La valutazion dai dams

La valutazion dai dams e fo il prin passaç tecnic di un sisteme che si definì sul cjamp, dentri di une rêt di comuns che in chê volte no vevin nissune competence par frontâ une emergjence di misure cussì ecezionâl sedi par estension che par gravitât.

Cemût che a àn evidenziât Giorgio Dri e Roberto Gentilli - doi professioniscj che a àn vivût di persone cheste esperience - inte lôr analisi publicade de riviste dal Ordin dai inzegnîrs intal 2016, il rilevament dai dams, metût in vore cun urgjence, al è stât il prin moment significatîf dulà che il mont de politiche, di une bande, e chel tecnic, di chê altre, a scugnirin confrontâsi e cjatâ soluzions condividudis. «Pai politics», a scrivin Dri e Gentili, «la esigjence fondamentâl e jere di fâ a la svelte ("des tendis aes cjasis") e di dâur il ricognossiment plui fuart ai sindics e soredut ai proprietaris, sigûrs che chescj, cu la esperience vivude in prime persone, a podessin valutâ miôr (e se dal câs indreçâ) i intervents publics. Pai tecnics, l’impuartant al jere cirî di evitâ grancj erôrs e otignî une uniformitât decente tes valutazions dai dams, fatis in cundizions che a jerin dificilis no dome di un pont di viste logjistic, psicologjic e, cualchi volte, de sigurece personâl, ma ancje sot de pression di une opinion publiche che e varès volût che lis valutazions tecnichis (preliminârs ae concession dai contribûts) si lis ves puartadis insom in curt.»

Passâts i prins moments dai socors e dopo di vê metût in sigurece i edificis ruvinâts, il prin obietîf al fo chel di fâ l'inventari dai dams in viste des riparazions, tignint cont ancje di ce che e disponeve la prime leç regjonâl su la materie, la L.R. 15 dai 10 di Mai dal 1976, che e dave fûr «contribûts in cont capitâl fin al 90 par cent de spese pe riparazion e pe ricostruzion, ancje sostitutive, di abitazions privadis sdrumadis o ruvinadis in mût seri.»

Cualchi dì dopo, il Consei regjonâl al faseve buine in maniere unanime une gnove leç, la L.R. 17 dai 17 di Jugn (Intervents di urgjence par proviodi aes esigjencis abitativis straordenariis e urgjentis des popolazions colpidis dai events dal taramot dal Mai dal 1976 tal Friûl-Vignesie Julie) che, cemût che si lei tal verbâl de sentade, e proponeve di garantî «un aiût svelt e eficaç ae popolazion colpide dal taramot disastrôs, che par chel e je restade cence cjase e cumò e scuen lozâ tes tendopolis.» L’obietîf al jere chel di semplificâ la burocrazie: al vignive fissât un limit di spese di 6 milions di liris par ogni abitazion di «no grande entitât» di riparâ, cence escludi la pussibilitât di fâ ancje intervents struturâi.

La intenzion dal legjislatôr e jere chê di limitâ i intervents dome aes riparazions e di lassâ fûr pal moment i lavôrs struturâi, massime par evitâ di colâ tes disposizions des leçs antisismichis, e di limitâ i adempiments par permeti di passâ in curt des tendis aes cjasis comedadis.

In plui de cuistion de urgjence, la redazion de norme e obleave il legjislatôr a fâ ciertis sieltis, prin di dut chê di decidi se si veve miôr un intervent public o privât. E dopo di chest, se al fos miôr organizâ apalts "agregâts," ven a stâi che a metevin dongje plui lavôrs, o pûr favorî lis iniziativis individuâls dai singui. Su chescj aspiets, i tecnics a vevin opinions diferentis dai politics: i prins, su la fonde di une valutazion concrete des capacitâts operativis des impresis e dai citadins, a jerin a pro di unificâ i intervents in operazions plui grandis, intant che i politics a vevin pôre che cheste metodiche e podès limitâ la azion dai citadins che a vevin vût dams e lis sieltis strategjichis des aministrazions locâls. Ancje se tal stampon de leç lis dôs modalitâts di intervent a jerin valutadis tant che ecuivalentis, tal test finâl l'intervent public al jere limitât ae "facoltât", pai sindics, di fâ acuardis cu lis aziendis, judant cussì la esecuzion dai lavôrs e slizerint i coscj (cheste opzion, però, e fo doprade pôc).

Par valutâ i dams, l'impuart dai contribûts di dâ fûr e la forme di riparazion plui adate in ogni comun, un o plui grups di tecnics a rilevavin la cundizion dai edificis che no jerin stâts ruvinâts in maniere ireparabile. Par podê fâ cheste valutazion cuntun criteri omogjeni e sigûr, l’inzegnîr udinês Marcello Conti al prontà une" "Schede di verbâl di valutazion dai dams" li che i rilevadôrs a scrivevin un "judizi sintetic" su la cundizion dal edifici che si podeve classificâ tant che "sdrumât", "no restaurabil" o "restaurabil". Tal câs de ultime cundizion, il compiladôr al veve di scrivi se si tratave di un intervent totâl o parziâl e se al coventave fâ oparis struturâls.

