I agns di cressite: 1978-1998

I fatôrs che a àn permetût al teritori furlan e ae sô popolazion di mostrâ une grande capacitât che e anticipave il concet di resilience a son di analizâ tignint cont dal contest socioeconomic particolâr de regjon di in chê volte.

Cemût che si à za vûtdit, il Friûl de metât dai agns Setante al jere une realtât za inviade sul troi dal svilup economic sul model di chê che a vevin definît ‘tierce Italie’, caraterizade soredut di une industrializazion slargjade fondade su aziendis plui o mancul piçulis, cun produzions orientadis in particolâr su bens di consum e durabii (mobii, eletrodomestics, cjalçaduris, vistiari, e vie indenant); sul superâ o rimplaçâ i aglomerâts industriâi dal Votcent e dal Nûfcent; sul integrâ cun gradualitât chest sisteme intun marcjât unic european in fase di costruzion (CEE – Comunitât Economiche Europeane, istituide tal 1957). Il slargjâsi svelt di chest model, ancje te aree che e sarès stade cjapade dal taramot, al tocjà ecuilibris sociâi vieris di secui. I zovins, che a vevin une scolarizazion plui alte di chê dai gjenitôrs, a cjatavin subit lavôr e a tindevin a emancipâsi de famee tradizionâl; la agriculture miste di stamp arcaic, ben rapresentade dai filârs di morârs, e jere aromai dome un complement dal redit, o pôc di plui. Dongje de cjase contadine al jere il capanon cun dentri lis machinis de gnove microindustrializazion e il contadin si divideve "a mieç" tra il cjamp e la oficine di famee, o la fabriche no lontane.

La idee che la industrializazion rapide dal Nordest dal ultin cuart dal Nûfcent e vedi compuartât la sostituzion di une economie agricule cuntune industriâl e conte dome une part de veretât. Cemût che al pant il titul, emblematic, di un libri di Carlo Tullio Altan, Tradizione e modernizzazione (1981), lis dôs dimensions no jerin alternativis ma ben complementârs: la seconde e rivà a disvilupâsi dome parcè che e jere fondade su la prime, pe disponibilitât di maestrancis, pal contigniment dai coscj, pe culture dal lavôr, pe coesion sociâl di fonde, pal rûl determinant de famee, pe organizazion razionâl dal teritori, pe rêt des relazions personâls di un teritori fat di piçui paîs. A son dutis componentis sociâls e culturâls che la ricostruzion 'cemût che al jere, li che al jere' e à mantignût, valorizât e judât a riprodusi intune realtât economiche in grande trasformazion, dulà che chescj elements tradizionâi a forin une struture di fonde indispensabile.

La vicende dai emigrants tornâts e rapresente ben cheste integrazion tra vecjo e gnûf. Tai agns Sessante si jere fermât il flus di lavoradôrs espatriâts, che a jerin partîts dopo dal 1945 par vie de situazion economiche dal dopovuere, e za prime dal taramot a vevin scomençât a rimpatriâ in mût definitîf lavoradoris – ma soredut lavoradôrs – stagjonâi o che a jerin stâts par cualchi an tal forest. Chest procès al puartà daûrsi diviers aspiets positîfs: al furnì maestrancis pe edilizie tal moment dal pic de ufierte di lavôr, al garantì figuris che a vevin disvilupât lis lôr professionalitâts tal forest (un aspiet che al ven evidenziât da râr), al fasè nassi une concorence positive tra il setôr de ricostruzion e chel de manifature.

Se, duncje, un dai lûcs comuns plui indurants sul taramot dal Friûl - ven a stâi, la idee che chest event al sedi stât la faliscje che e à stiçât la modernizazion de regjon - al è stât dineât di un pieç dai fats, un altri stereotip, chel pandût de detule furlane “fasìn di bessôi”, si à di calcolâlu tignint cont de grande cuantitât di finanziaments esternis che a sflocjarin sul Friûl dal 1976 indevant.

Za tal Istât dal 1976 si veve capît che il Friûl par ripiâsi al varès vût bisugne di supuarts esternis impuartants. Par podê tornâ a inviâ lis ativitâts produtivis dopo dai doi taramots di Mai e di Setembar, e par sostignî il disvilup dal sisteme produtîf locâl, si meterin in vore une schirie di proviodiments legjislatîfs che si puedin dividi in dôs fasis. Te prime, dal 1977 al 1981, e fo la Regjon autonome Friûl-Vignesie Julie a aministrâ i finanziaments rivâts dal Stât par chel fin, che si poderin gjestî sul puest in gracie di struments legjislatîfs che a jerin stâts prontâts tai prins agns di vite de gnove regjon a statût speciâl, midiant di ents e di struturis intermediis (tant che la finanziarie regjonâl Friulia) nassûts ancje chei prin dal 1976. Cemût che al à notât Roberto Grandinetti, al fo un finanziament "a ploie", li che lis aziendis plui grandis a rivarin, dut câs, a fâ valê il lôr pês relatîf.

