Architeture de ricostruzion: la edilizie, la industrie e lis infrastruturis

In sostance, si pues dî che la ricostruzion e jere stade puartade insom tal zîr di dîs agns. Za tal 1986, tal so intervent te cunvigne '1976-1986. La ricostruzion dal Friûl', Francesco Tentori, storic e critic de architeture, al podeve dâ un judizi. Al disè che la ricostruzion furlane e leve valutade tant che une prove straordenarie: «positive, par cemût che e à savût meti adun e impegnâ lis fuarcis plui diferentis; positive, pe velocitât dai risultâts; positive – tal complès – pe cualitât medie otignude».

Dal sigûr no si podeve dî diferent, cjalant i risultâts intun timp cussì curt, massime se si ju confronte cun ce che al sucedeve ancjemò tal Belice de 'ricostruzion infinide'. In Friûl, plui o mancul 75.000 cjasis a jerin stadis comedadis e 16.000 ricostruidis, cuntune rapiditât di fâ impression: par justâ i edificis che a vevin patît pôcs dams a jerin bastâts a pene trê agns, cuntune medie di cirche 10.000 abitazions ad an. Pes riparazions invezit, la medie e fo di 5.000 edificis ad an, e di 1.500 pes abitazions gnovis.

Chest risultât straordenari al è stât pussibil par vie di chê concomitance di fatôrs normatîfs aministratîfs e socioculturâi che e je stade definide 'Model Friûl'. A nivel ricostrutîf, e fo essenziâl la standardizazion di proceduris e pratichis – de valutazion dai dams e dai coscj ae progjetazion daûr dai Documents tecnics, aes tecnologjiis edilizis praticabilis ancje des piçulis impresis – che e à permetût di progredî a volop. L'obietîf al è stât dal sigûr otignût ancje se, pai studiôs di architeture, a cost di une 'ricostruzion anonime' che di fat e replicà, almancul tes formis visibilis, ce che al esisteve prin. Intant che al laudave i risultâts, Tentori stes al osservave che te ricostruzion furlane il moderni, inte architeture, «al fo vinçût a larc dal [lengaç] fals tradizionâl».

Il lengaç architetonic moderni vuê si lu cjate, tal Friûl dal taramot, massime in chei che a son i simbui di une comunitât, il municipi e la glesie, cuant che però, tal câs dai edificis religjôs, no si de la preference al restaur o ae ricostruzion fedêl di ce che al esisteve, soluzions che si meterin in vore ancje cuant che no si tratave di oparis di art straordenariis come il domo di Glemone o chel di Vençon.

I dâts su la ricostruzion des 1.192 glesiis de Arcidiocesi di Udin a pandin un cuadri significatîf: il taramot a 'nt sdrumà 114, e 234 a patirin dams une vore seris. In plui, altris 484 edificis di cult a patirin dams lizêrs. In chê stagjon si butarin jù ancje 41 cjampanii, intant che altris 119 a patirin dams une vore plui impuartants a pet dai 164 lesionâts dome in maniere lizere.

Fra i gnûfs edificis religjôs il risultât nol è simpri stât convincent, al baste pensâ al espressionisim smamît de glesie dai Sants Pieri e Pauli a Maian. No son mancjâts esemplis citâts tra lis miôr architeturis eclesiâls, come la glesie di Sante Eline a Montenârs (progjetade di Augusto Romano Burelli e Paola Gennaro), la glesie di Puartis Gnûf, opare di Emilio e Simonetta Daffarra, e la glesie di Sant Zorç a Lusevare, dissegnade di Gianni, Elena e Giulio Avon.

Lis gnovis tindincis architetonichis a àn cjatât plui spazi tes ricostruzions o tes ristruturazions dai municipis; tai 45 comuns disdrumâts, 23 a vignirin ricostruîts, doi in plui a pet dai 21 restaurâts. In cualchi câs, i edificis storics comunâi a forin slargjâts e trasformâts, e ancje in chest câs i intervents progjetâts dai architets Roberto Pirzio Biroli a Vençon, e Giovanni Pietro Nimis a Glemone, pûr cun cualchi critiche, a son ancjemò considerâts un riferiment.

Tai gnûfs edificis a dominarin i lengaçs dal modernisim e soredut dal postmodernisim. Tra i esemplis plui di sucès si ricuardin i municipis di Çurçuvint e di Montenârs di Augusto Romano Burelli – che Tentori i varès dât «l’oscar pe ricostruzion» – e chel di Clausêt di Giuseppe Davanzo, che al è integrât a diviers nivei altimetrics intal tiessût storic dal paîs. Simpri daûr dal judizi di Tentori, a saressin vignûts fûr mancul ben i municipis di Buie dai architets Giovanni Caprioglio e Alessandro Pertoldeo e chel di Osôf di Luciano Semerani, Gigetta Tamaro e Adalberto Burelli. La opinion dal studiôs e fo negative ancje par chel che al tocje il gnûf comun di Dartigne; nol pandè invezit nissun judizi ni sul slargjament dal comun di Sudri, firmât di Gino Valle, ni sul gnûf municipi di Trasaghis, progjetât di Arnaldo Zuccato. Ducj chescj intervents a jerin stâts fats in agns prime dal taramot.

