Prime lis fabrichis

Come za ricuardât, dilunc de emergjence il rûl des parochiis e de Glesie furlane in gjenerâl al fo determinant tant che supuart psicologjic e emotîf aes personis che a vevin pierdût i lôr cjârs e lis lôr cjasis. Alfredo Battisti, arcivescul di Udin dal 1973 al 2000, al fo il simbul de vicinance ae comunitât furlane. Nol fo ‘dome’ un sostegn spirituâl: chest alt prelât, che al impersonave une ‘Glesie dal popul’ vere, e no formâl, al dialogà cun dutis lis fuarcis politichis, cjapant posizion ancje tes cuistions plui delicadis. Ancje il contribût di un moviment spontani che al jere nassût di cualchi an, clamât Glesie Furlane, al fo essenziâl: chest grup al veve tant che obietîf chel di tignî adun un cristianisim peât aes origjins e la identitât culturâl e linguistiche furlane.

Come che al contà pre David Maria Turoldo tes pagjinis dal cuotidian «Il Giorno» ai 11 di Mai dal 1976, di chest jessi bogns di lei e interpretâ la realtât al vignì fûr il sproc pronunziât dal arcivescul, che al sarès deventât la bandiere de ricostruzion, definint lis prioritâts par frontâ la emergjence e la ricostruzion: 'prime lis fabrichis, po lis cjasis e lis glesiis'. Intai dîs dopo si saressin calcolâts i numars de distruzion: 18 mil i puescj di lavôr pierdûts e cuasi 500 lis aziendis industriâls che a vevin patît dams.

Ai 11 di Mai dal 1976 Gianni Agnelli, che in chê volte al jere president de Confindustrie, al visità il Friûl taramotât. Tes cuatri oris che si fermà te nestre regjon, di là di confrontâsi cu lis autoritâts dal guvier, al le a Maian, li de fabriche di mobii Snaidero, dulà che al incuintrà Rino Snaidero e altris rapresentants de industrie locâl. «O volìn tornâ a lavorâ daurman», i diserin i industriâi a Agnelli. «Si jerin rindûts cont che il dam nol jere dome te distruzion des cjasis», al disarà Edoardo Zerman, segretari de Federazion Lavoradôrs Metalmecanics (FLM) di Udin, ricuardant chei moments, «ma ancje e soredut tal lavôr, che al comprometeve l’avignî di dute la popolazion». Za pôcs dîs dopo de tragjiche gnot di Mai, al jere duncje clâr che la rinassite e varès vût di partî tes fabrichis e cu la riprese dal setôr de manifature; ma par podê lâ indenant in cheste direzion, che e cjatà ducj dacuardi, al fo ancje evident che al sarès coventât un grant impegn de bande des istituzions.

Il Stât al intervignì daurman par ripristinâ i ambits produtîfs, za cu la leç n. 336 dai 29 di Mai dal 1976; ancje la Regjon autonome Friûl-Vignesie Julie, subit dopo, cu la leç regjonâl n. 28 dal 1n di Lui dal 1976,Providencis pal ripristinament de eficience produtive des aziendis industriâls, artesanis, comerciâls e turistichis tocjadis dai moviments telurics dal Mai dal 1976 tal Friûl-Vignesie Julie, e metè in vore il supuart stabilît dal Guvier, integrant diviers struments finanziaris regjonâi: contribûts a fonts pierdût, cun 493 domandis acetadis pe industrie e 2629 pal artesanât, po finanziaments, mutuis di esercizi e altris struments di credit dâts fûr ancje midiant di Friulia, une des primis societâts finanziariis regjonâls istituidis in Italie (1966). Chescj struments normatîfs a vevin doi obietîfs: destinâ misuris contributivis a pro dal setôr secondari e terziari e evitâ che tes zonis colpidis si disvilupàs un procès ireversibil di disgregazion socioeconomiche.