La seconde fase e scomençà cu la leç n. 828 dai 11 di Novembar dal 1982 Ulteriôrs proviodiments pal completament de opare di ricostruzion des zonis de regjon Friûl-Vignesie Julie, cjapadis dal taramot dal 1976 e des zonis taramotadis de regjon des Marcjis, li che la Regjon autonome e doprà i finanziaments di cheste norme midiant di proviodiments e specifichis modalitâts di assegnazion. I invistiments a forin destinâts pal plui ai fabricâts produtîfs, ai implants e ai machinaris no dome di chês aziendis colpidis dal taramot, ma di une fasse plui largje di ativitâts economichis industriâls logadis ancje fûr dal Friûl taramotât. La masse di bêçs che e plombà su la regjon e fo enorme: 978 miliarts di liris pal lustri 1984-1989, e di chescj ben 605 miliarts (311,5 milions di euros) dome intal trieni 1984-1986.

Ancje in cheste seconde fase, une cuote rilevante dai trasferiments e passà par Friulia. Dut câs, no jere plui une cuistion di finanziâ la ricostruzion produtive, ma di daûr supuart a tantis aziendis che, par plui motîfs, a jerin jentradis in crisi. Duncje l'efiet di cheste sorte di sglavinade di finanziaments al fo dopli: di une bande al judà i imprenditôrs cuntune vision dinamiche e manageriâl a superâ moments di dificoltât e vuidâ la aziende bande gnûfs sistemis di produzion e gnûfs marcjâts, di chê altre al fo un respîr momentani, dât a spesis de coletivitât, bon dome di ritardâ la crisi inevitabile di altris ativitâts che pe lôr struture no jerin in stât di rinovâsi.

Tra lis causis di fonde dal malstâ che al tocjà no pocjis aziendis furlanis cul tacâ dai agns Otante, si à di tignî cont di chel slargjament dal senari competitîf mondiâl che al à non 'globalizazion'. Tai marcjâts dulà che a jerin presintis tantis produzions regjonâls, a scomençarin a jentrâ protagoniscj che a vignivin di realtâts di fûr de Europe o di chei Paîs che par tradizion a furnivin semilavorâts: un procès che al varès vût un grant sburt tai prins agns Novante cul crac dal sisteme economic de Europe centriorientâl e balcaniche, e cui events a cjadene che chest al causà.

In chest passaç delicât, une serie di caratars che a jerin stâts la fonde de grande cressite de economie furlane tra la metât dai agns Sessante e la metât dai agns Otante, sorealimentade dai finanziament dal taramot, si palesarin tant che fatôrs di crisi, o almancul di limitazion de resilience economiche e teritoriâl. Par esempli, al jere un ritart evident tes strategjiis di marketing, che no vuelin dî dome la capacitât di vendi un prodot ma, intun sens plui larc, la capacitât di interpretâ i cambiaments dal marcjât, e se pussibil di anticipâju. Une altre des carateristichis tipichis de industrializazion dal Nordest, ven a stâi la sô estrazion e dimension familiâr, tal moment che i senaris globâi a scomençarin a cambiâ e al coventave vê une visuâl plui slargjade, e risultà jessi un fren: dispès i imprenditôrs fondadôrs des aziendis no vevin favorît mudaments a nivel dirigjenziâl, la vision manageriâl e jere insuficiente, i capitâi sociâi a jerin par solit inadeguâts, e vie indenant.

Il flum di bêçs rivâts in Friûl tai agns Otante a un ciert pont si suià: la politiche di finanziament industriâl des leçs sul taramot, in particolâr la 828/1982, no podeve lâ indevant tai agns Novante, intun contest plui larc di esauriment dal cuadri politic sedi nazionâl – che al varès puartât a Tangentopoli - sedi regjonâl: chel gjenar di azions, ancje se e fos stade inmò la disponibilitât economiche par finanziâlis, nol jere plui sostignibil ni par vie des restrizions che e imponeve la legjislazion europeane, ni par ce che al inten la sô eficacie, parcè che a riscjavin simpri plui di produsi efiets straviâts e assistenziâi.

I gnûfs protagoniscj de economie regjonâl, e plui in gjenerâl di chê regjon slargjade che e vignive clamade 'Nord Est', ma che e cjapave dentri il Friûl ad in plen, a forin tai agns Novante i 'distrets industriâi', une espression doprade par definî chês zonis delimitadis dulà che, par une sedimentazion storiche e culturâl, a jerin nassûts sistemis omogjenis di impresis specializadis intun setôr produtîf specific. Al fo ancje cul consolidâsi dai distrets industriâi che il teritori furlan al rivà a superâ cierts limits dal disvilup dai agns Setante e Otante e a frontâ une serie di sfidis deventadis aromai globâls. Cussì, tal 1999, la leç regjonâl n. 27 Pal disvilup dai distrets industriâi e identificave cuatri distrets industriâi (che plui tart a deventaran siet): il distret de cjadree, chel agroalimentâr, il distret dal curtìs e chel dal mobil. Cutuardis comuns tra chei classificâts pôc dopo de scosse dal Mai dal 1976 tant che ‘sdrumâts’ e ‘danezâts in maniere serie’ a fasevin part des primis trê zonis a vocazion industriâl specifiche nomenadis parsore.

Duncje, tai agns Otante, ae crisi de ocupazion te edilizie causade de diminuzion progressive dai puescj di lavôr pal lâ al mancul de ricostruzion (-37% te provincie di Udin tra il 1981 e il 1991), e corispuindè une diminuzion minime dai ocupâts te industrie (-2%) e une cressite cuasi simetriche dai ocupâts tai servizis. Chescj, che aromai a superavin i dipendents de industrie, a jerin il segn che il Friûl al lave incuintri al gnûf mileni e ae introduzion dal euro cuntun model di societât fondât suntune economie soredut terziarie.