Metude in sigurece e demolizions
Centro documentazione video del Comando Provinciale VVF Udine
Pôcs dîs
dopo de catastrofe la Regjon, vude la deleghe dal Stât, e istituì un Fonts di
solidarietât, finanziât cun 10 miliarts di liris, par garantî i prins
intervents urgjents ai taramotâts. A jerin i 10 di Mai dal 1976. Trê dîs dopo,
il Consei dai ministris diret di Aldo Moro al fasè bon il D.L. 227, convertît
in leç ai 29 di Mai, par assegnâi ae Regjon un contribût speciâl di doprâ,
«ancje cun deleghe ai ents locâi», par ripristinâ lis ativitâts agriculis e
produtivis, e riparâ e tornâ a costruî i edificis privâts. La leç e obleave a
verificâ dentri di sîs mês i dams provocâts dal sisme.
Dal mês
di Mai a chel di Lui, in ogni Comun a jentrarin duncje in funzion i grups coordenâts
de Prefeture, che e de ai vigjii dal fûc il compit di puartâ i prins socors ae
popolazion e di meti in sigurece lis struturis edilizis che a vevin patît dams:
si stabilizarin lis struturis malsiguris, si individuarin lis parts di butâ jù
e chês di rinfuarçâ. Ai 7 di Jugn la Regjon e fasè buine la L.R. 17 che e
previodeve «intervents di urgjence par soperî aes straordenariis e imediadis
esigjencis abitativis des popolazions tocjadis dai events telurics». Dongje dai
vigjii dal fûc e dai volontaris, a operarin tercets di tecnics impegnâts a
davuelzi sorelûcs complicâts, a aciertâ i dams e a valutâ i intervents che a
coventavin par recuperâ i edificis e lis infrastruturis colpidis. Par puartâ in
miôr il sisteme di rilevament inviât cu lis oparis provisionâls, si prontà une
schede tecniche che e permeteve di codificâ i criteris indispensabii par decidi
cuâi edificis butâ jù e stimâ i coscj dai intervents di conservazion e
riparazion.
L’obietîf
al jere chel di «fâ di corse» par garantî une sistemazion ai taramotâts, metint
in secont plan la cuistion struturâl. Dopo des scossis fuartis dai 15 di
Setembar, però, chest aspiet al deventà prioritari e ducj a mudarin di opinion.
Tecnics e politics a scugnirin ricognossi che la strade des riparazions no jere
chê juste e si cambià di strategjie; la rinassite si fondà su la ricostruzion e
la ristruturazion antisismiche dai edificis, par tornâ a puartâ la popolazion
tai paîs di origjin che a saressin deventâts dal dut sigûrs.