Par valutâ la convenience de riparazion, te schede no vevin di mancjâ il valôr dal edifici ai 5 di Mai e chel dal cost stimât pal intervent di riparazion, calcolât tant che sume dai "coscj unitaris elementârs" riferîts ai elements costrutîfs principâi. Cheste procedure complicade par determinâ i coscj di riparazion no tignive cont di nissune indicazion di caratar progjetuâl de bande dai rilevadôrs: si devin dome indicazions gjenerâls utilis par cuantificâ l'intervent, cence un esam struturâl detaiât, che si pensave di podê fâ plui indevant, ma simpri prin di comedâ l'edifici.

Dut câs, te discussion infogade tal Consei regjonâl si decidè che i grups di rilevazion a varessin vût di determinâ ancje lis oparis di riparazion che a coventavin e che tal verbâl dal aciertament si varès vût di zontâ un sfuei cun dentri lis "Indicazions di massime su lis modalitâts tecnichis dal intervent di riparazion"; in cualchi câs chestis indicazions a menarin a malintindiments e protestis tra chei destinataris dai contribûts che si spietavin un progjet struturâl esecutîf.

Ogni grup di rilevament al veve dentri trê tecnics, funzionaris publics o esperts regjistrâts tai regjistris dai ordins e dai coleçs regjonâi, cu la poie di coleghis rivâts di dute Italie. Tal zîr di cuatri mês si organizarin e si mandarin sul puest 390 tercets, che a jemplarin plui di 85.000 schedis di sorelûc.

Ogni costruzion e veve bisugne di valutazions tecnichis, a nivel costrutîf e static, economic e ancje uman. La composizion dai tercets e veve di tignî cont de rotazion dai tecnics par garantî la presince di professioniscj esperts in ogni grup dongje di chei plui zovins. I components dai tercets a jerin pal 40 par cent gjeometris, daspò inzegnîrs, architets e pal 10 par cent perîts. La operazion di rilevazion dai dams e tacà daurman: ae fin di Jugn, nancje doi mês dopo des scossis, a jerin za stâts metûts dongje cuasi 200 tercets. Cun dut des critichis che cheste operazion si puartà daûr, il lôr lavôr al permetè di cjapâ sù un numar significatîf di stimis, intun timp pluitost curt e cuntune grande uniformitât di judizi. Fra Mai e Setembar i tecnics a stimarin i dams par cuasi 250 miliarts di liris. Fermade par vie de gnove emergjence sismiche che no permeteve di tignî chel ritmi, la racuelte dai dâts le varessin finide te prime metât dal 1977. Le doprarin i docents des dôs universitâts regjonâls – Giovanni Battista Carulli e Dario Slejko a Triest, Marcello Riuscetti a Udin – par studiâ la vulnerabilitât e la valutazion dal pericul sismic.

Intune sô memorie, il segretari gjenerâl straordenari pe ricostruzion EmanueleChiavola al sclarive lis resons di cheste operazion tacade intal Mai dal 1976: «Si pensave che, su la fonde dai dâts cjapâts sù cu lis schedis, si varès podût dâ fûr i contribûts pes riparazions, che a saressin stadis fatis daurman dai citadins che a insistevin par tornâ in curt tes lôr cjasis, cul sproc: "Novolìn barachis"». Dut câs, Chiavola al scugnì ricognossi che «l’impat dûr cuntune realtât cetant diferente si lu ve ai 15 di Setembar»: lis consecuencis dal gnûf taramot, che nol veve sparagnât lis cjasis za comedadis, a vevin obleât ducj a ameti che il plan des riparazions, fondât su la risistemazion superficiâl des muraduris, cence previodi intervents struturâi antisismics, al jere impussibil di realizâ e destinât a falî. La reazion psicologjiche e fo cussì violente che e puartà a meti in discussion fintremai il principi di riparâ e tornâ a fâ sù "li che al jere e cemût che al jere". A prin colp si slargjave la idee che rinfuarçâ lis costruzions esistentis cun criteris antisismics nol sarès stât pussibil, e nancje convenient, e che al sarès stât miôr butâ jù i edificis ruvinâts par tornâ a fâju sù gnûfs, ancje intun altri puest.

Passât chel moment di disperazion e di ripensament, si tornà a cjapâ in considerazion la pussibilitât di lâ indevant cu la riparazion antisismiche dai edificis ruvinâts: ai 30 di Jugn dal 1977 e fo duncje presentade une gnove leç regjonâl specifiche, par normâ lis riparazions (L.R. 30 dai 20 di Jugn dal 1977), su la fonde dal fat che la riparazion des cjasis no si le podeve plui calcolâ tant che intervent urgjent, ma tant che un procediment plui meditât e definitîf. Cemût che al spiegà il Consei regjonâl intal dibatit su la leç, la ricostruzion e varès vût di jessi "un element fondamentâl [...], che il so prin criteri al veve di jessi chel di armonizâ, intun contest belançât e razionâl, lis gnovis costruzions cu la part sanabile dal patrimoni edilizi colpît".