Un dai lassits plui
significatîfs dal taramot dal Friûl dal 1976 al cjapà forme intun ambit a prin
viodi lontan de opare di socors de popolazion e di ricostruzion dal teritori:
si tratave de nassite a Udin, cjâf lûc de provincie, di un ateneu statâl, la
Universitât dal Friûl.
Dopo la inclusion inte
Costituzion dal 1948 dal gnûf ent regjonâl creât cu la union des Provinciis di
Udin, Gurize e Triest (chê di Pordenon e sarès nassude tal 1968), la gnove
Regjon si jere cjatade in dotazion la Universitât di Triest, fondade tal 1924
cu la Facoltât di Economie e cumierç, e slargjade tra il 1938 e il 1956 cun
Jurisprudence e cun diviersis facoltâts umanistichis e sientifichis. Dut câs, a
metât dai agns Sessante tal Triveneto e coventave une gnove Facoltât di
Medisine - stant che la plui 'orientâl' e jere a Padue - e, ancje se tancj a
domandavin di vierzi un gnûf Studi a Udin par dâi acet, tal 1965 e fo assegnade
invezit a Triest, che intant e jere deventade la sede dal cjâf lûc de Regjon a
statût speciâl, cumò dal dut operative.
La pussibilitât di vê une
universitât a Udin le sintivin une vore dutis lis classis sociâls furlanis: la
sô mancjance e jere calcolade tant che un fren ae cressite di un teritori che, intant,
al veve scomençât a cori in ducj i cjamps de vite economiche e sociâl moderne.
La scolarizazion di masse che e compagnave il bum economic e proviodeve une
grande cuantitât di gnûfs diplomâts che a aspiravin a otignî un titul
universitari; in plui, la liberalizazion de iscrizion tes universitâts par ducj
i diplomâts dai cuincuenis di cualsisei orientament (Leç Codignola, 1969),
concedude dopo des protestis dai students dal 1968, e fasè deventâ simpri plui
intolerabile la mancjance di un ateneu tal teritori.
Intai agns dopo si
vierzerin universitâts statâls a Salerno, Bergamo, Reggio Calabria e Rome Tor
Vergata: a Udin a fondarin un Consorzi universitari (1967), e un Comitât pe
universitât furlane (1971), par iniziative di un insegnant dal liceu classic
locâl, Tarcisio Petracco. Ma il progjet nol le indevant, blocât de politiche
regjonâl e nazionâl, de fuarte oposizion dal ateneu triestin, des domandis di
istituî gnûfs ateneus che si ingrumavin tal ministeri, rivadis di dute Italie e
fatis sul sburt des aspirazions dai fîs dal baby
boom che a vevin bisugne, e forsit ancje dirit, di frecuentâ i studis plui
avanzâts dongje di cjase. Ae fin dal 1975, cuasi par disperazion, tignint cont
de storie di cheste istituzion te nestre legjislazion, si cjapà il troi de leç
di iniziative popolâr, che, daûr dal articul 71 de Costituzion, e domande lis
firmis di 50.000 eletôrs par proponi une norme al Legjislatôr. Tai sîs mês dopo
si cjaparin sù 19.117 firmis.
Dopo, ai 6 di Mai dal
1976, il taramot al savoltà il Friûl e al puartà un jutori che no si spietavisi.
Tes tendopolis tal mieç dai rudinaçs, tai insediaments di roulottes e di
prefabricâts, tra i eletôrs che a levin tai seçs des elezions politichis, e
cjapà slanç la racuelte di firmis pe Universitât di Udin, puartade indevant di
centenârs di volontaris: a metât dal mês di Avost dal 1976, 125 mil eletôrs e
eletoris furlanis a vevin zontât i lôr nons da pît de propueste di leç, che e
fo depositade in Parlament cun 106 mil firmis validis.
A vignirin po
manifestazions, une campagne di stampe e infinidis domandis di no scunî il
desideri di une popolazion interie: ae fin, la leç n. 546 dai 8 di Avost dal1977 Ricostruzion des zonis de regjon
Friûl-Vignesie Julie e de regjon Venit colpidis dal taramot dal 1976 e
previodeve la istituzion, cun decorence dal an academic 1977-1978, de
Universitât di Udin (no «dal Friûl» come che al jere stât domandât), che e
varès vût «l'obietîf di contribuî al progrès civîl, sociâl e ae rinassite
economiche dal Friûl e di deventâ strument organic di svilup e di rinovament
dai filons origjinâi de culture, de lenghe, des tradizions e de storie dal
Friûl». Cu la ativazion dai prins cors tal 1978, la Universitât di Udin, istituide
graciis al jutori decisîf dal taramot, e varès rapresentât intai decenis dopo,
e e rapresente ancjemò vuê, un dai motôrs de cressite civîl e economiche de
regjon.
La esperience furlane dal
1976 e fo fondamentâl ancje par ce che al inten la Protezion civîl. In chê
volte e jere in vore la leç n. 996 dai 8 di Dicembar dal 1970, Normis sul socors e su la assistence aes
popolazions tocjadis di calamitâts - Protezion Civîl”, nassude ancje par
rispuindi ai disastris dai agns prime (il Vaiont, la montane di Florence, il
taramot dal Belice), ma cheste si limitave a stabilî definizions gjenerâls e a assegnâi
la responsabilitât de emergjence al Ministeri dal Interni: il so regolament
atuatîf al sarès rivât undis agns dopo.