Un câs esemplâr al è ce che al sucedè te fasse pedemontane tra Glemone e Manià, daûr a industrializâsi, e soredut te aree industriâl di Riul (Osôf), la plui grande tra chês dongje dal epicentri, che e jere nassude par iniziative di un grup di imprenditôrs tai prins agns Sessante e che in chel moment e cresseve une vore. Il taramot al sdrumà dal dut la Manifature di Glemone, cuasi ducj i stabiliments des açalariis Pittini, 45 mil m² de fabriche Fantoni, li che al restà in pîts il Centri servizis che al veve dissegnât Gino Valle, 30 mil m² de fabriche Snaidero a Maian, fate sù a partî dal 1972 su progjet di Angelo Mangiarotti. La ricostruzion si disvilupà in manieris diferentis, in cualchi câs doprant ce che al jere restât, in altris sielzint di tornâ a fâ sù dut. La Manifature di Glemone realizade su progjet di Emilio Mattioni e fo un model di ricostruzion imediade: lis voris a tacarin tal Zenâr dal 1977 e a finirin tal Dicembar di chel stes an. Chescj imprenditôrs e lis lôr maestrancis, adun cun altris, a forin un esempli par tantis aziendis piçulis e une vore piçulis, par miârs di laboratoris artesanâi che a frontarin la catastrofe in maniere ative: a doprarin i fonts assegnâts des istituzions par ricostruî e, in plui di cualchi câs, par inzornâsi a nivel tecnologjic.   

Za prime des scossis di Setembar, miârs di personis a tornarin un pôc a la volte tal cicli produtîf. Dopo un an, tor la fin dal 1977, plui dal 90% dai lavoradôrs residents a jerin tornâts a vore; tal 1978 la ocupazion tal setôr industriâl e jere plui alte che no prime dal sisme. Cheste atenzion tal difindi i puescj di lavôr e fo decisive par evitâ che i teritoris tocjâts dal taramot a vignissin bandonâts in maniere permanente: cul sostignî lis aziendis in espansion si podè programâ l’avignî e meti lis fondis par un disvilup industriâl che al jere za partît e che, propit par chest, al traviersave une frase di evoluzion une vore delicade. L’aflùs di emigrants che a tornavin dal forest, un procès che al jere za tacât agns prin, al le indenant e al judà la ricostruzion cun oms e esperiencis.

Come che forsit al jere inevitabil, il sisteme metût in pîts al stiçà critichis e preocupazions par chei altris setôrs economics. No forin pôcs chei che a clamarin la atenzion sul setôr agricul e zootecnic, che al jere daûr a vivi une trasformazion in clâf industriâl cu la margjinalizazion des aziendis agriculis tradizionâls, a dimension familiâr, che cui dams dal taramot a riscjavin che ur rivàs il colp di gracie, come che a mostrin i manifescj publics che vuê a son conservâts tal fonts Gubiani de Civiche Biblioteche Glemonense ‘don Valentino Baldissera’. Su cheste cuistion, ai 16 di Lui dal 1976 si fasè a Udin une cunvigne intitulade ‘Dopo dal taramot costruî une gnove agriculture pe rinassite dal Friûl’, li che i protagoniscj a forin trê: la Aleance dai coltivadôrs dal Friûl-Vignesie Julie, la Federmezzadri CGIL (Confederazion Gjenerâl Taliane dal Lavôr) e la Union Coltivadôrs Talians (UCI).

Ancje la Glesie furlane, par vôs dal Consei pastorâl, e pandè preocupazion pe agriculture, massime pe «situazion une vore grave de mont»: intun document dal Novembar dal 1978 e manifestave malcuietece pal rûl preminent che al jere stât dât ae viabilitât e aes servitûts militârs, pal rivâ di gruessis societâts nazionâls e internazionâls, pal andament dai presits. Intun articul de «Vita Cattolica» (ai 2 di Dicembar dal 1978) intitulât Basta investimenti in Friuli, si evidenziave il divari fra cui che al spietave ancjemò i finanziaments par finî la cjase e i imprenditôrs, che a vevin za vût contribûts consistents. «A cui che al è daûr a comedâsi i cuatri mûrs di cjase i bêçs i rivin un tic a la volte; i industriâi, invezit, a ‘nd àn vûts a palotis, desenis e desenis di miliarts. Cun cuâl criteri? Coventavino ducj par tornâ a fâ sù lis fabrichis? E chês aziendis che a àn vût fonts ancje se a son stadis dome ‘cjareçadis’ dal taramot, cemût ju àno invistîts i contribûts?» Al è clâr che la pôre e jere che il taramot al incressès la velocitât de modernizazion e che al fos un altri motîf di roture incontrolabile dai ecuilibris sociâi.