Ancje la ricostruzion dai stabiliments industriâi e fo esemplâr. A Maian si ve di fâ diviersis modifichis struturâls tal palaç dai uficis de aziende Snaidero, calcolade tant che un dai simbui dal 'moderni' furlan. L’edifici al jere in costruzion e il so telâr, ancjemò cence i innomenâts oblôs, al continue a dominâ la sene tes fotografiis di Maian sdrumât. Dopo dome doi agns, te stesse aree industriâl, doi gnûfs edificis cu la struture di metal, simpri progjetâts di Angelo Mangiarotti, a forin destinâts a centri par esposizions e pai servizis sociâi. Un altri edifici par esposizions lu progjetà l’architet Alessandro Vittorio, che al doprà formis gjeometrichis particolârs par che lu notassin ancje i automobiliscj di passaç. Se il taramot al sparagnà il centri servizis e uficis progjetât di Gino Valle pe Fantoni a Riul di Osôf, finît intal 1975, a Glemone, invezit, al sdrumà il stabiliment des Manifaturis che al fo ricostruît intun sôl an, daûr dal progjet dal architet udinês Emilio Mattioni, che al diferenziave cun razionalitât lis unitâts di produzion di chês di servizi. Lis struturis reticolârs di metal, adun cun chês di beton armât, a creavin un spazi une vore flessibil, cu la pussibilitât di slargjâlu plui indevant.

Concepide dal legjislatôr tant che motôr di svilup, la ricostruzion dal Friûl si caraterizà ancje pe architeture dai viadots de trate autostradâl Udin-Tarvis e pes infrastruturis su lis stradis statâls 13 e 251, progjetadis di Silvano Zorzi, un dai struturaliscj talians plui innomenâts. Tal ambit de modernizazion de ferovie Pontebane, rialçade in part par eliminâ i passaçs a nivel, tai agns Novante Alberto Antonelli al progjetà il gnûf edifici pai viazadôrs te stazion di Glemone.

In chest contest si zontarin i jutoris garantîts dal vicepresident dai Stâts Unîts Nelson Rockefeller III dopo de sô visite in Friûl. In pôc timp, il Congrès dai Stâts Unîts al assegnà 25 milions di dolars, plui o mancul 21 miliarts di liris, paiâts de Agjenzie dai Stâts Unîts pal disvilup internazionâl USAID (United States Agency for International Development). Tra la fin di Mai e i prins di Jugn, il diretôr dal program, Arturo Giovanni Costantino, al rivà in Friûl cuntun grup di esperts e tecnics dai Stâts Unîts par doprâ i fonts. Un milion di dolars al coventà par comprâ medisinis e furniduris di emergjence, i 24 milions che a restavin a forin vincolâts ae costruzion di scuelis e di centris pai anzians. Intun prin moment la progjetazion dai intervents e tocjà lis cjasis di polse di San Denêl, Maian, Osôf e Magnan in Riviere e lis scuelis di Buie, Faedis, Glemone, Manià, Osôf, San Denêl, Travês e Maian.

Dopo des scossis di Setembar, il Congrès al destinà altris 25 milions di dolars e a 'nt zontà ancjemò 3 par compensâ i dams patîts inte provincie di Pordenon, dulà che e je la base aeronautiche americane di Davian. Il secont program finanziât cuntun totâl di 55 milions di dolars assegnâts dai Stâts Unîts, che vuê a corispuindin a cirche 200 milions di euros, al previodeve la costruzion di cinc edificis scolastics a Davian, Cividât, Manià, Sacîl e Spilimberc, trê altris centris pai anzians a Buie, Pordenon e Vile di Cjargne e une cjase pai students a San Pieri dai Sclavons. I Stâts Unîts a incargarin la Associazion Nazionâl Alpins (ANA) pe gjestion direte dai finanziaments, intant che la realizazion des oparis le assegnarin ae filiâl taliane de imprese americane Austin company.

Ducj i progjets, afidâts a professioniscj talians e americans, a vevin di rispietâ «i concets americans plui modernis de progjetazion antisismiche». La sielte, di nivel une vore alt, e colà sui studis Mitchell/Giurgola dal roman Romaldo Giurgola, associât cun Ehrman B. Mitchell, e su chel di Renato Severino cun Sergio Alessiani. Ancje altris esponents di rilêf a derin il lôr contribût: Gianni Avon, l'unic professionist furlan, e i milanês Marco Zanuso, Giancarlo De Carlo cun Fausto Colombo, Vico Magistretti, Umberto Riva e Luisa Anversa. Intant che si lassave la massime libertât, ai progjetiscj si ur domandave di ispirâsi a un lengaç tradizionâl, che al rispietàs la architeture furlane.

Tra i intervents architetonics esemplârs no si puedin dismenteâ cierts lavôrs di Gino Valle, in particolâr il cuartîr di edilizie popolâr di Buie, finanziât de Associazion dai Industriâi, e lis ricostruzions dal tiessût urban a Sant Stiefin di Buie e a Glemone. A Glemone, denant dal isolât di Valle, al è il palaç de Bancje Popolâr, progjetât tal imprin di Carlo Scarpa e puartât insom dopo de sô muart di Luciano Gemin. Incargât de ricostruzion dal istitût di credit suntune aree plui grande de origjinâl, ancje in mancjance di restrizions, Scarpa al decidè istès di ripristinâ la volumetrie dal palaç Pontotti sdrumât, cul cuviert a alis, compagnât di un cuarp caraterizât di grandis luminariis.