di Setembar – si lei – a
vignirin convocâts i responsabii di dutis lis agjenziis turistichis par reperî
i lozaments, e chescj a colaborarin «cence la menace di recuisizions o di
proviodiments di altri gjenar», e si cjaparin la responsabilitât di concedi lis
sistemazions, ancje cence il permès dai singui proprietaris. La municipalitât e
podè cussì fâsi cjatâ preparade cuant che, pôcs dîs dopo, miârs di personis a
rivarin in masse te localitât di mâr. Par frontâ la emergjence, la zonte e
confermà dut il personâl de stagjon estive e a 'nt cjapà sù ancjemò. Si
organizarin uficis pal reperiment di lozaments, par cumplî lis formalitâts
burocratichis e pes assegnazions. Ai vigjii urbans ur fo assegnât il compit di
compagnâ lis fameis tai lozaments assegnâts. Midiant di cheste organizazion, ai
26 di Otubar – e ripuarte la relazion – a forin sistemâts 5.227 nuclis
familiârs, ognidun intune abitazion, par un totâl di 19.330 personis. Al è
interessant fâ un confront cu la presince temporanie di taramotâts li dal EFA
(Ent Furlan di Assistence) – une struture che in chei dîs e deve acet ancje al
personâl di assistence e ai militârs – che ai 21 di Setembar e rivà a un pic di
1.095 ospits, che in curt si sbassarin a 9 cuant che si cjatà un ricovar par
ducj i sfolâts.
Tal
plan tiere dai edificis de citadine balneâr, lis buteghis sieradis ae fin de
stagjon a forin liberadis par dâ acet aes delegazions dai comuns ospitâts; lis
assembleis comunâls si organizarin intun dai cines. Lis classis des scuelis elementârs si tornarin a
dâ dongje tes localitâts turistichis. In chel Invier, tal gnûf edifici
scolastic di Lignan si contavin plui di un miâr di arlêfs, e tra chescj 718 a
rivavin dai paîs taramotâts. Si sperimentarin gnovis formis di didatiche par
includi ducj i arlêfs.
Si
cirive ancje di ricreâ i rapuarts di vicinât: il residence Luna a Lignan City
al ospitave une comunitât di 600 personis rivadis dal Comun di Dartigne. Il
capelan, pre Angelo Zanello, al ricuardave di vê organizât il trasferiment de
sô comunitât in cunvigne cul sindic: «o lerin jù cu lis corieris ma o rivarin a
otignî che nus fossin garantidis viis di comunicazion cu lis zonis evacuadis
dulà che a jerin lis fabrichis. Ogni dì a buinore, une vore adore, corieris
plenis di operaris a partivin di Lignan».
Ma
se a Lignan – cemût che al precisave il servizi de RAI – nol veve coventât
recuisî nissun lozament, a Grau, dulà che a forin ospitâts 6.500 taramotâts, la
resistence e fo fuarte. Si faserin manifestazions in place e Zamberletti al
scugnì recuisî cuasi ducj i 1.651 apartaments che a coventavin. Ancje a Jesolo,
a riferivin lis cronichis, si puartarin indenant recuisizions massivis. Tes
localitâts marinis o climatichis dal Venit, a vignirin recuperâts in cheste
maniere 3.300 dai 8.400 apartaments che a saran ocupâts dai furlans che a vevin
pierdût lis cjasis.
Cul
plan di Zamberletti, cuant che al rivà l'Invier, plui di 32.000 personis cence
cjase a cjatarin acet tes localitâts turistichis. Altris 30 mil a restarin tes
zonis disastradis, sistemadis in barachis e lozaments precaris, 10 mil di lôr a
jerin ancjemò tes tendis e tes roulottes. 18 mil a vignirin ospitâts di parincj
e cognossints, tancj fûr de Regjon e tal forest.
Tal
servizi de RAI a passin lis
imagjins dal fruts che a zuin dongje des tors residenziâls e dai anzians che a
cjaminin sul savalon, denant de terace a mâr, dai uficis des splazis e dai bars
sierâts. I intervistâts a contin che «si vîf cu la nestre nostalgjie, dal paîs
che o vin lassât, dai ricuarts, dai muarts, des personis amadis che o vin
pierdût». Ma – si sint de vôs che e conte – «nissun si lamente, nissun al
proteste, ma il pês dai ricuarts al compagne ogni azion de zornade».
Cussì
l’an dopo, il 1977, al sarès stât chel de costruzion dal "Friûlprovisori", chel dai prefabricâts che a rivarin a dâur acet ancje aes
fameis che, sul tacâ dal Istât, a tornarin "des splazis".