Ancje l’economist Marzio Strassoldo, in ocasion di une cunvigne promovude a Glemone tal Fevrâr dal 1979 dal Consorzi Industriâl Pedemontan Friûl de Alte (CIPAF), al metè in lûs problematichis peadis aes fabrichis furlanis ‘ricostruidis’. Tal so intervent, Analisi e prospetivis dal marcjât dal lavôr tes zonis taramotadis, al rimarcà, di fat, che «lis aziendis che a àn puartât insom la ricostruzion dai fabricâts e dai implants su dimensions superiôrs di chês precedentis, par rispuindi sedi aes indicazions de leç sedi aes domandis dal marcjât che al presente prospetivis favorevulis in cuasi ducj i setôrs che a operin inte aree […] no son in stât di completâ i organics aziendâi e otignî un ûs plen de capacitât produtive».

Par Andrea Pittini, un dai industriâi protagoniscj dal slanç, li che lis fabrichis a forin in prime linie, pe int dal Friûl il taramot al fo un pataf: «Tal 1976 lis Ferriere Nord a vevin cirche mil dipendents, il sisme al à sdrumât dal dut il stabiliment causant 7 muarts e 39 ferîts. Pocjis oris dopo dal taramot dutis lis Ferriere Nord a jerin un cantîr in plene ativitât […] Tra une scosse e chê altre o vin butât jù lis maseriis, riprogjetât il stabiliment e par ultin o vin tornât a fâlu sù […] O crôt che il sisme nol vedi dât un sburt significatîf ae industrializazion dal teritori, la industrie e veve tacât a disvilupâsi za prin. La int e à cjapât il taramot tant che une sfide al tuart di distruzion e muart che il stes al veve causât. E je stade une gare a tornâ a costruî prin che si podeve par ripiâsi di chê ofese».

La idee che il taramot in Friûl al vedi dât il la a un disvilup economic moderni che al faseve fature a inviâsi, o che al mancjave dal dut, e je une des tantis opinions faladis che a àn acompagnât la economie furlane, calcolade prime dal 1976, cence reson, ‘indaûr’ a pet di chês di altris regjons. L’ipotetic miracul dal taramot al rivà invezit intun moment di fuarte acelerazion de economie industriâl furlane e, in gjenerâl, di dut il sisteme produtîf dal Friûl-Vignesie Julie: al baste pensâ che il redit pro capite des dôs provinciis furlanis, che tal 1963 al jere ancjemò par un cuart sot di chel nazionâl, tal 1970 al jere a pâr cu la medie nazionâl e tal 1976, prime che i finanziaments dal taramot a metessin altre benzine intun motôr che al leve za a plen, al veve passât chel medi di dut il Paîs.

Se si vûl cjatâ une specificitât furlane te reazion al taramot, si à di cirîle te funzion di acompagnament che la Regjon a statût speciâl e je stade buine di puartâ indenant, e che si è concretizade intune condivision, ancje tra maiorance e oposizion regjonâls, dai struments aministratîfs e finanziaris di doprâ e sui obietîfs di fissâ: plui che un sproc, 'prime lis fabrichis, po lis cjasis e lis glesiis' al fo un sintiment nassût dal bas che la classe dirigjente politiche, imprenditoriâl, inteletuâl e morâl e fo buine di cjapâ sù e di meti in vore.