Il principi di
centralizazion che le veve ispirade al fo di fat ribaltât subit dopo dai 6 di
Mai dal 1976: la nomine di un Comissari straordenari, che la stesse leç e
previodeve e che al operà tal teritori, e segnà il troi di une decentralizazion
cence precedents des responsabilitâts de emergjence e dal socors ae Regjon e ai
ents locâi. A forin istituîts daurman i Centris operatîfs di setôr (Cos)
che a vevin il compit di coordenâ il socors e la assistence ae popolazion. Magari
cussì no, l’esempli furlan al varès coventât pôc e nuie tal taramot devastant
de Irpinie dal 1981 (plui di 2.700 vitimis), cuant che i socors a rivarin masse
tart e lis gravis mancjancis leadis ae azion dal Stât a forin denunziadis dal
stes president de Republiche, Sandro Pertini.
Cu la leç n. 938/1982 si
previodè duncje une sorte di 'Comissari permanent', pront a intervignî in câs
di emergjence: il Ministri pal Coordenament de Protezion Civîl (vuê Ministri pe
Protezion Civîl). Cheste figure si zove dal Dipartiment de Protezion civîl,
ancje chel istituît tal 1982, cul obietîf di informâ e di prontâ plans nazionâi
e teritoriâi di protezion civîl, e cun compits specifics tal coordenâ la
emergjence, tal direzi i servizis di socors e tal promovi iniziativis di
volontariât.
Il patrimoni culturâl e
tecnic de rispueste emergjenziâl ai taramots dal 1976 al è stât preservât ancje
te pratiche e te organizazion de Protezion Civîl dal Friûl-Vignesie Julie: al à
ispirât lis rispuestis gjestionâls di emergjencis teritoriâls tant che la montane
te Valcjanâl (Ud) tal 2003, la burascje Vaia tal 2017, la pandemie di Covid-19,
la tampiestade disastrose a Mortean (Ud) tal 2023, la montane tal Gurizan tal
2025.
La 'cassele dai imprescj'
di doprâ par frontâ no dome i eventuâi, e forsit probabii, disastris dal
avignî, ma ancje i problemis seris creâts des sfidis ambientâls dal nestri
secul, vuê e je une vore plui furnide che no cincuante agns indaûr. Si è
insiorade cun diviers altris imprescj, ereditât dai taramots dal Friûl dal
1976, pensâts par incressi la resilience dal teritori e de sô popolazion.
Ai 6 di Mai dal 1977, un
an dopo de prime scosse, la Regjon autonome Friûl-Vignesie Julie e screave une Rêt sismometriche regjonâl, che e fâs part di une Rêt sismometriche de Italie
nordorientâl, supuartade di une Rêt acelerometriche regjonâl, formade di
stazions che a misurin il scjassament efetîf dal teren intant des scossis, e
che a proviodin dâts indispensabii pe progjetazion antisismiche e pe valutazion
dai efiets locâi.
Tal 2005 si screave
duncje te Universitât dal Friûl il laboratori di Sigurece e Protezion Intersetoriâl
(SPRINT), par contribuî ae prevenzion e ae gjestion dai pericui e des
emergjencis derivâts di incidents grâfs, che al sarès stât compagnât, tal
cuarantesim dal taramot, de SERM Academy (International Training School in
Seismic Emergency Response Management), une scuele internazionâl di formazion
in materie di gjestion de rispueste te emergjence sismiche, cuntun cjamp di
formazion operative te frazion (mai ricostruide) di Puartis Vecjo in comun di
Vençon. Infin, tal 2018, simpri inte Universitât dal Friûl, e je stade
istituide une catidre Unesco in Sigurece intersetoriâl pe riduzion dai pericui
di disastri e pe resilience, ocupade dal prof. Stefano Grimaz, un studiôs di
innomine internazionâl tal setôr de resilience aes catastrofis.
***
In conclusion, il portâl La fuarce de tiere al à cirût di
documentâ la lezion che il Friûl e la sô popolazion a àn dât ae Italie e al
mont: une ricostruzion di un event distrutîf puartade insom in timps resonevui
in gracie, cence dubi, di finanziaments impuartants, che, dut câs, no vignirin
dilapidâts e no menarin a formis slargjadis di coruzion o di straçarie. E je
stade une ricostruzion partecipade dal bas, «republicane (parcè che e jere
orientade di virtûts civichis tal ûs des risorsis comunis tai diviers nivei di
responsabilitât, dal Stât fin al ultin comun (S. Fabbro)», sostignibile sot
l’aspiet urbanistic, storic e ambientâl, inovative dal pont di viste tecnic
costrutîf.
Plui che i tescj di leç
che di chê a son vignûts fûr, plui che lis istituzions, pûr preziosis, che di chê
a son nassudis e lis esperiencis organizativis e tecnichis che a son stadis
metudis a pro, la ereditât principâl de tragjedie dal 1976, e de rinassite, e
je alc di tant mancul materiâl, ma no par chest mancul impuartant. E je la idee
che, di une catastrofe come chê che e cjapà il Friûl tra il Mai e il Setembar
dal 1976, che e copà 990 personis e e sdrumà desenis di miârs di edificis e
paîs intîrs, si ven fûr dome cirint di tignî adun lis comunitâts, rispietant
lis personis, stant atents ai valôrs, ai dirits, aes relazions sociâls, al
spirt civic.
Une lezion preziose di
solidarietât, di impegn personâl, di partecipazion corâl e di rispiet civîl e
je, prin e plui di altris robis, ce che al reste dal taramot.